سولتۇستىك قازاقستان وبلىسى مامليۋت اۋدانى مەڭگەسەر اۋىلىنداعى تۇرعىن ۇيدە 5 ليترلىك گاز باللونى جارىلىپ، بەس ادامدى كۇيىك شالدى.

سقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە، وقىس وقيعا 4 قاڭتار كۇنى ساعات 15.00 شاماسىندا بولعان. مامليۋتكا قالاسىنداعى №15 ءورت ءسوندىرۋ بولىمىنە حابار تۇسىسىمەن وقيعا ورنىنا ءورت سوندىرۋشىلەر، قۇتقارۋشىلار، پوليتسيا جانە جەرگىلىكتى اتقارۋشى ورگان وكىلدەرى جەتتى.

گاز باللوننىڭ جارىلۋىنان ءۇيدىڭ توبەسى جارتىلاي قۇلاپ، قابىرعالارى زاقىمدانعان.

جارىلىس كەزىندە ۇيدە بولعان بەس ادام: 1970, 1979, 1977 جىلى تۋعان ەر ادامدار جانە 1966 جىلعى ايەل، 2007 جىلعى قىز ءتۇرلى كۇيىكپەن اۋرۋحاناعا جەتكىزىلدى.

ەستەرىڭىزگە سالا كەتەيىك، وسىدان ءبىر اي بۇرىن اققايىڭ اۋدانى سميرنوۆو ەلدى مەكەنىندەگى ەكى قاباتتى تۇرعىن ۇيدە دە گاز باللونى جارىلىپ، 12 جاسار قىز مەرت بولدى، ونىڭ 22 جاستاعى اعاسى اۋىر جاراقاتپەن اۋرۋحاناعا جەتكىزىلدى.

ال جالپى سوڭعى ءۇش جىلدا سقو-دا قولدانىستاعى 30 گاز باللونى جارىلعان.

Abai.kz