بۇگىننەن باستاپ «ادىلدىك جولى» رقب ەلىمىزدىڭ بارلىق وڭىرلەرىندە زاڭ بۇزۋشىلىقتاردى الدىن الىپ، قازاقستاندىقتاردىڭ قۇقىقتىق ساۋاتتىلىعىن ارتتىرۋ ماقساتىندا «زاڭ ۇستەمدىگى» جوباسىن ىسكە قوستى.

جوبانىڭ نەگىزگى ماقساتى – قوعامدا سىبايلاس جەمقورلىقتىڭ بارلىق كورىنىستەرىنە توزبەۋشىلىك ورتاسىن قالىپتاستىرۋ جانە دە وسى پروتسەسسكە ەل ازاماتتارىن جاپپاي تارتۋ.

بۇل جوبا مەملەكەت باسشىسى اتاپ وتكەن «ادال ازامات» تۇجىرىمداماسىن جۇزەگە اسىرۋ مەن قوعامداعى زاڭ جانە قۇقىقتىق ءتارتىپ ۇستەمدىگىن قالىپتاستىرۋداعى ناقتى قادامداردىڭ ءبىرى بولماق.

«ءبىز قۇقىق بۇزۋشىلىق جاساۋ، پارا بەرۋ نەمەسە السىزگە قولىن كوتەرۋ تۋرالى ويدىڭ ءوزىن ايىپتايتىن قوعامعا اينالۋىمىز كەرەك.

بۇل قيىن جۇمىس، بىراق بۇل جولدى ەڭسەرۋىمىز قاجەت.  «ادىلدىك جولى» كومانداسى 2 جىل بويى بەلسەندى جۇمىس ىستەپ، قوعامدا قۇقىقتىق ساۋاتتىلىق بويىنشا ولقىلىقتار بار ەكەنىنە كوز جەتكىزدى. وسى ۋاقىت ارالىعىندا adildik.kz سايتى مەن 1463 بايلانىس ورتالىعىنا تۇسكەن 8 مىڭعا جۋىق ازاماتتىڭ ءوتىنىشىن قاراستىرا كەلە، حالىقتىڭ زاڭ مەن ەرەجە تۋرالى بىلىمدەرىن ارتتىرۋ ارقىلى كوپ ماسەلەلەردى قىلمىسقا اپارماي شەشۋگە بولاتىنىنا سەنىمدىمىز»، - دەپ اتاپ ءوتتى «ادىلدىك جولى» رقب اتقارۋشى ديرەكتورى ديدار سماعۇلوۆ.

اتاپ ايتقاندا، «ادىلدىك جولى» بىرلەستىگىنىڭ جۇمىسىنىڭ ارقاسىندا 1206 تۇلعا ءتۇرلى زاڭ بۇزۋشىلىقتارى ءۇشىن اكىمشىلىك جاۋاپكەرشىلىككە تارتىلىپ، ايىپپۇل تولەپ، 800 ملن. تەڭگەدەن استام قاراجات بيۋدجەتكە قايتارىلىپ، 76 قىلمىستىق ءىس قوزعالعان.

«زاڭ ۇستەمدىگى» جوباسىنا قر كەز كەلگەن ازاماتى قاتىسا الادى. ءاربىر تۇرعىن سىبايلاس جەمقورلىق فاكتىلەرى  (كەز كەلگەن سالاداعى)  مەن باسقا دا ماسەلەلەرىن 1463 Call-ورتالىعى نەمەسە Adildik.kz سايتى ارقىلى حابارلاپ، ءوز ساۋالدارى بويىنشا قۇقىقتىق كەڭەستەر مەن كومەك الا الادى.

«ەلىمىزدىڭ بولاشاعىنا بەي-جاي قارامايتىن بارلىق ازاماتتاردى سىبايلاس جەمقورلىققا قارسى كۇرەسكە بەلسەندى اتسالىسۋعا شاقىرامىز. ادىلەتتى قازاقستاندى بىزگە ەشكىم دايىن كۇيدە الاقانىمىزعا سالىپ بەرمەيدى: ونى ءوزىمىز قۇرامىز!» – دەدى ديدار سماعۇلوۆ.

انىقتاما ءۇشىن: «ادىلدىك جولى» رقب 2020 جىلدىڭ قاراشاسىندا قۇرىلعان. مەملەكەتتىك ساتىپ الۋ مونيتورينگى اياسىندا 15,1 ملرد. تەڭگەگە باعانى كوتەرۋ جانە زاڭنامانى بۇزۋ بويىنشا 1000-عا جۋىق فاكتىلەر انىقتالعان. وسى جانە وزگە دە فاكتىلەر بويىنشا 300-دەن استام مەملەكەتتىك ورگان باسشىلارى مەن باسقا دا تۇلعالارعا جالپى سوماسى 264 ميلليون تەڭگە ايىپپۇل سالىندى. زاڭدى تۇلعالاردى قوسقاندا 626 تۇلعا تارتىپتىك جاۋاپكەرشىلىككە تارتىلىپ، ۇيعارىم شىعارىلدى. قۇقىقتىق كەڭەس بەرۋ جانە سىبايلاس جەمقورلىق فاكتىلەرىن انىقتاۋ ماقساتىندا 900-دەن استام اۋىلعا ساپارلار ۇيىمداستىرىلدى.

Abai.kz