بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي ءمالىم ەتتى.  

«قۋاندىق بيشىمباەۆتىڭ ىسىنە قاتىستى ايتار بولساق، سالتانات نۇكەنوۆانىڭ مايىتىنە ساراپتاما جاساۋ تۋرالى قىلمىستىق ءىس اياسىندا ماتەريال كەلىپ تۇسكەنى راس. ونىڭ قالاي قايتىس بولعانىنا قاتىستى ءمان-جايدى ايتا المايمىز. قىلمىستىق ءىس اياسىندا 12 ءتۇرلى ساراپتاما تاعايىندالدى. ونىڭ ونىنىڭ قورىتىندىسى شىعارىلىپ، قۇزىرلى ورگاندارعا جىبەرىلدى. بىرەۋى وسى اپتادا اياقتالادى. ال 12-ءشى ساراپتاما كۇنى كەشە عانا كەلىپ ءتۇستى.

زاڭنامادا بەكىتىلگەن تارتىپكە سايكەس، وتىز كۇنتىزبەلىك كۇندە ساراپتاما وتكىزىلۋى ءتيىس. ساراپتاما قورىتىندىلارى ىشكى ىستەر مينيسترلىگىنە جولدانادى»، - دەدى تالعات ءۋالي.

ەسكە سالايىق، بيىلعى 9 قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمباەۆتىڭ ۇستالعانىن راستادى.

ەلوردا پوليتسيا دەپارتامەنتى قر قىلمىستىق كودەكسىنىڭ 99-بابى 1-بولىگى بويىنشا تەرگەۋ امالدارىن باستادى.

11 قاراشادا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمباەۆتى 2 ايعا قاماۋعا الۋ شاراسىن سانكتسيالادى.

12 قاراشادا كىسى ءولىمى بولعان «گاسترو-ورتالىق» مەيرامحاناسىنىڭ ديرەكتورى ۇستالدى.

15 قاراشادا وتكەن كەڭەستە پرەزيدەنت ق.توقاەۆ ءىىم-گە بيشىمباەۆتىڭ ءىسىن ەرەكشە باقىلاۋعا الۋدى تاپسىردى.

فوتو: اشىق دەرەككوزدەن

Abai.kz