قىرعىزدىڭ مەملەكەتتىك تۋىن وزگەرتۋدى قولداعان پرەزيدەنتى سادىر جاپپاروۆ جۇرت الدىندا سويلەگەن سوزىندە قازاقستاننىڭ ەكس-پرەزيدەنتى نۇرسۇلتان نازارباەۆتى ەسىنە الدى، دەپ حابارلايدى Qaz365.kz. 

«قازاقستاننىڭ پرەزيدەنتى (بۇرىنعى)  30 جىلداي وتىرىپ الدى عوي باسقارىپ. استانانى الماتىدان كوشىرەردە پارلامەنتكە كەلىپ سۇراندى. سول كەزدە دەپۋتاتتار قارسى شىقتى. «اقمولاعا كوشىرگەن دەگەن نە؟»، «ەن دالا ەمەس پە؟»، «سۋىق» دەسكەن. شىن مانىندە، استانادا قۇتىرعان ءيتتى بايلاساڭ تۇرمايدى. بىلەسىڭدەر عوي. سۋىق قوي. سول كەزدە نازارباەۆ مىنبەردە تۇرىپ: «قۇرمەتتى ەل-جۇرتىم، مەنىڭ دە ويلاعانىم بار. بۇگىن تۋعان كۇنىم ەكەن، ءبىر رەت ماقۇلداڭدارشى»، – دەپ سۇرادى. قازاق پارلامەنتى 90-95 پايىز بولىپ ماقۇلداپ، قولداپ بەردى»، – دەيدى جاپپاروۆ سويلەگەن سوزىندە.

ونىڭ سوزىنشە، قازىرگى كۇنگى استانا دۇنيەجۇزىندەگى ەڭ الدىڭعى شاھارلاردىڭ بىرىنە اينالعان.

«مەن ەندى بوربوردى (بىشكەكتى سولاي اتايدى) كوشىر دەپ تۇرعام جوق، باسقا جاققا شاھار سالام دەپ سۇرانعام جوق، ەڭ بولماسا، جەلەكتى (تۋدى) وزگەرتۋگە مەنى ءبىر قولداپ بەرۋگە بولاتىن شىعار؟ سۇرانعاندارىڭىزدى قولداپ تۇرام. سۇراعان مەنى دە قولداپ بەرىڭدەر. تۋ ەش وزگەرمەيدى. تەك ءسال تۇزەتىلەدى»، – دەيدى ول.

ايتا كەتەيىك، قىرعىزستاننىڭ جوعارعى كەڭەسىنىڭ دەپۋتاتتارى مەملەكەتتىك تۋداعى كۇن ساۋلەسىنىڭ ءپىشىنىن وزگەرتۋدى ۇسىنىپ وتىر. وزگەرىستەردىڭ باستاماشىلارى – سپيكەر نۇرلانبەك شاكيەۆ پەن دەپۋتات ۇلان پريموۆ. ولار بۇگىنگى كۇنگە دەيىن قىرعىزستان تۋىن «كۇنباعىس گۇلى دەپ قابىلدايتىندار بار، جالاۋشا بەينەسىنىڭ ماعىناسىن ەكىۇشتى ءتۇسىندىرۋدى جويۋ ءۇشىن شارالار قابىلداۋ قاجەت» دەپ ەسەپتەيدى. سول سەبەپتى تولقىندى شاشاقتى دەپۋتاتتار تىك شاشاق قىلىپ وزگەرتىپ، راسىندا دا، كۇن بەينەسىن كورسەتكەن ءجون دەيدى.

فوتو: قىرعىزستان پرەزيدەنتىنىڭ ءباسپاسوز قىزمەتى

Abai.kz