جامبىل وبلىسىنداعى “تازا-تالاس” مەكەمەسىنە جۇرگىزىلگەن تەكسەرىس بارىسىندا ءتورت مەملەكەتتىك كولىكتىڭ جىمقىرىلىپ، مەنشىككە ءوتىپ كەتكەنى انىقتالدى. قولدان-قولعا وتكەن كولىكتەر 22 ملن تەڭگەگە باعالانىپ، ساتىلىپ كەتكەن. پايداسىن كاسىپورىن باسشىلارى كورگەن.

قىزمەتتىك كولىكتى جەكەگە اۋدارىپ العانداردى پروكۋرورلار انىقتاعان.

ءتورت بىردەي قۇجات ارقىلى جارامسىز دەپ تانىلعان كولىكتەردىڭ ۇشەۋى مەملەكەتكە قايتارىلدى. قازىرگى تاڭدا ءتورتىنشى كولىك ىزدەستىرىلۋدە.

ەكى جىل بويى قىزمەتتىك كولىكتىڭ قىزىعىن جەكە ادامدار كورگەن. قارجىسىن كاسىپورىن باسشىلارى ءبولىپ العان. قازىر ولارعا قاتىستى قىلمىستىق ءىس قوزعالدى.

"جالپى ايتاتىن بولساق، كاسىپورىننىڭ ديرەكتورى مەن ورىنباسارى جالعان قۇجاتتاردىڭ نەگىزىندە اۆتوكولىكتەردىڭ تەحنيكالىق جاعدايى جارامسىز، قولدانۋعا جاتپايدى دەگەن نەگىزدەرمەن جالعان قۇجاتتار ازىرلەپ، ءىس جۇزىندە جارامدى پايدالانۋعا بولاتىن اۆتوكولىكتەردى كاسىپورىننىڭ تەڭگەرىمىنەن شىعارىپ، ولاردى اۋكتسيونعا ساتۋدىڭ ورنىنا تىكەلەي وزدەرى جەكە تۇلعالارعا ساتىپ پايدا تاپقان", – دەدى جامبىل وبلىسى پروكۋراتۋراسى سوتقا دەيىنگى تەرگەپ-تەرگەۋ باسقارماسىنىڭ باستىعى اقبەرەن مۇلكەمانوۆ.

فوتو: اشىق دەرەككوزدەن

Abai.kz