سيريادا قارۋلى قاقتىعىس قاعىنىپ تۇر. سوعىس تولاستار ەمەس. ول سوعىستىڭ ورتاسىندا بالا-شاعاسىمەن شۇبىرىپ قازاقتار دا ءجۇر. سيريا ەلىنىڭ يمامى ماسكەۋگە بارعان ساپارىندا ورتا ازيا ەلدەرىنەن شىققان جالدامالى جاۋىنگەرلەردىڭ از ەمەس ەكەندىگىن ايتادى. سيريا سوعىسىنداعى قازاقتاردىڭ سانى يمامنىڭ ايتۋىنا قاراعاندا، ءۇش جۇزگە جۋىق كورىنەدى. اتالعان ەلدەگى جان سانىنىڭ شىعىنى قانشا بولدى، ونى تاپ باسىپ ايتۋ قيىن. ال، بەيبىت اسپان اياسىنداعى قازاقستاندا كىسى ءولىمى سيريادا قان كەشىپ جۇرگەندەردەن ارتىق بولماسا، كەم ەمەس كورىنەدى. بۇل شىندىقتى قر پرەزيدەنتىنىڭ ءوزى اشىنا ايتتى. 

- سيريادا سوعىسى بولىپ جاتىر. ال بىزدىكى نە؟!، - دەدى پرەزيدەنت ەلىمىزدەگى جول-كولىك اپاتىنىڭ جيىلەپ كەتكەندىگىنە كۇيىنىپ.

راس، بىزدىكى نە؟ بىزدىكى -ەسىرىك. اۆتوكولىككە اياق ارتقاننىڭ قانى تاسىپ، جول ەرەجەسىن قالاي بولسا سولاي بۇزادى. كوبى رۋلگە ءسپيرتتى ىشىمدىككە بوگىپ الىپ وتىرادى. سونداي جىن قاققاندارعا قاتىستى ءىىم قاتاڭ جازا قولدانىپ تا كورگەن. الايدا، قازاقستاندىق قاتاڭ جازالاردىڭ باسى قاتتى بولعانىمەن ارتى «ءتاتتى» بولىپ كەتەتىنى بار ەمەس پە؟ ءسويتىپ، ماس كۇيىندە رۋلگە وتىرعاندار ماشينا جۇرگىزۋ قۇقىعىنان ايرىلۋ نەمەسە ايىپپۇل تولەۋ دەگەن سياقتى «پالەلەردەن» قۇتىلىپ، باياعىسىنشا بارماق باستى، كوز قىستىمەن رەتىن تاۋىپ كەتىپ ءجۇر. سونداي ءجىلماڭتوس قۋلىقتىڭ اقىرى اي مەن كۇننىڭ امانىندا قايعىلى وقيعالارعا ۇلاسۋدا. ەندى مىنە، كەشەلى-بەرى ءىىم، جول پوليتسياسى «ءتارىتپتى بارىنشا كۇشەيتەمىز، ەشكىمنىڭ بەت جۇزىنە قارامايمىز»، - دەپ وتىر. قىسقاسى، ەندىگى ءتارتىپ بويىنشا، كەرى باعىتقا قارسى شىعىپ كەتكەن اۆتوكلىك يەسى 9 اي كولەمىندە اۆتوكىلىك جۇرگىزۋ قۇقىعىنان ايرىلادى. «قىزارا ءبورتىپ»  اۆتوكولىك تىزگىنىن ۇستاعاندار 800 مىڭ تەڭگە كولەمىندە ايىپپۇل تولەيدى. ادام قاعىپ ولتىرگەن جۇرگىزۋشى 20 جىل اباقتىنىڭ ار جاعىندا وتىراتىن بولادى.