وتكەن عاسىردىڭ 40-جىلدارىنىڭ ىشىندە قىتاي شەكاراسىن بۇزىپ ءوتىپ، ءۇندىستان، ارى قاراي تۇركياعا بارعان قاليبەك حاكىم، ونىڭ ۇلى حاسان ورالتاي دەگەن تۇلعالاردى ءبىراز جۇرتشىلىق تانيدى دەپ ويلايمىن. سول قاليبەك حاكىمنىڭ ءىنىسى ءىلياس رايىمبەكۇلىنىڭ ۇلى كاسىپكەر ءابىلباشار ىلياسۇلىمەن سۇحباتتاسقان ەدىك.

– ءابىلباشار اعا، قازاق ەلىنە كەلگەنىڭىزگە قانشا جىل بولدى؟ ءبىزدىڭ بالا كۇنىمىزدە ءابىلحايىر تولەۋحانۇلى اعا ەكەۋلەرىڭىزدىڭ قازاقستانعا وقۋعا كەتتى دەگەن ءسوز ەرەنتاۋداعى ەل-جۇرتقا تارالىپ، اڭىز بولىپ ايتىلعانى ءالى ەسىمدە. "قاسەكەڭ (حاسان ورالتاي) ءوزى شاقىرىپ الىپ كەتىپتى" دەستى. اڭگىمەنى وسىدان باستاساڭىز.

– راقمەت، جەڭىس باۋىرىم، بيىل ءبىزدىڭ قازاق ەلىنە كەلگەنىمىزگە دە 30 جىلعا جۋىقتاپتى. 1992 جىلى قاراشا ايىنىڭ ورتاسى ەرەنقابىرعا بوكتەرى قىزىل وزەن وڭىرىنە حاسان ورالتاي اعامىز شىنجاڭنىڭ سول كەزدەگى باسشىسىنىڭ شاقىرۋمەن ساپارلاي بارعان ەدى، حاسان اعا سول بارىسىندا ءوزىنىڭ الماتىدا ءبىر حالىقارالىق جينالىسقا قاتىسقانىن ايتا كەلىپ: “قازاق ەلى دەربەس مەملەكەت بولدى، مىنە، كەۋدەمدە كوك تۋىم، مەن قازاق ەلىنىڭ استاناسى الماتىدان كەلە جاتىرمىن” دەپ جينالعان تۋىستارعا ايتقانى ءالى ەسىمدە. حاسان اعا سول ساپارىندا تۋىستارعا قازاقستانعا كوشەتىندەرىن ەسكەرتە كەلىپ، ال مىنا “ەكى جىگىتتى قازاقستانعا اپارىپ وقىتام سوندا قونىستانىپ تۋىستاردى تارتاسىڭدار” دەگەن ويىن ايتتى. سونىمەن اراعا ءۇش جىل سالىپ ءبىز ءابىلحايىر ەكەۋىمىز 1995 جىلى شىلدە ايىندا قازاقستاننىڭ سول كەزدەگى استاناسى الماتىعا كەلگەن ەدىك.

– قازاقستانعا كەلىپ قانداي وقۋ ورنىنا تۇستىڭىزدەر؟

– ءبىز الماتىعا 1995 جىلى شىلدە ايىندا كەلگەنىمىزگە بايلانىستى وقۋ ماۋسىمى باستالعانشا كۇتە تۇرۋىمىز كەرەك بولدى. ول كەزدە دۇنيەجۇزى قازاقتار قاۋىمداستىعىنىڭ جاقسى جۇمىس ىستەپ تۇرعان شاعى، شەت ەلدەن كەلگەن قازاقتاردىڭ قولىنا بەرىلەتىن "قازاق" كۋالىگى قازاقستان ازاماتى كۋالىگىمەن تەڭ قۇقىلى ەدى. ول كەزدە دۇنيەجۇزى قازاق قاۋىمداستىعىنىڭ ىقپالى زور بولدى، شەتەل قازاقتارىنىڭ وقۋعا كەلگەن جاستارىنا گرانت پەن وقۋعا تۇسۋىنە كومەك بەرىپ وتىردى. ءبىزدى سول كەزدەگى قاۋىمداستىقتىڭ باسشىسى قالداربەك نايمانباەۆ قابىلداپ، قاي وقۋ ورنىنا تۇسكىمىز كەلسە، سوعان جولداما بەرەتىنىن ايتتى. ءبىز تۇركىستانداعى قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىن تاڭدادىق.

– ءبىزدىڭ ەرەنعابىرعاداعى ەل باياعىداعى كوشكەن ەلدەن قالعان ەل عوي. مەن ەس بىلگەندە، كوپ بولماسا دا قاليبەك حاكىمنىڭ كوشى جايلى ۇلكەندەردىڭ اڭگىمەسىنەن ەستىپ قالاتىنمىن. قاليبەك حاكىممەن ءسىزدىڭ اكەڭىز ءىلياس رايىمبەكۇلى اعايىندى كىسىلەر. حاسان ورالتايدىڭ "ەلىم-ايلاپ وتكەن ءومىر" كىتابىن وقىعاندار بولسا بىلەدى، اعايىندى ەكى كىسىنىڭ بارىس- كەلىسىن، سول كەزدەگى ەل جايىن، وتكەن عاسىرعا ءتان ساياسي ۋاقيعالاردى تاپىشتەپ، قالدىرماي قاداعالاپ جازعان. سىزدەر مەن بىزدەر قۇداندالى ەلمىز، سوندىقتان دا سوناۋ ءبىر جىلدارداعى حيكاياتتاردان حاباردار بولاتىنىمىز زاڭدى. 1988 جىلى حاسان ورالتاي ء"تاڭىرتاۋ" فەرماسىنا كەلگەندە العاش كورگەن ەدىم، جيەنى باقاناي اعامىزدىڭ ۇيىندە، توپىرلاعان قالىڭ ادامنان ىشكە كىرە الماساق تا، قاسەكەڭنىڭ كوش جايىندا ايتقان اڭگىمەسىن شەت جاعالاپ ەستىگەنمىن. كەيىن "ەلىم-ايلاپ وتكەن ءومىر" كىتابىنان ول كەزدەگى ساپار جايىندا وقىپ، قانىقتىق. سول كەزدەن-اق قاسەكەڭ قىتايداعى تۋىسقاندارىنا، سىزدەرگە باعىت-باعدار سىلتەسە كەرەك.

– ءيا، ءبىزدىڭ تۋىستاردىڭ قازاق ەلىنە ەرتەرەك قونىس اۋدارۋىنا حاسان اعامىزدىڭ تىكەلەي ىقپالى بولدى. ءوزىڭ دە ايتىپ وتىرعانىڭداي مەنىڭ اكەم ءىلياس رايىمبەكۇلى قاليبەك رايىمبەكۇلىنىڭ ءىنىسى بولۋىنا بايلانىستى قىتاي كوممۋنيستەرى جاعىنان وتە اۋىر سوققىعا ۇشىراپ، بار مۇلكى كامپەسكەلەنىپ، اۋىر ازاپتار كورگەنى بەلگىلى. 1966-1976 جىلدار اراسىنداعى ون جىلدىق مادەني توڭكەرىسىندە مەنىڭ اكەم ءىلياس رايىمبەكۇلى "باندىنىڭ" ءىنىسى حالىق جاۋى رەتىندە ءار كۇنى كۇرەسكە الىنىپ، اۋىر سوققى زاردابىنىڭ كەسىرىنەن 1971 جىلى 61 جاسىندا ومىردەن ءوتتى. ال قالعان اعا-اپكە، تۋىس-تۋعاندارىمنىڭ كورمەگەن قورلىعى قالماعىنىن كۇنى بۇگىنگە دەيىن ەسكە الىپ وتىرادى. وسى جاعدايلار جونىندە حاسان ورالتايدىڭ "ەلىم-ايلاپ وتكەن ءومىر" ەستەلىگىندە 1984-1988 جىلدارداعى "تۋعان ولكەم شىعىس تۇركىستانعا ساپارلارىم" دەگەن بولىمدە توقتالىپ وتكەن.

– تولەۋحان، قانەن اكەلەرىمىزدىڭ 2000 جىلدارداعى قىتايدىڭ بەيبىت كەزىندە، مامىراجاي تىرلىكتەرىن تاستاپ، بارىنەن باز كەشىپ، ءوز ۇرپاقتارىن قازاق ەلىنە قونىستاندىرۋىنىڭ دۇرىس شەشىم بولعانىن قازىر ۋاقىت دالەلدەپ وتىر. بىزدەر بۇل كۇندە جاڭا ورتاعا، تىڭ تىرشىلىككە ۇيلەسىپ، ءوسىپ-ءونىپ، ورنىعىپ قالدىق. بۇل - ءبىرىنشى اللانىڭ، ەكىنشى - تاۋەلسىزدىكتىڭ ارقاسى. كەزىندەگى الاش ارىستارىنىڭ ارمانى ورىندالىپ، حح عاسىردىڭ باسىندا تاۋەلسىز مەملەكەت بولىپ كەتكەنىمىزدە  قاليبەك، حامزا كوشى ەۋروپاعا بەت الماي، قازاق ەلىنە قاراي بۇرىلار ما ەدى، قايتەر ەدى؟

– وتكەن عاسىردىڭ باسى 30-40 جىلدار قازاق ءۇشىن اۋىر جىلدار بولدى. قازاق ەلىندەگى قازاقتاردى قولدان جاسالعان اشارشىلىق پەن ستاليندىك قۋعىن-سۇرگىن بوستىرعانىن تاريحتان وقىدىق. ال شىعىس تۇركىستانداعى قازاقتار گومينداڭ-گۋڭسانداڭ (كوممۋنيست) قىتايدان كورمەگەندى كوردى... مەنىڭ اعام تولەۋقان ءىلياسۇلى، سەنىڭ اكەڭ ياعني مەنىڭ ناعاشىم قانەن ءسابيتۇلى اعالارمىز تۋىپ وسكەن تيانشان تاۋى، ەرەنقابىرعا بوكتەرى ول كىسىلەردىڭ كىندىك قانى تامعان تۋعان جەرى ەمەس پە؟ سول جەردى ۇرپاق بولاشاعى ءۇشىن قيىپ تاستاپ كەتىپ وتىر عوي... ول جەردە تاريحتىڭ ءىزى جاتىر، اتالارىمىزدىڭ ەسىمىمەن اتالاتىن ء"سابيت سايى", "قاليبەكتىڭ ءدوڭ جايلاۋى" اعا بۋىن ەمەس، ءبىزدىڭ دە وزەگىمىزدى ورتەيدى، ويىمىزدان ەش كەتپەيدى. تاۋەلسىز قازاق ەلىنە قونىس اۋدارۋ ءۇشىن ءبىر ۇرپاق ءوزىن قۇرباندىققا شالدى دەپ ايتا الامىن. ارينە وتكەن عاسىر باسىندا الاش كوسەمدەرىنىڭ ارمانى ورىندالىپ، قازاق ەلى تاۋەلسىزدىك العاندا، ازاتتىق اڭساعان قاليبەكتىڭ كوشى گيمالاي اسپاس ەدى عوي.

– حاسان ورالتايدىڭ "ەلىم-ايلاپ وتكەن ءومىر" كىتابىن وقىساڭىز، ەركىندىگىنەن ايىرىلىپ، بۇعاۋدا بولعىسى كەلمەگەن قازاق حالقىنىڭ ءبىر بولىگىنىڭ تاكلاماكان ءشولىن كەسىپ ءوتىپ، گيمالاي اسىپ، ۇندىستانعا،  قاندى قىرعىن سوعىسپەن تۇركياعا بارعانى، ودان قاسەكەڭنىڭ "ازاتتىق" راديوسىندا ىستەگەن قايسار ءومىر جولى باياندالادى. قازاق بالاسى قايدا جۇرسەم دە، ۇلتقا قىزمەت ەتپەي قويمايمىن دەگەن ۇلگى سول كىسىلەردە مە دەيمىن؟

– حاسان ورالتاي اعامىزدىڭ “ەلىم-ايلاپ وتكەن ءومىر” ەستەلىگىنىڭ العاشقى باسىلىمى 1999 جىلى ستامبۋلدا باسىلدى. كىتاپتىڭ كىرىسپەسىندە “شىعىس تۇركىستان قازاقتارىنىڭ 1930 جىلدان بەرگى ەلدەگى جانە شەتتەگى قازاقتاردىڭ ۇلت-ازاتتىق كۇرەستەرىنەن كورىنىستەر، سونداي-اق تاكلاماكان شولىندە، گيمالاي تاۋىندا جانە تۇركيا مەن گەرمانيادا ارپالىسپەن وتكەن جىلدار” دەپ اتاپ وتكەندەي بالالىق شاعىنان ازاتتىق، ەركىندىككە ۇمتىلعان قازاق حالقىنىڭ ايانىشتى تاعدىرىن، ناقتى ءوز كوزىمەن كورگەندەرىن ەسكە الا وتىرىپ، “تۋعان ەلىم شىعىس تۇركىستاننىڭ ەرەنقابىرعا تاۋى بوكتەرىندەگى ماناس-ساۋان اۋداندارىنا قاراستى قىزىل وزەن مەن ۇلۋجان جايلاۋى جانە قورقىس پەن ماناس وزەنىنىڭ ەكى جاعىنداعى قالىڭ ەل ىشىندە، كەزىندە تالاي اۋىر كۇندەردە تاعدىرلاس بولعانداردى، سول توپ ىشىنەن ەكشەلە كەلە، تاكلاماكان شولىنەن بىرگە ءوتىپ، گيمالاي تاۋىنان بىرگە اسىپ، ءۇندىستان مەن يراك جانە سيريانى باسىپ، تۇركياعا جەتكەندەردىڭ ءولى-ءتىرىسىن قۇرمەتپەن ەسكە الامىن” دەي كەلە، “قاليبەك حاكىم رايىمبەكۇلى اكەسىنىڭ حاتىن الىپ 1950 جىلى 17 جاسىندا وسپان باتىرعا بارىپ كەزدەسۋىن باياندايدى. سول كەزدەسۋدە “وسپان باتىر يسلامۇلى مەن بيىل 51 جاستامىن” دەگەنىنە وراي ەستەلىگىندە “دۇنيەگە كەلگەنىنە بيىل 100 جىل تولعان مارقۇم وسپان باتىر يسلامۇلىنىڭ ارۋاعى الدىندا قۇرمەتپەن باس يەمىن” دەيدى. بۇل جەردە حاسان ورالتايدى تاعدىر جاسىنان ۇلت-ازاتتىق كۇرەسكەرلىك جولعا سالعانىن كورۋگە بولادى. ازاتتىق راديوسىندا 28 جىل قىزمەت ەتىپ، 1995 جىلى زەينەتكەرلىككە شىققانشا ۇلت ءۇشىن قىزمەت ەتۋدىڭ قۇندىلىعىنىڭ ۇلگىسىن كورسەتتى. حاسان ورالتاي اعامىز ء“بىز شەت ەلدەگى مۇستافا شوقايدىڭ ءىزباسارلارىمىز” دەپ وتىرۋشى ەدى. 2005 جىلى حاسان ورالتاي اعامىزدىڭ 28 جىل ازاتتىق راديوسىندا ىستەگەندە جازعان ماقالالارى، 1986 جىلعى جەلتوقسان شىندىقتارى، ورىس وتارلاۋ ساياساتىن اشكەرە ەتكەن راديو حابارلارى مەن كوپتەگەن قۇندى دەرەكتەرىن قامتىعان 450 توم جەكە مۇراعاتىن اكادەميك رىمعالي نۇرعالي ارقىلى استاناداعى اكادەميالىق كىتاپحاناعا تاپسىرىلدى.

– بارىمىزگە بەلگىلى قاليبەك حاكىم دا، حاسان ورالتاي دا ۇلتىنا، تىلىنە، دىنىنە، يمانىنا ادال بولدى. (اللا باقيىن جايلى ەتسىن! )  قاسەكەڭ قازاق ەلىنە نەگە كوشىپ كەلمەدى  جانە كەيىنگى ۇرپاقتارى جايلى بىرەر ءسوز.

– دۇرىس ايتاسىڭ، حاسان ورالتاي جانە قاليبەك حاكىم اكەلى-بالالى ەكى تۇلعا ۇلتىنا، دىنىنە، دىلىنە ادال بولدى. قازاقتىڭ ەشكىمگە تاۋەلدى بولماي جەكە ەل بولۋىن ارمانداپ سول جولدا كۇرەسپەن وتكەنىن حاسان اعامىزدىڭ “ەلىم-ايلاپ وتكەن ءومىر” ەستەلىگىن وقىعان كوزى قاراقتى وقىرمان تۇسىنەرى داۋسىز. ماسەلەن، قاليبەك حاكىم اتامىزدىڭ 1946 جىلى ساۋان اۋدانى اكىمى بولىپ تۇرعاندا ساۋان اۋدانى قىزىل وزەن وڭىرىندە شىعىس تۇركىستان رەسپۋبليكاسىنىڭ ءبىر جىلدىعىن اتاپ ءوتۋىن جانە ول تويعا تارباعاتاي ايماقتىق باسشىلارىنىڭ جانە ورىس كونسۋلىنىڭ كەلۋى تاريحي ءمانى زور! سول جىلى تۋعان بالالارعا تۇركىستان اتىنىڭ قويىلۋىن تاريحتان ەشكىم وشىرە الماسى انىق. حاسان ورالتاي اعامىزدىڭ ەكى ۇل، ءۇش قىزى بولدى، ەكى قىزى ومىردەن ءوتتى، ۇلكەن قىزى ازاتتىق راديوسىندا وزىمەن بىرگە جۇمىس ىستەدى، ەكى ۇلى گەرمانيادا تۇرادى. سوندا تۋىپ وسكەن بالالارى ءوز قالاۋىمەن ءومىر ءسۇرىپ جاتىر. ال حاسان اعامىزدىڭ ەلگە كوشىپ كەلمەۋىنىڭ سەبەبىن بىلگىڭ كەلسە، 2007 جىلى قازاقستان ۇلتتىق ارناسىنىڭ “قولتاڭبا” باعدارلاماسىنداعى سۇحباتىن قاراساڭىزدار بولادى نەمەسە “حاسان ورالتاي 90 جىل” youtube پلاتفورماسىنان كورۋگە بولادى.

– قاليبەك حاكىمنىڭ 100 جىلدىعىن قاسەكەڭ ءوزى ۇيىمداستىرىپ وتكىزگەنىنەن حاباردارمىز. بيىلعى ءوزىڭىز باس بولىپ تۋىس-تۋعاندارىمەن ۇيىمداستىرعان حاسان ورالتاي اعامىزدىڭ 90 جىلدىعى تۋرالى ايتا كەتسەڭىز.

– 2008 جىلى قاليبەك حاكىم رايىمبەكۇلىنىڭ تۋعانىنا 100 جىلدىعىن قازاق ەلىندە اتاپ ءوتۋ – ءبىر كەزدەردە “قاليبەك باندى”، ۇرپاقتارىن “قاليبەكتىڭ قالدىعى” دەپ اتالىپ كەلگەن ءبىزدىڭ اۋلەت ءۇشىن تاريحي جىل بولدى. باستا قاليبەك اتامىزدىڭ 100 جىلدىعىن اتاپ ءوتۋدى كوتەرگەنىمىزدە حاسان اعامىز سەنە قويمادى. ويتكەنى “1999 جىلى وسپان باتىر يسلامۇلىنىڭ 100 جىلدىعىن اتاپ ءوتۋ تۋرالى ۇسىنىس جاساعان حاسان اعامىز ەدى. دۇنيەجۇزى قازاقتار قاۋىمداستىعىنىڭ باسشىسىنا جازعان ۇسىنىس حاتى اياقسىز قالىپ، وسپان باتىردىڭ 100 جىلدىعى اتالماي قالعانىنا قاتتى رەنجىگەن ەدى. قاليبەك حاكىمنىڭ 100 جىلدىعى دا سولاي توقتاتىپ تاستار ما ەكەن دەگەن كۇدىكپەن بولدى. بىراق قازاققا تەڭدىك سۇراپ ەكى كورشىمىز ورىس پەن قىتايعا باس يمەگەن قاليبەك اتامىزدىڭ 100 جىلدىعىن الماتىدا تويلاۋىمىز ءبىز ءۇشىن ۇلكەن مۇعجيزا ەدى. قاليبەك حاكىمنىڭ تۋعانىنا 100 جىلدىق مەرەيتويىن رەسپۋبليكا دەڭگەيىندە وتۋىنە جانە حالىقارالىق عىلىمي-تەوريالىق كونفەرەنتسيانى جوعارى دەڭگەيدە وتكىزۋگە مۇرىندىق بولعان سول كەزدەگى مادەنيەت جانە اقپارات ءمينيستىرى مۇحتار قۇل-مۇحاممەد بولدى. مەرەيتويدا قاليبەك حاكىمنىڭ كوزىن كورگەن، بۇل كۇندە ومىردەن ءوتىپ كەتكەن مارقۇم زامانداستارى، عالىمدار، قوعام قايراتكەرلەرى، لاۋازىمدى قىزمەت اتقارعان تۇلعالاردىڭ كونفەرەنتسيادا بايانداما جاساپ، شەتەل قازاقتارىنىڭ مارتەبەسىن ءوسىردى. "قاليبەك حاكىم تۋرالى ەستەلىكتەر" اتتى كىتاپ باسىلىپ شىقتى.

ال، بيىل 2023 جىلدىڭ 4-مامىرىندا الماتى قالاسىندا حاسان ورالتاي قاليبەكۇلىنىڭ تۋعانىنا 90 جىل تولۋىنا وراي ش.ءۋاليحانوۆ اتىنداعى تاريح جانە ەتنولوگيا ينستيتۋتىندا “حاسان ورالتاي جانە ەل تاۋەلسىزدىگى ءۇشىن قىزمەت ەتۋدىڭ قۇندىلىعى” اتتى حالىقارالىق عىلىمي-پراكتيكالىق كونفەرەنتسيا بولىپ ءوتتى. كونفەرەنتسيانى ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى ز.ە.قابىلدينوۆ ءوزى اشىپ، جۇرگىزىپ وتىردى. قر بۇرىنعى اقپارات ءمينيسترى دارحان قىدىرالىنىڭ قۇتتىقتاۋ حاتى وقىلدى جانە عالىمدار، تاريحشىلار، جازۋشىلار، قوعام قايراتكەرلەرى بايانداما جاسالدى. حاسان ورالتايدىڭ 28 جىل ازاتتىق راديوسىندا تاۋەلسىزدىككە جەتۋ جولىنداعى ەڭبەكتەرى جوعارى باعالاندى. ازاتتىق راديوسىندا حاسان اعامىزبەن بىرگە جۇمىس ىستەگەن ارداگەر جۋرناليستەر حاسان ورالتاي تۋرالى ەستەلىكتەر ايتتى. ينستيتۋت قىزمەتكەرلەرىنە حاسان ورالتاي اتىنداعى ستيپەنديا بەرىلدى. “حاسان ورالتاي جانە ەل تاۋەلسىزدىگى ءۇشىن قىزمەت ەتۋدىڭ قۇندىلىعى” اتتى كونفەرەنتسيا ماتەريالدارى جانە استاناداعى اكادەميالىق كىتاپحاناداعى حاسان ورالتايدىڭ جەكە قورىنان دايىندالعان “ازاتتىق راديوسىنان سويلەپ تۇرمىز” اتتى ەكى كىتاپتىڭ تۇساۋكەسەرى بولدى. كونفەرەنتسيا سوڭىندا حاسان ورالتايدىڭ رۋحىنا باعىشتالىپ قۇران وقىتىلىپ، اس بەرىلدى. الماتى قالاسى، وجەت ىقشام اۋدانىنان حاسان ورالتايعا بەرىلگەن كوشەنىڭ اشىلۋ ءراسىمى بولدى. استانادان مەرەيتويلىق شارا اياسىندا كەلگەن ق.قۋانىشباەۆ اتىنداعى تەاتردىڭ حاسان ورالتاي مەن حاليفا التايدىڭ ەستەلىگى جەلىسىمەن دايىندالعان “التايدان اۋعان ەل” اتتى گيمالاي اسقان كوش تۋرالى تەاتر قويىلىمى زالداعى كورەرمەنگە ەرەكشە اسەر ەتىپ، زور ىقىلاسقا بولەندى. وسى تۇستا ايتارىم، حاسان ورالتاي اعامىزدىڭ 90 جىلدىق مەرەيتويلىق ءىس-شاراسىنا اتسالىسىپ، كومەكتەسكەن بارشا قاۋىمعا العىسىم شەكسىز! قازاق ەلىنىڭ تاۋەلسىزدىگى باياندى بولسىن! كوك تۋىمىز ماڭگىلىك جەلبىرەي بەرسىن!

– ءابىلباشار اعا، قازىر نەمەن اينالىسىپ ءجۇرسىز؟ بولاشاققا قانداي جوسپارىڭىز بار؟

– جەڭىس باۋىرىم، جوعارىدا ايتىپ وتكەنىمدەي، مەنىڭ اتامەكەن قازاق ەلىنە كەلىپ قونىستانعانىما دا 30 جىلعا جۋىقتاپتى. قازىرگى جاعدايىمىز اللاعا شۇكىر جاقسى. 1995-2000 جىلدار ارالىعىندا تۇركىستانداعى قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى ەكونوميكا فاكۋلتەتىنىڭ حالىقارالىق قاتىناستار ماماندىعى بويىنشا ءبىلىم الىپ شىقتىم. 2000 جىلدان بەرى الماتى وڭىرىندە جەكە كاسىپكەرلىكپەن اينالىسۋدامىن. بولاشاققا جوسپار كوپ قوي... اللا عۇمىر بەرسە، قازاق ەلىنىڭ ەكونوميكاسىنىڭ دامۋىنا ءوز ۇلەسىمدى قوسۋعا جۇمىس ىستەۋدەمىن. كاسىبىمىزدىڭ ءبىر سالاسى جىلىجاي شارۋاشىلىعىن دامىتىپ اۋىل شارۋاشىلىق ونىمدەرىن ءوندىرىپ كورشىلەرگە تاۋەلدىلىكتەن ارىلساق دەگەن نيەتىم بار!

– ويعا العانىڭىز ورىندالسىن، ىسىڭىزگە اللا بەرەكە بەرسىن! سۇحباتىڭىزعا راقمەت!

سۇحباتتاسقان جەڭىس قانەن

Abai.kz