باسەكەلەستىكتى قورعاۋ جانە دامىتۋ اگەنتتىگىنىڭ ماڭعىستاۋ وبلىسى بويىنشا دەپارتامەنتى "اقتاۋ ەلەكتر جەلىلەرى باسقارماسى" جۇمىسىندا زاڭبۇزۋشىلىقتاردى انىقتاعان سوڭ، اقتاۋدىڭ بۇرىنعى اكىمى ەربول ىزبەرگەنوۆتەن ايىپپۇل ءوندىرىلدى، - دەپ حابارلايدى Tengrinews.kz.

مونوپولياعا قارسى دەپارتامەنت مالىمەتىنشە، اەجب قولدانىستاعى زاڭنامانى بۇزا وتىرىپ، باسەكەلەستىك ورتادا جۇرگەن جەكەلەگەن قىزمەت تۇرلەرىن جۇزەگە اسىرادى، سول ارقىلى كاسىپكەرلەردىڭ قۇقىقتارى مەن زاڭدى مۇددەلەرىنە نۇقسان كەلتىرگەن.

"سونىمەن قاتار، نارىققا ەلەكتر ەنەرگياسىن ەسەپكە الۋ اسپاپتارىن جەتكىزۋدى ويلاعان "ۆاۆيوت ازيا" جشس-نە قاتىستى تاۋار نارىعىنا قولجەتكىزۋ ءۇشىن كەدەرگىلەر جاساۋ دەرەكتەرى انىقتالدى. الايدا، اەجب نەگىزسىز دالەلدەرگە سىلتەمە جاساي وتىرىپ جانە بيۋروكراتيا قۇرۋ ارقىلى تاۋاردى نارىقتا ساتۋعا مۇمكىندىك بەرمەدى. اەجب مەملەكەتتىك كاسىپورنىنىڭ قۇرىلتايشىسى اقتاۋ اكىمدىگى بولىپ تابىلادى، وسىعان بايلانىستى جەرگىلىكتى اتقارۋشى ورگان اتىنا اەجب-عا ۇيعارىم مەن حابارلاما ەنگىزىلدى", - دەپ حابارلادى ۆەدومستۆو.

ۆەدومستۆو مالىمەتىنشە، قالالىق اكىمدىك مونوپولياعا قارسى قىزمەتكەرلەر تالابىمەن كەلىسپەي، اكتىنى ورىنداۋدان باس تارتقان.

"وسىعان بايلانىستى اقتاۋدىڭ بۇرىنعى اكىمى ە.ىزبەرگەنوۆكە قاتىستى قر اقبتك-ءنىڭ 162-بابىنا سايكەس اكىمشىلىك قۇقىق بۇزۋشىلىق تۋرالى حاتتاما جاسالدى ("مونوپولياعا قارسى ورگاننىڭ نۇسقاماسىن ورىنداماۋ"). اقتاۋدىڭ بۇرىنعى اكىمى مونوپولياعا قارسى ورگاننىڭ دالەلدەرىمەن كەلىسپەي، اقتاۋ اكىمشىلىك قۇقىق بۇزۋشىلىق جونىندەگى مامانداندىرىلعان سوتىنا جۇگىندى. سوتتىڭ ۇيعارىمى بويىنشا، شاعىم قابىلدانبادى. مونوپولياعا قارسى ورگاننىڭ قاۋلىسى ورىندالماعاندىقتان مەملەكەت كىرىسىنە سالىنعان ايىپپۇلدى ءوندىرىپ الۋ بويىنشا ماجبۇرلەۋ شارالارى قابىلداندى. بۇگىندە نۇسقامانىڭ تالاپتارى ورىندالدى، اكىمشىلىك ايىپپۇل ءوندىرىلدى. اەجب حابارلاماسى تولىق كولەمدە ورىندالدى", - دەپ اتاپ ءوتتى ۆەدومستۆو.

ايتا كەتەيىك، ەربول ىزبەرگەنوۆ بۇعان دەيىن 2023 جىلدىڭ ناۋرىزىندا سوت شەشىمىن ورىنداۋدان جالتارعانى ءۇشىن ايىپپۇل سالىنعان بولاتىن.

Abai.kz