اقپاراتقا قاراعاندا، 9 قاڭتاردا استانا قالاسى مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمباەۆقا قاتىستى كۇزەتپەن ۇستاۋ تۇرىندەگى بۇلتارتپاۋ شاراسىن 9 ناۋرىزعا دەيىن ۇزارتقان.
ەلوردا سوتى وزگە مالىمەتتەردى قىلمىستىق-پروتسەستىك كودەكستىڭ 201-بابىنا سايكەس جاريالاۋعا بولمايتىنىن ەسكەرتكەن.
بىلتىر، 9 قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ 31 جاستاعى ايەلى سالتانات نۇكەنوۆانى سوققىعا جىققان. ايەلى جەدەل جاردەم كەلگەنشە كوز جۇمعان.
ارتىنشا ىشكى ىستەر مينيسترلىگى قۋاندىق بيشىمباەۆتىڭ ۇستالعانىن مالىمدەدى.
ول وسىعان دەيىن كوررۋپتسيا ايىبى بويىنشا 10 جىلعا سوتتالعان. كەيىن ونى ەكس-پرەزيدەنت نۇرسۇلتان نازارباەۆ راقىمشىلىقپەن بوساتتى.
15 قاراشادا پرەزيدەنت ق.توقاەۆ ءىىم-گە بيشىمباەۆتىڭ ءىسىن ەرەكشە باقىلاۋعا الۋدى تاپسىرعان.
فوتو: اشىق دەرەككوزدەن
Abai.kz
