گولليۆۋد اكتەرى كيىكتەر جايلى پوست جازعان، دەپ حابارلايدى Ulysmedia.kz.

«وسىناۋ تەڭدەسسىز قالپىنا كەلتىرۋ جۇمىستارى قازاقستاندا كيىكتەردىڭ پوپۋلياتسياسى ساقتالعانىن كورسەتەدى. 2005 جىلى عانا 48 مىڭ باس بولعان كيىكتىڭ سانى قازىر 1,9 ميلليوننان استى.

براكونەرلىككە قارسى كۇرەس باستامالارىنا، قۇقىقتىق ءتارتىپتى بەلسەندى قامتاماسىز ەتۋگە جانە جاڭا قورعالاتىن اۋماقتاردى قۇرۋعا قوماقتى قاراجات سالعان قازاقستان ۇكىمەتىن قۇتتىقتايمىز. ولاردىڭ تابيعاتتى قورعاۋ ۇيىمدارىمەن، ۋنيۆەرسيتەتتەرمەن جانە عالىمدارمەن ىنتىماقتاستىعى – بىرلەسكەن كۇش-جىگەرمەن قول جەتكىزىلگەن تابيعاتتى قورعاۋداعى شىنايى تابىستىڭ جارقىن مىسالى، - دەپ جازدى دي كاپريو.

ايتا كەتەرلىگى، بيىلدان باستاپ قازاقستاندا كيىكتەردى اتا باستاعان ەدى.

جۋىردا ەكولوگيا جانە تابيعي رەسۋرستار ءمينيسترى ەرلان نىسانباەۆ ەلىمىزدە كيىك سانى تاريحي كورسەتكىشتەن اسىپ كەتكەنىن مالىمدەگەن.

ونىڭ دەرەگىنشە، 2003 جىلى كيىك سانى بار-جوعى 21 مىڭ بولدى.

«ال 1993 جىلى 1 ملن 200 مىڭ باس بار ەدى. مەملەكەتتىڭ قامقورلىعىنىڭ ارقاسىندا كيىك سانى 1 ملن 900 باسقا جەتتى. مۇنىڭ ىشىنە بيىلعى كوكتەمگى ءتولىن قوسپادىق. جالپى، كيىك – وسىمتال مال. كەلەسى كوكتەمدە ساناق وتەدى. بىراق قازىردىڭ وزىندە ەڭ تومەنگى 30 پايىزدىق بولجامدى العاننىڭ وزىندە بۇگىندە 600 مىڭ باس كيىك قوسىلىپ وتىر. بۇگىندە كيىك سانى 2 ملن 600 مىڭنىڭ ۇستىندە بولادى»، - دەدى ول.

ەرلان نىسانباەۆ كيىكتەردى تۇنگى ۋاقىتتا اتۋ كوزدەلىپ وتىرعانىن ايتتى. ءمينيستردىڭ ايتۋىنشا، اقبوكەندەر اۋىل شارۋاشىلىعىنا 12 ملرد تەڭگە شىعىن اكەلگەن.

قازاقستاندىق زووقورعاۋشىلار ايتۋىنشا، ەلىمىزدە كيىكتەردى اتۋ ناۋقانى باستالعالى اقبوكەندەر باتىس قازاقستان وبلىسىنان رەسەي اۋماعىنا ۇدەرە كوشىپ جاتىر.

Abai.kz