قازىر ەلىمىزدە مەرزىمدىك اسكەري بورىشىن وتەپ جۇرگەن ساربازدارعا بانكتەن العان قارىزى مەن شاعىن نەسيەلىك تولەمدەرىن كەيىنگە قالدىرۋ تاجىريبەسى قولدانىلىپ كەلەدى. 

قورعانىس مينيسترلىگىنىڭ مالىمەتىنە سۇيەنسەك، قازىرگى كەزدە 5 مىڭنان استام ساربازدىڭ جالپى سوماسى 1 ملرد 875 ملن تەڭگەنى قۇرايتىن نەسيەسى كەيىنگە قالدىرىلدى.

«قازىرگى ۋاقىتتا بانكتەر مەن ميكروكرەديتتىك ۇيىمداردا 1,6 ملرد تەڭگە سوماسىنا 5 مىڭعا جۋىق اسكەري قىزمەتشىنىڭ وتىنىشتەرى قارالىپ جاتىر.

قورعانىس ۆەدومستۆوسىنىڭ بۇل باستاماسى زاڭ جۇزىندە بەكىتۋدى جانە مۇددەلى ۇيىمداردىڭ بىرلەسكەن تەحنيكالىق شەشىمىن تالاپ ەتەدى.

قورعانىس مينيسترلىگى ساربازدار ءۇشىن الەۋمەتتىك قولداۋ شارالارىن زاڭ تۇرعىسىندا رەتتەۋ ماقساتىندا «اسكەري قىزمەت جانە اسكەري قىزمەتشىنىڭ مارتەبەسى تۋرالى» قر زاڭىنا 50-1-باپتى ەنگىزۋگە باستاماشى بولدى. زاڭ جوباسى پارلامەنت ماجىلىسىندە قارالىپ جاتىر.
بۇدان وزگە، قورعانىس مينيسترلىگى قر قارجى نارىعىن رەتتەۋ جانە دامىتۋ اگەنتتىگىنە «بانكتەر جانە بانك قىزمەتى تۋرالى» قر زاڭىنىڭ 34-بابىنا جانە «ميكروقارجىلىق قىزمەتى تۋرالى» قر زاڭىنىڭ 7-بابىنىڭ 2-تارماعىنا تولىقتىرۋلار ەنگىزۋ جونىندە ۇسىنىستارىن ءبىلدىردى»، - دەلىنگەن مينيسترلىك حابارلاماسىندا.
قورعانىس مينيسترلىگى، سونداي-اق اسكەري جيىندارعا شاقىرىلاتىن زاماتتارعا دا وسىنداي جەڭىلدىكتەر بەرۋدى ۇسىنىپ وتىر.

«نەسيەنى كەيىنگە قالدىرۋ اسكەري جيىنداعى بۇكىل كەزەڭگە بەرىلەدى دەپ كۇتىلۋدە. بۇل رەتتە مالىمەت الماسۋ مۇددەلى ورگانداردىڭ اقپاراتتىق جۇيەلەرىنىڭ ءوزارا ءىس-قيمىلى ارقىلى جۇزەگە اسىرىلۋعا ءتيىس.

پروتسەستەردى اۆتوماتتاندىرۋ ءۇشىن ۇيىمداستىرۋ-جۇمىلدىرۋ جۇمىسى دەپارتامەنتى قارجى نارىعىن رەتتەۋ جانە دامىتۋ اگەنتتىگىمەن جانە «مەملەكەتتىك كرەديتتىك بيۋرو» اق-مەن بىرلەسىپ پرواكتيۆتى فورماتتا ءوزارا ءىس-قيمىل الگوريتمىن ازىرلەدى.

كرەديتتىك دەمالىستاردى اۆتوماتتى (پرواكتيۆتى) تۇردە بەرۋ جونىندەگى پيلوتتىق جوبا 2024 جىلى ىسكە قوسىلاتىن بولادى. جىل سوڭىنا دەيىن زاپاسقا شىعارىلعان ادامداردىڭ نەسيەلىك دەمالىسىن توقتاتۋ الگوريتمى سياقتى، مۇندا دا اسكەرگە شاقىرۋ كۇنىنىڭ ورنىنا اسكەري قىزمەتتەن بوساتۋ كۇنى بەرىلەدى»، - دەپ تولىقتىردى ۆەدومستۆودان.

فوتو:عالامتوردان

Abai.kz