پرەزيدەنت قازاقستان مەن قىتايدىڭ قارىم-قاتىناسىنا جوعارى باعا بەردى.

"بۇگىندە قازاقستان مەن قىتايدىڭ قارىم-قاتىناسى دوستىق، تاتۋ كورشىلىك جانە ماڭگىلىك ستراتەگيالىق سەرىكتەستىك رۋحىندا قارقىندى دامىپ كەلەدى. ءبىز توراعا سي تسزينپينمەن بىرگە قازاقستان مەن قىتاي اراسىنداعى ىنتىماقتاستىقتىڭ جاڭا "التىن وتىز جىلدىعىنا" قادام باستىق. مەن بىلتىر قىتايعا ءبىر ەمەس، ەكى مارتە ساپارمەن باردىم. بۇل – ەلدەرىمىز اراسىنداعى تىعىز ىقپالداستىقتىڭ ايقىن دالەلى.

قىتايمەن ورتاق شەكارامىزدىڭ بولۋى، شىعىس پەن باتىستىڭ اراسىنداعى ۇتىمدى جەردە تۇرعانىمىز قىتاي تاۋارلارىن ءتۇرلى باعىتقا قازاقستان اۋماعى ارقىلى تاسىمالداۋعا زور مۇمكىندىك بەرەدى. ويتكەنى بەيجىڭدە جوعارى دەڭگەيدە وتكەن ء"بىر بەلدەۋ، ءبىر جول" اتتى ءۇشىنشى فورۋم اياسىندا بىرقاتار ماڭىزدى قۇجاتقا قول قويىلدى. سونىڭ ىشىنەن ترانسكاسپي حالىقارالىق كولىك ءدالىزىن بىرلەسە دامىتۋ جونىندەگى كەلىسىمدى جانە "اياگوز – تاچەن" باعىتىنداعى تەمىر جول قۇرىلىسى تۋرالى مەموراندۋمدى اتاپ وتۋگە بولادى. بۇل كەلىسىمدەر ەلىمىزدىڭ كولىك-لوگيستيكا سالاسىنا تىڭ سەرپىن بەرەتىنىنە سەنىمدىمىن. قازاقستان قىتايدىڭ ء"بىر بەلدەۋ، ءبىر جول" مەگاجوباسىن تولىعىمەن قولدايدى. بىلتىر قازان ايىندا بەيجىڭدە وتكەن فورۋمدا سويلەگەن ءسوزىم – وسىنىڭ تاعى ءبىر دالەلى.

قازاقستان مەن قىتاي اراسىندا ۆيزاسىز ءجۇرۋ رەجىمى كۇشىنە ەندى. مۇنىڭ ءمانى زور. ەندى وتانداستارىمىز كورشى ەلگە ەمىن-ەركىن بارىپ، كەلە الادى. ازاماتتارىمىز وسى مۇمكىندىكتى وڭتايلى پايدالانادى دەپ ۇمىتتەنەمىن.

ەلىمىزدە قىتايعا قاتىستى باياعى قاساڭ تۇسىنىكتەرگە نەگىزدەلگەن نەمەسە بىزگە سىرتتان تاڭىلعان ءجونسىز ۇرەي بولماۋعا ءتيىس. قازىرگى قىتاي – وتە جوعارى دامىعان، سونىڭ ىشىندە وزىق تەحنولوگيا سالاسىندا زور تابىسقا جەتكەن مەملەكەت. مۇنى بۇكىل الەم مويىنداپ وتىر. سوندىقتان شىعىستاعى كورشىمىزبەن ىنتىماقتا بولۋ، دوستىق قارىم-قاتىناس پەن ءوزارا سەنىمنىڭ ارتىقشىلىقتارىن ءتيىمدى پايدالانۋ قازاقستان ءۇشىن اسا ماڭىزدى",-دەدى توقاەۆ.

فوتو: اشىق دەرەككوزدەن

Abai.kz