استانا قالاسىنىڭ قالالىق سوتى تىركەلمەگەن وپپوزيتسيالىق "العا، قازاقستان!" پارتياسىنىڭ كوشباسشىسى مارات جىلانباەۆ اپەللياتسيالىق شاعىمى بويىنشا شەشىم شىعاردى، دەپ حابارلايدى Ulysmedia.kz.

مارات جىلانباەۆتىڭ اپەللياتسيالىق شاعىمىن قاراۋ جابىق رەجيمدە ءوتتى.

سوت اپەللياتسيالىق شاعىمدى قاناعاتتاندىرمادى. بۇل تۋرالى بەلسەندىنىڭ ادۆوكاتى مەيىرجان دوسقاراەۆ ايتقان. وسىلايشا ۇكىم وزگەرىسسىز قالدى.

استانانىڭ قىلمىستىق ىستەر جونىندەگى سوتى مارات جىلانباەۆتى بىلتىر قاراشادا جەتى جىلعا سوتتاعان ەدى. بەلسەندىگە “تىيىم سالىنعان ۇيىمنىڭ قىزمەتىنە قاتىستى” جانە “تەرروريزمدى قارجىلاندىردى” دەگەن ايىپتار تاعىلعان.

مارات جىلانباەۆ– قازاقستاندىق مارافونشى. كەيىنگى كەزدە ەلدەگى ساياسي وقيعالارعا ارالاسىپ، سايلاۋعا دا تۇسپەك بولعان. پارتياسىن بەلسەندى تىركەي المادى.

ول الەمدەگى ەڭ ۇلكەن شولدەردى جالعىز جۇگىرە العان جالعىز ادام. 2022 جىلى "ار-بەدەل" قوعامدىق قورى بەلسەندىنىڭ سوزدەرىنەن كەيىن ەكس-پرەزيدەنت نۇرسۇلتان نازارباەۆتىڭ ار-نامىسى مەن قادىر-قاسيەتىن قورعاۋ تۋرالى ءىس بويىنشا جىلانباەۆتى سوتقا بەرگەن. جىلانباەۆ ول سوتتا جەڭگەن ەدى.

فوتو: vlast.kz

Abai.kz