ماڭعىستاۋ وبلىسىندا قىرىلعان اققۋلار 826-عا جەتتى، ولار ۋتيليزاتسيالاندى، دەپ جازدى ەكولوگيا ۆيتسە-ءمينيسترى جومارت اليەۆكە سۇيەنگەن جەرگىلىكتى "لادا" باسىلىمى.

مينيسترلىكتىڭ ايتۋىنشا، زەرتتەۋ كەزىندە قاراكولگە قۇياتىن سۋجىبەرگىش جابدىقتاعى سۋدىڭ شامادان تىس لاستانعانى انىقتالعان. وسىعان وراي Rixos Aktau قوناقۇيىندە جوسپاردان تىس تەكسەرىس باستالعان.

"قاراكولدەگى اققۋلاردىڭ قىرىلۋىن زەرتتەۋگە ماڭعىستاۋ وبلىسىنىڭ ەكولوگيا دەپارتامەنتى بەلسەنە اتسالىسىپ جاتىر. ماڭعىستاۋ وبلىسى ەكولوگيا دەپارتامەنتىنىڭ قىزمەتكەرلەرى زەرتتەۋ كەزىندە قاراكولگە جىبەرىلىپ جاتقان سۋدىڭ شامادان تىس لاستانعانىن انىقتادى. وسى دەرەكتەر نەگىزىندە Rixos Aktau قوناقۇيىندە جوسپاردان تىس تەكسەرىس باستالدى. تەكسەرىستەن كەيىن زاڭدى بۇزعاندارعا ءتيىستى شارا قولدانىلادى" دەدى جومارت اليەۆ.

اقتاۋدىڭ وڭتۇستىك-شىعىسىنان شامامەن ون شاقىرىم جەردە ورنالاسقان قاراكولدە اققۋلاردىڭ قىرىلىپ جاتقانى حابار 2023 جىلى جەلتوقسان ايىنىڭ سوڭىندا تاراعان. جۋىردا ماڭعىستاۋ وبلىسىنىڭ اۋماقتىق ورمان شارۋاشىلىعى جانە جانۋارلار الەمى ينسپەكتسياسى 601 سىبىرلاق اققۋ (Cygnus olon) ولگەنىن ايتقان.

رەسمي مالىمەت بويىنشا، باستاپقى تەكسەرىس قورىتىندىسى "اققۋلار قۇس تۇماۋىنان ولگەن" بولۋى مۇمكىن ەكەنىن كورسەتكەن. كەيىن ماماندار "قۇستار جەم تاپپاي سۋىقتا قىرىلعان" دەگەن تۇجىرىم جاساعان.

قۇستاردىڭ قىرىلۋىن تەكسەرۋگە قازاقستان بيوالۋانتۇرلىلىكتى
ساقتاۋ قاۋىمداستىعىنىڭ ورنيتولوگتارى جىبەرىلەتىنى ايتىلدى.

جەرگىلىكتى باق-تىڭ جازۋىنشا، جۋىردا Rixos Aktau قوناقۇيىنەن قارا قوشقىل سۋ قاراكولگە اعىپ جاتقانى جونىندە ۆيدەو تاراعان، ەكولوگتار توگىلگەن زاتتى تەكسەرە باستاعان.

فوتو: ءۇستىرت مەملەكەتتىك تابيعي قورىعى

Abai.kz