ءىس بويىنشا الدىن الا تىڭداۋلار ءوتىپ كەتكەن. تەرگەۋ مالىمەتتەرى بويىنشا، ءىستى تەرگەۋ بارىسىندا جاڭا جاعدايلار انىقتالعان، دەپ حابارلايدى Ulysmedia.kz.

استانا سوتىندا ارىستانبەك مۇحامەديۇلىنا قاتىستى جاڭا سوت پروتسەسى بويىنشا الدىن الا تىڭداۋلار ءوتتى. ەكى ەپيزود ءبىر وندىرىسكە بىرىكتىرىلگەن.

وسىلايشا، ءبىرىنشىسى "التىن ادامنىڭ الەم مۇراجايلارى ارقىلى شەرۋى" كورمەسىن وتكىزۋگە بايلانىستى جاڭا جاعدايلار تەكسەرىلىپ جاتىر. ەكىنشى ءىس - استاناداعى "ديپلومات" قوناق ءۇيىنىڭ "رەيدەرلىگى" جونىندە قوزعالعان.

ايىپتاۋ اكتىسىنە سايكەس، سوتتالۋشىلار 1.5 ملرد تەڭگە جىمقىردى دەپ كۇدىككە ءىلىنىپ وتىر. قورعاۋشى تاراپ بۇل اكتىمەن كەلىسپەيتىنىن مالىمدەدى، ويتكەنى كىنا راستالماعانىن العا تارتادى.

ادۆوكاتتار جاڭا ايىپتاۋ اكتىسىمەن تانىسقان كەزگە دەيىن سوت پروتسەستى كەيىنگە قالدىردى.

ارىستانبەك مۇحامەديۇلىن "ديپلومات" قوناق ءۇيىن رەيدەرلىك جولمەن باسىپ الدى دەپ ايىپتاپ وتىر. سونداي-اق، وعان لاۋازىمدىق وكىلەتتىكتىگىن تەرىس پايدالانىپ، قىلمىستى ۇيىمداستىردى دەگەن ايىپ تاعىلعان.

"اقتەرەك لتد" جشس قۇرىلتايشىسى جانە قوناق ءۇيدىڭ بۇرىنعى يەسى جابىرلەنۋشى بولىپ تانىلعان.

تەرگەۋ مالىمەتتەرى بويىنشا، 2019 جىلى بۇرىنعى يەسى مۇحامەديۇلىنا كومەك سۇراپ جۇگىنگەن. سودان كەيىن مۇحامەديۇلى جابىرلەنۋشىگە 2,5 ملرد تەڭگە بەرگەن، الايدا سەنىمدى تۇلعانىڭ اتىنا بيزنەستىڭ 71% رەسىمدەۋدى تالاپ ەتكەن.

"وسىدان كەيىن مۇحامەديۇلى بۇكىل قوناقۇيدى باقىلاۋعا الۋ جونىندە شەشىم قابىلدادى" دەيدى مەملەكەتتىك ايىپتاۋشى.

– ول ديرەكتوردى اۋىستىرۋ بويىنشا جشس قاتىسۋشىلارىنىڭ جالپى جينالىسىنىڭ حاتتاماسىن دايىنداۋعا تاپسىرما بەردى. وسىدان كەيىن مۇحامەديۇلىنىڭ نۇسقاۋى بويىنشا داۋىس بەرۋ ناتيجەلەرىن قاساقانا بۇرمالاۋ جونىندە حاتتاما جاسالىپ، وعان داۋىس بەرۋ ناتيجەلەرى تۋرالى كورىنەۋ انىق ەمەس دەرەكتەر ەنگىزىلدى، - دەدى پروكۋرور.

ەسكە سالايىق، ەكس-مينيستر ارىستانبەك مۇحامەديۇلى قر قىلمىستىق كودەكستىڭ 28-بابى 3-بولىگى 4-تارماعى جانە 189-بولىگى 2-تارماعى بويىنشا قۇقىقبۇزۋشىلىق جاساعانى ءۇشىن كىنالى دەپ تانىلىپ، 8 جىلعا باس بوستاندىعىنان ايىرىلدى.

ارىستانبەك مۇحامەديۇلىمەن قاتار ۇلتتىق مۋزەي باسشىسى بولعان الماس نۇرازحان، «ەكسپونات» مەردىگەر ۇيىم ديرەكتورىنىڭ ورىنباسارى ازامات كوشەنوۆ پەن وسى كومپانيانىڭ ەسەپشىسى ايىم سادۋاقاسوۆا 7 جىلعا سوتتالعان بولاتىن. ولار قىلمىستىق زاڭبۇزۋشىلىققا قاتىستى دەگەن ايىپپەن كىنالى دەپ تانىلدى. سوت شەشىمىمەن 6 جاسار قىزى بار، جالعىزباستى ايىم سادۋاقاسوۆانىڭ بالاسى سادۋاقاسوۆانىڭ تۋىستارىنىڭ بىرىنە نەمەسە قامقورلىق مەكەمەسىنە تاپسىرىلاتىن بولعان.

ارىستانبەك مۇحامەديۇلى 2022 جىلدىڭ 28 مامىرىندا قاماۋعا الىنعان بولاتىن.

تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ» جانە «قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ فاكتىلەرى بويىنشا جۇرگىزىلدى. بۇدان باسقا، ا. مۇحامەديۇلىنىڭ مادەنيەت جانە سپورت ءمينيسترى لاۋازىمىندا بولعان كەزىندە تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» رمقك، «قازاق ەنتسيكلوپەدياسى» اق جانە «قازاق عىلىمي-زەرتتەۋ مادەنيەت ينستيتۋتى» جشس زاڭسىز بەرۋگە قاتىستىلىعى تەكسەرىلدى.

ۇكىم شىققاننان كەيىن كوپ وتپەي، ارىستانبەك مۇحامەديۇلىنىڭ ادۆوكاتى پارا بەرۋگە يتەرمەلەدى دەگەن كۇدىككە ىلىنگەن ەدى. ال شىلدە ايىندا سىبايلاس جەمقورلىققا قارسى ءىس-قيمىل اگەنتتىگى ەكس-ءمينيستردىڭ ايەلى عاليا ىسقاقوۆانى كۇدىكتى دەپ تانىلعانىن ءمالىم ەتكەن.

فوتو: اشىق دەرەككوزدەن

Abai.kz