كۇدىكتىنىڭ ۇستىنەن جازعان ارىزدى سول كۇدىكتىنىڭ وزىنە تەكسەرتۋ
قازاقستان رەسپۋبليكاسىنىڭ
باس پروكۋرورى ب.ن. اسىلوۆقا!
قۇرمەتتى بەرىك نوعايۇلى!
مەنىڭ 2023 جىلعى 19 ساۋىردەن كەيىن قازاقستانعا كوشىپ كەلگەن ەتنيكالىق قازاقتارعا «قانداس» مارتەبەسىنىڭ ەڭبەك جانە حالىقتى الەۋمەتتىك قورعاۋ مينيسترلىگى تاراپىنان زاڭسىز بەرىلىپ جاتقانى جايلى جانە ونىڭ استارىندا جەمقورلىق ارەكەتى بولۋى مۇمكىن، سونى پروكۋراتۋرا جاعىنان تەسەرۋ تۋرالى ءسىزدىڭ اتىڭىزعا جازعان ەكى ارىزىمدى دا (جت-2023-02715087 جانە جت-2023-02744307) توكتامىسوۆ اديلەت جالگاسوۆيچ (باسقارماسىنىڭ باستىعى - الەۋمەتتىك سالاداعى زاڭدىلىقتى قاداعالاۋ باسقارماسى) ەڭبەك جانە حالىقتى الەۋمەتتىك قورعاۋ مينيسترلىگىنىڭ وزىنە باعىتتاپ جىبەرگەن بولاتىن.
مەن كۇدىكتىنىڭ ۇستىنەن جازعان ارىزدى سول كۇدىكتىنىڭ وزىنە جىبەرىپ تەكسەركەن پروكۋراتۋرانى ءبىرىنشى رەت كورىپ، تاڭ قالىپ وتىرمىن.
الەمدە وسىنداي پروكۋراتۋراسى بار مەملەكەت بار ما، جوق پا، ونى كەيىن انىقتاي جاتارمىن.
ءاي، جوق شىعار...
ارينە، اديلەت توكتامىسوۆتىڭ بەلگىلى ءبىر زاڭعا سۇيەنىپ، وسىلاي ىستەپ وتىرعانى بەلگىلى.
بىراق، وسىنداي زاڭدى قوس قولداپ قابىلداپ بەرگەن باياعى ءبىزدىڭ قوس پالاتالى پارلامەنت قوي.
قۇداي-اۋ، ەندى كۇدىكتىنىڭ ۇستىنەن جازىلعان ارىزدى سول كۇدىكتىنىڭ وزىنە جىبەرىپ، وزىنە تەكسەرتكەن پروكۋراتۋرانىڭ مىنا سوراقىلىعىن ەستىگەن ەل ءبىر جەرىن اشىپ كۇلەتىن بولدى عوي...
بۇل — نە سۇمدىق! ماسقارا ەمەس پە؟!
بۇگىن سول ارىزىما ەڭبەك جانە حالىقتى الەۋمەتتىك قورعاۋ مينيسترلىگىنىڭ ءبىرىنشى ۆيتسە-ءمينيسترى ا. سارباسوۆتان جاۋاپ كەلدى.
قىزىق بولعاندا، ءبىرىنشى ۆيتسە-مينيستر ا. سارباسوۆ جاۋابىندا ماعان كوشى-قون ۇردىسىنە قاتىستى قولدانىستاعى زاڭدار مەن نورماتيۆتىك قۇجاتتاردى جانە 2022 جىلى مەن 2023 جىلى شەتەلدەن قازاقستانعا قانشا ەتنيكالىق قازاق كوشىپ كەلگەنىن ينە-جىبىنە دەيىن بايانداپ كەلىپ، «سونداي-اق، قانداستاردى قابىلداۋدىڭ جاڭا مەحانيزمى ەنگىزگەنگە دەيىن ەلىمىزگە 15 مىڭ قانداس كەلگەن، ال جاڭا مەحانيزممەن كەلگەندەردىڭ سانى 5 948 ادام. ءوز كەزەگىندە 5 948 قانداستىڭ 2 869-ى سولتۇستىك وڭىرلەرگە قونىستانعان، 7-ءۋى اگلومەراتسيا ايماقتارىنا قونىستاندى، 3 047 وتباسىمەن بىرىگۋ ماقساتىندا كەلگەن جانە 25-ءى جۇمىسقا ورنالاسۋ ماقساتىندا قانداس مارتەبەسىن العان...»، - دەپتى.
ال، مەنىڭ باس پروكۋراتۋرادان تەكسەرۋدى تالاپ ەتكەنىم قانداستاردى قابىلداۋدىڭ جاڭا مەحانيزمى ەنگىزگەنگە دەيىنگى بەرىلگەن «قانداس» مارتەبەسى ەمەس، كەرىسىنشە قانداستاردى قابىلداۋدىڭ جاڭا مەحانيزمى ەنگىزگەنگەننەن كەيىن بەرىلگەن «قانداس» مارتەبەسىنىڭ قالاي بەرىلىپ جاتقانى بولاتىن.
ناقتىلاپ ايتسام، قولدانىستاعى «حالىقتىڭ كوشى-قونى تۋرالى» زاڭىنىڭ اتالعان 20-بابىنىڭ 5) تارماعى ەنگىزىلگەن 2023 جىلدىڭ 19 ساۋىرىنەن كەيىن قازاقستانعا كوشىپ كەلگەن ەتنيكالىق قازاقتارعا بەرىلىپ جاتقان «قانداس» مارتەبەسىنىڭ نە ءۇشىن جانە قالاي بەرىلىپ جاتقانىن تەكسەرۋدى وتىنگەم.
كوردىڭىز بە، ەڭبەك جانە حالىقتى الەۋمەتتىك قورعاۋ مينيسترلىگى مەن تەكسەرۋدى تالاپ ەتكەن مەرزىمدى اتتاپ ءوتىپ، اتالعان نورما زاڭعا ەنۋدەن بۇرىن (قانداستاردى قابىلداۋدىڭ جاڭا مەحانيزمى ەنگىزگەنگە دەيىنگى) مەزگىلدە كوشىپ كەلگەندەر تۋرالى مالىمەت بەرە سالعان.
دەمەك، مەنىڭ ويىمشا، 2023 جىلدىڭ 19 ساۋىرىنەن كەيىن قازاقستانعا كوشىپ كەلگەن ەتنيكالىق قازاقتارعا «قانداس» مارتەبەسىنىڭ بەرىلۋىندە زاڭسىزدىق پەن جەمقورلىق بار دەگەن ءسوز!
«حالىقتىڭ كوشى-قونى تۋرالى» زاڭىنىڭ اتالعان 20-بابىنىڭ 5) تارماعى قولدانىستا تۇرعاندا، قانداستاردى قونىستاندىرۋ ءۇشىن ۇكىمەت ايقىنداعان وڭىرلەردەن باسقا توعىز وبلىس پەن ءۇش قالاعا قونىستانعان ەتنيكالىق قازاقتارعا «قانداس» مارتەبەسىنىڭ بەرىلمەيتىنىن ايتىپ ءتۇسىندىرۋدىڭ ءوزى ارتىق.
مۇنى كاسىبي زاڭگەر تۇرماق، ورتا مەكتەپتىڭ وقۋشىسى دا تالداپ ايتىپ بەرە الادى.
باس پروكۋراتۋرا قىزمەتكەرلەرىنىڭ بۇل ماسەلەگە سونشالىق سەلقوس قاراعانى – وتە وكىنىشتى جاعداي!
بۇل – ءبىزدىڭ قۇقىق قورعاۋ ورگاندارىنىڭ دەڭگەيىنىڭ سونشالىق تومەندىگىن جانە جاۋاپكەرشىلىگىنىڭ جوقتىعىن كورسەتەتىن ارەكەت!!
قۇرمەتتى بەرىك نوعايۇلى!
وتكەن ارىزدارىمدا دا ايتتىم، ماعان اتالعان 20-باپتىڭ 5) تارماعىنىڭ كەسىرىنەن «قانداس» مارتەبەسىن الا الماي جۇرگەن ەتنيكالىق قازاقتاردان اقشا بەرسەڭ، قونىستانعان وڭىرىڭە قاراماستان «قانداس» مارتەبەسىن دە، قازاقستان ازاماتتىعىن دا الىپ بەرەمىز دەگەن دەلدالدارىڭ كوپتىگى جايلى اقپارات وتە كوپ ءتۇستى. ءتىپتى، ءبىر دەلدالدىڭ ازاماتتىق الىپ بەرۋ ءۇشىن 12 مىڭ يۋان سۇراعانىن جازدى ءبىر ازامات.
مەن سول اقپاراتتىڭ ءبارىن ەڭبەك جانە حالىقتى الەۋمەتتىك قورعاۋ مينيسترلىگىنىڭ ءبىرىنشى ۆيتسە-ءمينيسترى ا. سارباسوۆتان باستاپ، اتالعان مينيسترلىكتىڭ وزىممەن بايلانىستا بار قىزمەتكەرلەرىنىڭ بارىنە جولداۋمەن كەلەمىن.
قىسقاسى، 2023 جىلدىڭ 19 ساۋىرىنەن كەيىن قازاقستانعا كوشىپ كەلگەن ەتنيكالىق قازاقتارعا «قانداس» مارتەبەسىنىڭ بەرىلۋىندە زاڭسىزدىق تا، جەمقورلىق تا بار ەكەنى داۋسىز!
ەڭبەك جانە حالىقتى الەۋمەتتىك قورعاۋ مينيسترلىگىنىڭ قۇرامىنداعى ەتنيكالىق كوشى-قون باسقارماسىنىڭ باسشىسى ايتكۋلوۆ داستان اسكاروۆيچ «قۇرمەتتى، وسى توپتىڭ مۇشەلەرى! 2023 جىلعى 28 قاراشادان بەرى كوشى-قون كوميتەتى مارتەبە الا الماعان قانداستاردىڭ ءتىزىمىن قۇرعان بولاتىن. تىزىمدە 98 ادام، ونىڭ 46 ادامعا قانداس مارتەبەسى بەرىلدى. 12 ادامنىڭ ءوتىنىشى قارالۋدا، جاقىن ارادا بەرىلەدى...» - دەپ، جاريالاپ الىپ، بۇگىن ءسىزدىڭ اتىڭىزعا جازعان ارىزىما بەرگەن جاۋابىندا سول «قانداس» مارتەبەسى بەرىلگەن 46 ادامعا سوقپاي ءوتۋى – ءبىزدىڭ وسى كۇدىگىمىزدى ودان ارى ۇلعايتا ءتۇستى...
قۇرمەتتى بەرىك نوعايۇلى!
سىزدەن ءۇشىنشى مارتە «قانداس» مارتەبەسىنە بايلانىستى وسى ماسەلەنى ءوز نازارىڭىزعا الىپ، تەكسەرۋ جۇرگىزۋىڭىزدى جانە زاڭسىزدىق انىقتالسا، جاۋاپتى تۇلعالاردى جاۋاپقا تارتۋدى سۇرايمىن.
قۇرمەتپەن،
اۋىت مۇقيبەك،
«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى
Abai.kz
