ەلىمىزدە ادام دەنساۋلىعىنا قاساقانا جەڭىل زيان كەلتىرۋدى جانە ۇرىپ-سوعۋدى قىلمىستىق جاۋاپكەرشىلىككە تارتۋ جوسپارلانىپ وتىر. بۇل تۋرالى ءىىم اكىمشىلىك پوليتسيا كوميتەتى توراعاسىنىڭ ورىنباسارى رەنات زۇلحايىروۆ ءمالىم ەتتى.

«2023 جىلعى 8 جەلتوقساندا قر پرەزيدەنتىنىڭ جارلىعىمەن (№ 409) بەكىتىلگەن «ادام قۇقىقتارى جانە زاڭ ۇستەمدىگى سالاسىنداعى ءىس-قيمىل» جوسپارى بەكىتىلدى. سونىڭ نەگىزىندە بالا قۇقىقتارى جونىندەگى ۋاكىل دينارا زاكيەۆا جانە پارلامەنت ءماجىلىسىنىڭ دەپۋتاتتارىمەن بىرلەسىپ ايەلدەر مەن بالالاردىڭ قۇقىقتارىن قورعاۋ، سونداي-اق وتباسىلىق قۇندىلىقتاردى ىلگەرىلەتۋ جونىندەگى شارالاردى كۇشەيتۋ جونىندە زاڭنامالىق تۇزەتۋلەر ازىرلەندى»، — دەدى رەنات زۇلحايىروۆ ءىىم-دە وتكەن ءباسپاسوز ءماسليحاتىندا.

ونىڭ ايتۋىنشا، تۇزەتۋلەرگە سايكەس دەنساۋلىققا قاساقانا جەڭىل زيان كەلتىرۋدى جانە ۇرىپ-سوعۋدى قىلمىستىق جاۋاپكەرشىلىككە تارتۋ جوسپارلانىپ وتىر.

«قۇقىق بۇزۋشىنىڭ مىنەز-قۇلقىنا، ءوز-ءوزىن ۇستاۋىنا تالاپتار قويىلىپ، قاجەت جاعدايدا الەۋمەتتىك بەيىمدەلۋ ورتالىقتارىنا جىبەرۋ قاراستىرىلىپ جاتىر. سونداي-اق كۇش كورسەتۋشىنىڭ پسيحوكوررەكتسيالىق كۋرستاردان ءوتۋى قاراستىرىلعان. جوعارىدا اتالعان تالاپتار قىلمىستىق كودەكس شەڭبەرىندە بەلگىلەنەدى»، — دەيدى مينيسترلىك وكىلى.

فوتو: اشىق دەرەككوزدەن

Abai.kz