2024 جىلى بيۋدجەتتەن تولەنەتىن جيىنتىق زەينەتاقىنىڭ ورتاشا مولشەرى 130 مىڭ 414 تەڭگە بولادى، دەپ حابارلادى Halyq Uni.

2024-2026 جىلدارعا ارنالعان رەسپۋبليكالىق بيۋدجەت تۋرالى زاڭدا 2024 جىلعى 1 قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىن قر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس 7%-عا، ىنتىماقتى زەينەتاقىنى 9%-عا، ياعني ينفلياتسيا دەڭگەيىنەن 2%-عا ىلگەرى ارتتىرۋ كوزدەلگەن.

2024 جىلى بيۋدجەتتەن تولەنەتىن جيىنتىق زەينەتاقىنىڭ ورتاشا مولشەرى (بجزق تولەمدەرىن ەسەپتەمەگەندە) – 130 414 تەڭگە (2023 جىلى – 120 838 تەڭگە).

بۇدان باسقا، مەملەكەت باسشىسىنىڭ تاپسىرماسى بويىنشا 2023 جىلدان باستاپ 5 جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ 70%-نا دەيىن، ەڭ جوعارىسىن 120%-عا دەيىن جىل سايىن كەزەڭ-كەزەڭىمەن ارتتىرۋ ىسكە اسىرىلادى.

ماسەلەن، 2024 جىلعى 1 قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنەن 60%-دان 65%-عا دەيىن ۇلعايتىلاتىن بولادى. بۇل – 28 215 تەڭگە. ەڭ جوعارى مولشەرى ەڭ تومەن كۇنكورىس دەڭگەيىنەن 100-دەن 105%-عا دەيىن ارتتىرىلىپ، 45 578 تەڭگە بولادى.

2024 جىلعى 1 قاڭتاردان باستاپ مەملەكەتتىك جاردەماقىلاردىڭ كولەمى تومەندەگىدەي ۇلعايادى:

• • 1, 2, 3 بالانىڭ تۋىنا بەرىلەتىن جاردەماقى 131 100 تەڭگەدەن 140 296 تەڭگەگە دەيىن، 4 جانە ودان دا كوپ بالا تۋىنا بەرىلەتىن جاردەماقى 217 350 تەڭگەدەن 232 596 تەڭگەگە دەيىن ۇلعايادى;

• • مولشەرى بالالار سانىنا بايلانىستى كوپبالالى وتباسىلارعا بەرىلەتىن جاردەماقى 4 بالاسى بار وتباسىلار ءۇشىن 55 304 تەڭگەدەن 59 183 تەڭگەگە دەيىن، 10 بالاسى بار وتباسىلار ءۇشىن 138 000 تەڭگەدەن 147 680 تەڭگەگە دەيىن ۇلعايادى;

• • I توپ مۇگەدەكتىگى بار ادامدارعا ارنالعان جاردەماقى 89 248 تەڭگەدەن 95 496 تەڭگەگە دەيىن، II توپ 71 398 تەڭگەدەن 76 397 تەڭگەگە دەيىن، III توپ 48 681 تەڭگەدەن 52 089 تەڭگەگە دەيىن ۇلعايتىلادى.

سونداي-اق مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) اسىراۋشىسىنان ايىرىلۋ جانە ەڭبەككە قابىلەتتىلىگىنەن ايىرىلۋ بويىنشا تولەمدەر 7% ۇلعايتىلادى. اتالعان تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن بەرىلەتىن مەملەكەتتىك جاردەماقىلارعا قوسىمشا ىسكە اسىرىلادى.

تولەمدەردىڭ مولشەرى جەكە-جەكە ەسەپتەلەدى جانە مىنالارعا بايلانىستى بولادى: سوڭعى 2 جىلدا ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس، ەڭبەككە قابىلەتتىلىگىنەن ايىرىلۋ كوەففيتسيەنتتەرى، اسىراۋىنداعى ادامدار سانى، مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى الماستىرۋ.

فوتو: عالامتوردان