قوعامدا قارا قىلدى قاق جارعان ءادىل سوت بولماسا، حالىقتىڭ سەنىمىنە ۇلكەن سەلكەۋ تۇسەدى. مىنا ءبىر كۇماندى جاعداي مەنى تەرەڭ ويعا باتىرىپ وتىر. جاقىندا الەمجەلىدەن كوردىم: قىزىلجاردا ستاتيستيكا باسقارماسىندا جۇمىس ىستەيتىن جاس جىگىت وتباسىمەن پاتەردە تۇراتىن كورىنەدى. پاتەر اقىسىن ۋاقىتىندا تولەمەگەن سوڭ، ونىڭ يەسى مازالاي بەرسە كەرەك. سوعان توزبەگەن 28 جاستاعى جىگىت الدىن الا پىشاعىن دايىنداپ، الگى قاريانى كۇتىپ وتىرعان. ول كەلگەن بويدا، ءاي-شايعا قاراماستان پىشاقتى وڭدى-سولدى سالعان، ول قايىرىلىپ قالعان سوڭ، ەكىنشىسىن العان. ول دا سىنعان سوڭ، تەپكىنىڭ استىنا الىپ، اقىرى قاريانى ورتەپ جىبەرگەن.

سونىمەن سوت بولدى. جازىقسىز جاندى قاتىگەزدىكپەن ولتىرگەن ادامعا پروكۋراتۋرا 17 جىل سۇرايدى، ال بىزدەگى اسا گۋماندى سوت ونى نەبارى 11 جىلعا باس بوستاندىعىنان ايىرادى.

ەندى وقىرماندارعا ءبىر سۇراق؟ ەشكىمگە زالالى جوق قاريانى اسقان قاتىگەزدىكپەن ولتىرگەن ادامعا اسقان جاناشىرلىقپەن قاراعان سوتىمىز، ءوزىنىڭ جاپ-جاس جارىن ايۋاندىقپەن ءولتىردى دەگەن كۇدىككە ىلىنگەن بيشىمباەۆقا قانداي ۇكىم شىعارار ەكەن؟

قانشا دەگەنمەن ونىڭ انا جىگىتتەي ەمەس، «اشۋ ۇستىندە بايقاماي، قولىم قاتتى ءتيىپ كەتىپ ەدى» دەگەننەن تاپجىلماسا شە؟

ايىرماشىلىق بار ما، جوق پا؟ سوتقا قوسىمشا دالەل بولىپ قالماي ما؟ ونىڭ اياعى جۇمساق ۇكىمگە اكەلىپ سوقتىرماي ما؟ بيشىمباەۆتار وسال ادامدار ەمەس قوي، قايداعى ءبىر ستاتيستپەن سالىستىراتىن.

ورتاعا سالاتىن ءبىر كۇدىگىم وسى ەدى.

جايبەرگەن بولاتوۆ

Abai.kz