الماتى مەنەدجمەنت ۋنيۆەرسيتەتىندە «الاش قايراتكەرلەرىنىڭ وزىق يدەيالارى» اتتى عىلىمي جيناقتىڭ تۇساۋكەسەرى ءوتتى. جيناق ۋنيۆەرسيتەتتىڭ 35 جىلدىعىنا وراي شىعارىلىپ وتىر.

ەڭبەك 3 بولىمنەن، 22 عالىمنىڭ زەرتتەۋ جۇمىسىنان تۇرادى. م.ءجۇسىپوۆ، ت.جۇرتباي، د.ىسقاقۇلى، د.الكەباەۆا، ع.بايتيلەۋەۆا، و.جۇباي، س.ءجۇسىپ، ا.سالقىنباي جانە تاعى دا باسقا اۆتورلاردىڭ زەرتتەۋىن كەزدەستىرۋگە بولادى.

جيناقتىڭ نەگىزگى ماقساتى - الاش قايراتكەرلەرىنىڭ وزىق يدەيالارىن الىس-جاقىن شەتەلدەرگە دە تانىتىپ، ومىرشەڭ قازىناعا اينالدىرۋ.  ەڭبەكتە الاش زيالىلىرىنىڭ وقۋ، اعارتۋ، ءبىلىم، تاربيە جانە مادەنيەت ماسەلەلەرى بويىنشا قالدىرعان مۇرالارىن شەتەل عالىمدارىنىڭ تۋىندىلارىمەن سالىستىرا وتىرىپ تالدانعان عىلىمي ماقالالار توپتاستىرىلدى.

«ۋنيۆەرسيتەت – الاش ازاماتتارىن تاربيەلەيتىن جەر. ال الاشتىڭ ارىستارى ۇنەمى حالىقتىڭ ساۋاتىن اشۋعا تىرىسقانى اقيقات. سول سەبەپتى بۇگىن جۇرەگى قازاق دەپ سوعاتىن ءار ازاماتتان ءسۇيىنشى سۇرايمىن!

ءبىز AlmaU-دىڭ 35 جىلدىق مەرەيتويىنا ارناپ «الاش قايراتكەرلەرىنىڭ وزىق يدەيالارى» اتتى عىلىمي جيناقتى دايىندادىق!

الاش يدەياسى – حح عاسىر باسىنداعى قازاقتىڭ ۇلتتىق-مەملەكەتتىك يدەياسى، جاڭاشىلدىق پەن جاسامپازدىقتىڭ كوشباسشىسى بولدى. ال­اش مۇددە­سى مەن يدەيا­سى­نا ادالدىق – قاشان دا قازاق­ستان­نىڭ ساياسي، رۋحاني ءور­كەندەۋى مەن ءورىس­تەۋىنىڭ بارومەترى بو­لىپ قال­ماق.

الاشوردانىڭ دۇنيەگە كەلگەن كۇنىمەن الماتى مەنەدجمەنت ۋنيۆەرسيتەتىنىڭ تۋعان كۇنىنىڭ سايكەس كەلۋى بىزگە ۇلكەن مىندەتتەر جۇكتەيدى. سوندىقتان دا ءبىز الاش قايراتكەرلەرى مەن ولاردىڭ ۇلى ىستەرىن زەرتتەپ، ناسيحاتتاۋدى ارى قاراي جالعاستىرماقپىز. اعىلشىن تىلىنە اۋدارىپ بۇكىل الەمگە تاراتپاقپىز. وسىلايشا دۇنيەجۇزىنىڭ الاشتى تانۋىنا اسەر ەتپەكپىز»، - دەپ اتاپ ءوتتى Almaty Management University پرەزيدەنتى اسىلبەك قوجاحمەتوۆ.

ۇيىمداستىرۋ كوميتەتىنىڭ مۇشەسى، فيلولوگيا عىلىمدارىنىڭ دوكتورى مەڭدىگۇل شىڭداليەۆا جوباعا ەلىمىزدىڭ 5 قالاسىنان 10 جوعارى وقۋ ورنىنىڭ اۆتورلارى قاتىسقانىن ايتتى: «الاشوردالىقتاردىڭ ءتول ەڭبەكتەرىن وقىپ وتىرىپ، ولاردىڭ ەجەلگى ريم، گرەكيا، ءۇندىستان مەن قىتاي ويشىلدارىنىڭ ەڭبەكتەرىمەن ەتەنە تانىس بولعانىن، سول ۇلىلاردىڭ دانالىقتارىنا قانىق بولعانىنا كوز جەتكىزۋگە بولادى. ءبىزدىڭ بايقاعانىمىز، «الاش يدەياسى»، الاشوردالىقتاردىڭ قۇندىلىقتارى ماحاتما گاندي، مارتين ليۋتەر كينگ، مۇستافا كەمال وزتۇرىكتىڭ كۇرەس جولىنداعى ۇندەۋلەرمەن، ولاردىڭ ۇستانىمدارىمەن ۇشتاسىپ، الەمدەگى ساياسي وقيعالارعا اسەر ەتكەن كۇش-جىگەرگە اينالدى».

Abai.kz