قر پارلامەنتى ءماجىلىسىنىڭ دەپۋتاتى، «رەسپۋبليكا» پارتياسىنىڭ توراعاسى ايداربەك حودجانازاروۆ بيىل پرەزيدەنتتىڭ باستاماسىمەن ەلدەگى اگروونەركاىسىپ سالاسىن دامىتۋعا ەرەكشە كوڭىل بولىنگەنىن ايتتى.

ونىڭ ايتۋىنشا، قاسىم-جومارت كەمەلۇلى جىل وتكەن سايىن اگروونەركاسىپ كەشىنىنىڭ دامۋىنا ەرەكشە باسىمدىق بەرىپ كەلەدى. ماسەلەن، 2024-2026 جىلدارى ارالىعىندا ەلىمىزدە 1,6 ترلن تەڭگەگە 500 جوبا جۇزەگە اسپاق. قازاقستاننىڭ ەۋرازيا اۋماعىندا اتالمىش سالا بويىنشا جەتەكشى ەلدەردىڭ قاتارىنا قوسىلۋى ءۇشىن وسىناۋ ستراتەگيالىق تاپسىرمانى تولىق دەڭگەيدە جۇزەگە اسىرۋى وتە ماڭىزدى. بۇل راسىمەن دە وتە ۇلكەن جۇمىس.

«ارينە، مۇنىڭ ءبارى دە ەڭ ءبىرىنشى كەزەكتە ەلىمىزدىڭ الەۋمەتتىك ستاتۋسىن جاقسارتۋعا، اتاپ ايتقاندا ازىق-تۇلىك قاۋىپسىزدىگىن جاڭا دەڭگەيگە كوتەرۋ ءۇشىن جاڭا قارقىن بەرمەك. ءبىز اۋىلشارۋاشىلىعى تۋرالى ايتقان كەزدە، عىلىم ءىسى كوپ ۇمىت قالىپ ءجۇر. ال عىلىم دامىماي، ءبارى بەكەر. مەملەكەت باسشىسى وسى باعىتتاعى جۇمىستارعا دا ەرەكشە كوڭىل بولىنەتىنىن بىرنەشە رەت ايتتى. جوعارعى وقۋ ورىندارىندا، كوللەدجدەردە اۋىلشارۋاشىلىعى باعىتىنداعى ماماندىقتارعا باسىمدىق بەرىلەدى. ول دەگەنىڭىز جاڭا تەحنولوگيا، جاڭا تاجىريبە، حالىقارالىق ورتالىقتار. مۇنىڭ ءبارى دە ءبىزدىڭ ستۋدەنتتەر ءۇشىن قولجەتىمدى دۇنيەگە اينالادى»، – دەيدى دەپۋتات.

تاعى ءبىر ماڭىزدى ماسەلە – مەملەكەت بۇعان دەيىن اۋىلشارۋاشىلىق ونىمدەرىن ءوندىرۋ ىسىندە ءىرى كومپانيالارعا كوپ كوڭىل ءبولىپ كەلگەن. ەندى بۇل ساياسات تا تۇبەگەيلى وزگەرىپ، شاعىن شارۋا قوجالىقتارىنىڭ دامۋى استانانىڭ باقىلاۋىندا بولماق.

«بۇل ءبىزدىڭ اۋىلدارداعى كاسىپپەن نانىن تاۋىپ وتىرعان ميلليونداعان تۇرعىن ءۇشىن اسا ماڭىزدى قادام. قالالىقتار تۇسىنە بەرمەۋى مۇمكىن، الايدا ماڭداي تەرىن بارىنەن جوعارى قوياتىن، كەرەك بولسا ۇكىمەتتەن ەشتەڭە سۇراماي كەلگەن ازاماتتارعا ەندى جاڭا مۇمكىندىكتەر ەسىگى اشىلادى. ەندىگى كەزەكتە وسىنىڭ ءبارىن ۋاقىت ەنشىسىنە تاپسىرامىز. ارينە، وسى باعىتتاعى جۇمىستاردىڭ ءساتتى جۇزەگە اسۋى ءۇشىن ءوز ۇلەسىمىزدى دە قوسامىز»، – دەدى ايداربەك حودجانازاروۆ.

دەپۋتات سونداي-اق بيىل مەملەكەتتىڭ شارۋالار قاۋىمىنا جاساعان جاقسىلىعى تۋرالى از-كەم ايتىپ ءوتتى.

«بيىل اگروونەركاسىپ سالاسى اۋىر كەزەڭگە توتەپ بەردى. سالماق ءبىزدىڭ شارۋالار قاۋىمىنا ءتۇستى. سۋدىڭ تاپشىلىعى، اۋا-رايىنداعى وزگەرىستەر دە كوپ ىسىمىزگە كەدەرگى كەلتىردى. “بايتەرەك” حولدينگى ارقىلى ەڭبەك ادامدارىنىڭ نەسيەلەرى مەن قارىزدارىن قايتارۋدىڭ مەرزىمى كەزەكتى رەت العا جىلجىتىلدى. قازىر قاراپ وتىرسام، وسى جەڭىلدىككە مىڭنان استام تاۋار ءوندىرۋىشىنىڭ قولى جەتكەن ەكەن. جاقسى ناتيجە. شارۋالاردى سۋبسيديامەن قامتاماسىز ەتۋ ءۇشىن تاعى 90 ملرد تەڭگە قارجى ءبولىندى. بۇل ەندى تىكەلەي پارلامەنت ءماجىلىسىنىڭ دەپۋتاتتارىنىڭ باستاماسىمەن اياقتالعان جۇمىس»، – دەدى ول.

پرەزيدەنتىمىزدىڭ تاپسىرماسى اياسىندا ازىق-تۇلىك كورپوراتسياسى ارقىلى شارۋالاردىڭ ءونىمىن ساتىپ الۋعا قاتىستى قانشاما وڭ قادامدار جاسالعان. ماسەلەن تىكەلەي بيدايدى ساتىپ الۋعا 31,3 ملرد تەڭگە باعىتتالعان. مۇنىڭ بارلىعى دا ءبىزدىڭ ازاماتتاردىڭ 2024 جىلعى ەگىستىك ناۋقانىنا دايىن بولۋى ءۇشىن قولعا الىنعان باستامالار، دەدى ول.

فوتو: اشىق دەرەككوزدەن