گۇرجى ەلىندە بولىپ وتكەن پرەزيدەنت سايلاۋىنىڭ قورتىندىسى ءالى ناقتىلانباسادا كواليتسيالىق ۇكىمەتتىڭ ۇمىتكەرى گەورگي مارگۆەلاشۆيليدىڭ جەڭىسىن جاقتاستارى تويلاۋعا كىرىسىپ كەتتى. مارگۆەلاشۆيلي شىنىندا جەڭىسكە جەتكەن سياقتى، ويتكەنى ول ەلەكتورات تاراپىنان 68% داۋىس العان كورىنەدى. ءسويتىپ «گۇرجى ارمانى» پارتياسى بيلىككە كەلۋدە.

ال، «گۇرجى ارمانىنا» جول بەرگەن سااكاشۆيلي مەن  سااكاشۆيليدىڭ «ۇلتتىق بىرلىك قوزعالىسى» اتتى پارتياسى جەڭىلىستەرىن مويىنداپ، ساياساتتاعى باسەكەلەستەرىنە ساتتىلىك تىلەدى. «گۇرجى جۇرتى ءوزىنىڭ پرەزيدەنتىن تاڭدادى. سول ءۇشىن سايلاۋشىلارعا العىس ايتامىن»، - دەدى سوۆەت وكىمەتىنىڭ «شەكپەنىنەن شىققان» ەلگە بوستاندىق پەن ەركىندىك الىپ كەلگەن مەملەكەتشىل تۇلعا ميحايل سااكاشۆيلي. ەلدىڭ ەندىگى پرەزيدەنتى بولسا،  العىسىن الدىمەن «گۇرجى ارمانى» پارتياسىنىڭ جەتەكشىسى، پرەمەر-مينيستر – بيدزين يۆانيشيليگە جاۋدىردى. «مەن ءۇشىن ءاردايىم قۇرمەتتى ءام بەدەلدى ادام – بيدزين يۆانيشيليگە راحمەت. ول بىلتىرعى جەڭىستى دە، بيىلعى جەڭىستى دە قامتاماسىز ەتە الدى»، - دەدى. گەورگي مارگۆەلاشۆيلي ءوزىنىڭ پارتياداعى سەرىكتەستەرىنە دە ريزاشىلىعىن ءبىلدىرىپ: «ءبىزدىڭ ءبارىمىزدى وتانعا دەگەن  سۇيسپەنشىلىك بىرىكتىردى»، - دەپ اعىنان جارىلدى.

گۇرجى ەلىندە بولىپ وتكەن پرەزيدەنت سايلاۋىنىڭ قورتىندىسى ءالى ناقتىلانباسادا كواليتسيالىق ۇكىمەتتىڭ ۇمىتكەرى گەورگي مارگۆەلاشۆيليدىڭ جەڭىسىن جاقتاستارى تويلاۋعا كىرىسىپ كەتتى. مارگۆەلاشۆيلي شىنىندا جەڭىسكە جەتكەن سياقتى، ويتكەنى ول ەلەكتورات تاراپىنان 68% داۋىس العان كورىنەدى. ءسويتىپ «گۇرجى ارمانى» پارتياسى بيلىككە كەلۋدە.

ال، «گۇرجى ارمانىنا» جول بەرگەن سااكاشۆيلي مەن  سااكاشۆيليدىڭ «ۇلتتىق بىرلىك قوزعالىسى» اتتى پارتياسى جەڭىلىستەرىن مويىنداپ، ساياساتتاعى باسەكەلەستەرىنە ساتتىلىك تىلەدى. «گۇرجى جۇرتى ءوزىنىڭ پرەزيدەنتىن تاڭدادى. سول ءۇشىن سايلاۋشىلارعا العىس ايتامىن»، - دەدى سوۆەت وكىمەتىنىڭ «شەكپەنىنەن شىققان» ەلگە بوستاندىق پەن ەركىندىك الىپ كەلگەن مەملەكەتشىل تۇلعا ميحايل سااكاشۆيلي. ەلدىڭ ەندىگى پرەزيدەنتى بولسا،  العىسىن الدىمەن «گۇرجى ارمانى» پارتياسىنىڭ جەتەكشىسى، پرەمەر-مينيستر – بيدزين يۆانيشيليگە جاۋدىردى. «مەن ءۇشىن ءاردايىم قۇرمەتتى ءام بەدەلدى ادام – بيدزين يۆانيشيليگە راحمەت. ول بىلتىرعى جەڭىستى دە، بيىلعى جەڭىستى دە قامتاماسىز ەتە الدى»، - دەدى. گەورگي مارگۆەلاشۆيلي ءوزىنىڭ پارتياداعى سەرىكتەستەرىنە دە ريزاشىلىعىن ءبىلدىرىپ: «ءبىزدىڭ ءبارىمىزدى وتانعا دەگەن  سۇيسپەنشىلىك بىرىكتىردى»، - دەپ اعىنان جارىلدى.

وتاندى ءسۇيۋ – ساياساتتا اسا جاۋپكەرشىلىكتى ءىس.  گەورگي مارگۆەلاشۆيلي پارتيالاستارىنىڭ ويىنداعى گۇرجى ارمانىن عانا ىسكە اسىرا ما، الدە جالپى گۇرجى حالقىنىڭ تىلەگى مەن تالابىن اسقاقتاتىپ، كوپتىڭ ءۇمىتىن اقتاي ما، ونى الداعى ۋاقىت كورسەتەدى. ءبىز مارگۆەلاشۆيلي مىرزانىڭ دا سااكاشۆيلي سياقتى تمد-نىڭ تۇڭىلىگىن ءتۇرىپ تاستاپ، كەڭ-جارىق دۇنيەگە ۇمتىلعانىن قالايمىز. ويتكەنى گۇرجى حالقى سااكاشۆيلي بيلىگىندەگى از جىلدىڭ اۋانىندا شىنايى تاۋەلسىزدىكتىڭ اۋاسىن جۇتىپ ۇيرەندى. مىنا جالپاق جالعاندا ورىس ويىنان دا وزىق ويلار بارىن، رەسەيدەن دە مىقتى مەملەكەتتەردىڭ بارىن، ول مەملەكەتتەرمەن تەڭ دارەجەدە ارالاسىپ-قۇرالاسۋعا بولاتىندىعىن بەك ءتۇسىندى. ءتىپتى قاجەت بولسا، توبىلعى بىتپەس توبىقتاي جەر ءۇشىن تايسالماي تابان تىرەپ، كۇش سىناسۋدىڭ دا تالابىن رۋحىمەن ۇقتى. ۆاحتانگ كيكابيدزە سياقتى ارداقتىلارىنىڭ قادىرىنە جەتتى (ەستەرىڭىزگە سالا كەتكەنىمىز ءجون، ۆاحتانگ كيكابيدزە گۇرجى-رەسەي قاقتىعىسى كەزىندە پۋتين ۇسىنعان سولكەباي-سىيلىقتان باس تارتىپ، 2008 جىلدىڭ كوكتەمىندە تۋعان جۇرتىنا ءبىرجولا قايتىپ ورالعان-دى. ال ءبىزدىڭ ەرمەك سەركەباەۆ اتامىز بەن بيبيگۇل تولگەنوۆا اجەمىز،ت.ب. ەل الدىنا شىعا قالسا،  ءالى كۇنگە سسسر-ءدىڭ ءانشىسى بولعاندىعىن مىندەتتى تۇردە اتاپ ءوتۋدى بۇيىرادى). گۇرجى ەكونوميكاسى دا قارقىن الدى. تمد كوسەمدەرىنىڭ ميى جەتپەي جۇرگەن كوررۋپتسيا دا اتالعان ەلدە اتىمەن جوعالدى. بيۋروكراتيانىڭ ءبۇيىرى تەسىلدى. ەندى وسىنداي ەلدىڭ ارمانىنا جەتىپ، مۇرات-ماقساتىنىڭ قاسىل بولعانىن تىلەۋدەن باسقا ءبىزدىڭ قولدان ازىرگە نە كەلەدى؟.. ارماندارىڭ ورىندالا بەرسىن، گۇرجى ەلى!

رەداكتسيادان: گەورگي مارگۆەلاشۆيلي 1969 جىلى 4 قىركۇيەكتە بۇرىنعى پارتيا قىزمەتكەرىنىڭ وتباسىندا دۇنيەگە كەلگەن. 1992 جىلى تبليسي مەملەكەتتىك ۋنيۆەرسيتەتىنىڭ فيلوسوفيا-پسيحولوگيا فاكۋلتەتىن بىتىرگەن.   فيلوسوفيا عىلىمدارىنىڭ دوكتورى. ەلدەگى ساياسي ىستەرگە ارالاسقانعا دەيىن ول تۋريستىك كومپانيالاردا قىزمەت اتقارعان. عىلىممەن شۇعىلدانعان. 
 2012 جىلى گەورگي مارگۆەلاشۆيلي بيدزين يۆانيشيلي ۇكىمەتىنىڭ قۇرامىنا ەنىپ، ءبىلىم ءمينيسترىنىڭ ورىنباسارى بولدى.
2013 جىلى  گەورگي مارگۆەلاشۆيلي گۇرجى ۇكىمەتى باسشىسىنىڭ ورىنباسارى، ياعني ۆيتسە-پرەمەر لاۋازىمىنا تاعايىندالدى. گەورگي مارگۆەلاشۆيلي انا ءتىلى - گۇرجى ءتىلىن سۇيەدى. ۇلكەن ساياساتتا ول سااكاشۆيليدىڭ مۇراگەرى ىسپەتتى:  اقش-قا، باتىس ەۋروپاعا جاقىنداي ءتۇسۋدى قالايدى. «گۇرجى مەملەكەتى الداعى جىلدارى ەۋرووداقتىڭ قۇرامىنان تابىلۋى كەرەك»، - دەيدى ول.

Abai.kz