ءماجىلىس توراعاسى ەرلان قوشانوۆ باستاعان دەپۋتاتتار توبى ۇلىتاۋ وبلىسىنا باردى. ولار وبلىس اكتيۆىمەن، ءوندىرىس ورىندارىنىڭ جۇمىسشىلارىمەن كەزدەسىپ، جەزقازعان جىلۋ ەلەكتر ورتالىعىنىڭ جۇمىسىمەن تانىستى جانە «اننەنسكايا» كەنىشىنىنە ءتۇستى.

ءماجىلىس سپيكەرىنىڭ ساپارى وبلىس اكتيۆىمەن – ارداگەرلەر كەڭەسىنىڭ مۇشەلەرىمەن، وبلىستىق ءماسليحات دەپۋتاتتارىمەن جانە جۇرتشىلىقپەن كەزدەسۋدەن باستالدى.

ەرلان قوشانوۆ ۇلىتاۋلىقتارمەن كەزدەسۋدە مەملەكەت باسشىسى قاسىم-جومارت توقاەۆتىڭ «ءبىز وزىق ەل رەتىندە تەك العا عانا قاراۋىمىز كەرەك» دەگەن جۋىردا عانا بەرگەن سۇحباتىنداعى نەگىزگى باسىمدىقتارعا نازار اۋداردى.

ءماجىلىس توراعاسىنىڭ ايتۋىنشا، وتكەن جىل ەلىمىز ءۇشىن ەلەۋلى، ماڭىزدى وقيعالارعا تولى جىل بولدى. مەملەكەت باسشىسىنىڭ كەشەندى رەفورمالارى جالعاسىپ، جاڭا ەكونوميكالىق ساياساتتى جۇزەگە اسىرۋ باستالدى. ەرلان قوشانوۆ مەملەكەتتەگى بارلىق دەڭگەيدەگى ينستيتۋتسيونالدىق وزگەرىستەر تۋرالى ايتىپ، ەلىمىزدىڭ جەتىستىكتەرى مەن جاقىن بولاشاققا ارنالعان جوسپارلارىنا كەڭىنەن توقتالدى. ول الەمدەگى كۇردەلى احۋالعا قاراماستان، ەكونوميكانىڭ دامۋى 4,9 پايىز دەڭگەيىندە قامتاماسىز ەتىلىپ، شەتەلدەن اۋقىمدى ينۆەستيتسيا تارتىلعانىن اتاپ ءوتتى.

– بىرنەشە كۇن بۇرىن بۇرىن پرەزيدەنت قابىلداۋىندا بولدىم. مەملەكەت باسشىسى وڭىرلەردىڭ دامۋىنا باسا ءمان بەرىپ وتىر. پرەزيدەنتتىڭ شەشىمىمەن قايتا جاڭعىرعان ۇلىتاۋدىڭ ءوڭىر ءۇشىن عانا ەمەس، ۇلتىمىز ءۇشىن دە ورنى بولەك. وسىعان وراي پرەزيدەنت وبلىس باسشىلىعىنا وڭىردە بىرقاتار الەۋمەتتىك-مادەني نىساندار مەن جاڭا تۇرعىن ۇيلەر سالۋ تۋرالى تاپسىرما بەردى.

ونى ورىنداۋ – ءبارىمىز ءۇشىن باستى مىندەت. دەپۋتاتتار بۇل جۇمىستى قاداعالاپ، بارلىق جوسپارلانعان جوبالاردىڭ جۇزەگە اسۋىنا جان-جاقتى ىقپال ەتەتىن بولادى، – دەدى ءماجىلىس توراعاسى.

ەرلان قوشانوۆ بۇگىندە ۇلىتاۋ وبلىسى ءوز الدىنا وتاۋ تىككەن دەربەس، ەكونوميكالىق، الەۋمەتتىك، مادەني دامۋ الەۋەتى زور ءوڭىر ەكەنىن ايتتى. وبلىسقا تارتىلعان ينۆەستيتسيا اۋقىمى 171,2 ملرد تەڭگەگە جەتىپ، وتكەن جىلمەن سالىستىرعاندا 45 ملرد-قا وسكەن. قۇرىلىس جۇمىستارىنىڭ كولەمى 85,6 ملرد تەڭگەنى قۇراسا، پايدالانۋعا بەرىلگەن تۇرعىن ءۇي نىساندارى 67 مىڭ شارشى مەتردى قۇرايدى.

سونداي-اق ءماجىلىس سپيكەرى 2022 جىلى پرەزيدەنتتىڭ باستاماسىمەن ەلىمىزدەگى العاشقى ۇلتتىق قۇرىلتاي وتىرىسى دا ۇلت ۇياسى – ۇلىتاۋدا وتكەنىنە نازار اۋداردى.

– ۇلىتاۋ ءوڭىرىنىڭ تاريحي جانە رۋحاني ورنى بولەك. التىن وردانىڭ نەگىزىن قالاعان جوشى حان دا وسىندا جەرلەنگەن. ەل پرەزيدەنتى كەشەگى سۇحباتىندا بيىل جوشى ۇلىسىنىڭ 800 جىلدىعى اتاپ وتىلەتىنىن ارنايى توقتالدى. بۇل – ءوڭىر ءۇشىن عانا ەمەس، قازاق مەملەكەتتىلىگىنىڭ تەرەڭ تاريحىن زەردەلەۋ ءۇشىن دە ماڭىزى زور ءىس-شارا، – دەدى ەرلان قوشانوۆ.

ودان ءارى دەپۋتاتتار جەزقازعان جىلۋ ەلەكتر ورتالىعىندا جىلۋ بەرۋ ماۋسىمىنىڭ بارىسى مەن كاسىپورىندى جاڭعىرتۋ جۇمىستارى تۋرالى ەسەپتەردى تىڭدادى. سونىمەن قاتار جىلۋ ەلەكتر ورتالىعى قىزمەتكەرلەرىنە جىلۋ جانە ەنەرگەتيكا تۋرالى جاڭا زاڭ جوباسى بويىنشا جۇرگىزىلىپ جاتقان جۇمىستاردى ايتىپ، سۇراقتارعا جاۋاپ بەردى، ەنەرگەتيكتەردىڭ ۇسىنىستارىن تىڭدادى.

ساپار بارىسىندا دەپۋتاتتار جەزقازعان بايىتۋ كومبيناتىندا بولىپ، ساتباەۆ قالاسىنداعى «اننەنسكايا» كەنىشىنە ءتۇستى.

ەرلان قوشانوۆ كاسىپورىن قىزمەتكەرلەرىمەن كەزدەسۋدە مەملەكەت باسشىسىنىڭ وزەكتى ماسەلەلەردى شەشۋ جونىندەگى تاپسىرمالارىن جۇزەگە اسىرۋعا باعىتتالعان زاڭنامالىق باستامالارعا توقتالدى. اتاپ ايتقاندا، زياندى ەڭبەك جاعدايىندا جۇمىس ىستەيتىن ازاماتتار ءۇشىن ارنايى تولەم ەنگىزۋ جانە وندىرىستەگى ەڭبەك قاۋىپسىزدىگىن كۇشەيتۋ جونىندەگى تۇزەتۋلەر تۋرالى ايتىپ بەردى. دەپۋتاتتار جۇمىسشىلارمەن جانە كەنشىلەرمەن مەملەكەت تاراپىنان ولاردىڭ الەۋمەتتىك قولداۋىن جاقسارتۋ تۋرالى ماسەلەلەردى تالقىلادى.

دەپۋتاتتاردىڭ وڭىرلەرگە ساپارى وسى جىلدىڭ 12 قاڭتارىنا دەيىن جالعاسادى.

فوتو: ج.جۇمابەكوۆ

Abai.kz