بۇگىن الماتىدا تۇركيانىڭ تۇڭعىش پرەزيدەنتى مۇستافا كەمال اتاتۇرىككە ارنالعان ەسكەرتكىشتىڭ سالتاناتتى اشىلۋى ءوتتى.

ەسكەرتكىشتى الماتى قالاسىنىڭ اكىمدىگى مۇستافا كەمالدىڭ قۇرمەتىنە وتكەن جىلى اشىلعان «اتاتۇرىك سكۆەرىندە» ورناتتى.

اشىلۋ سالتاناتىنا مادەنيەت جانە اقپارات ءمينيسترى ايدا بالاەۆا، تۇركيا رەسپۋبليكاسىنىڭ قازاقستانداعى ەلشىسى مۇستافا كاپۋدجۋ، تۇركسوي حالىقارالىق ۇيىمىنىڭ باس حاتشىسى سۇلتان راەۆ، الماتى قالاسىنىڭ اكىمى ەربولات دوساەۆ، تۇرىك دياسپوراسى مەن زيالى قاۋىم وكىلدەرى قاتىستى.

سالتاناتتى جيىندى اشقان مينيستر مەملەكەت باسشىسى قاسىم-جومارت توقاەۆ ەسكەرتكىش ورناتۋ تۋرالى تاپسىرمانى تۇركيا رەسپۋبليكاسىنىڭ 100 جىلدىعىنا وراي رەجەپ تايىپ ەردوعاننىڭ قازاقستانعا ساپارى كەزىندە بەرگەنىن اتاپ ءوتتى.

«ءتۇبى ءبىر، تاريحى تامىرلاس تۇرىك ەلى ءبىز ءۇشىن كەشە دە، بۇگىن دە تىلەگى ورتاق، ماقساتى ءبىر باۋىرلاس مەملەكەت. مەملەكەت باسشىلارىمىزدىڭ ارقاسىندا وسى كۇندەرى ءبىزدىڭ ەلدەر اراسىنداعى قارىم-قاتىناس جاڭا دەڭگەيگە كوتەرىلىپ، قازىرگى تاڭدا بارلىق سالالار قارقىندى دامىپ كەلەدى. اسىرەسە، باۋىرلاس ەكى ەل اراسىنداعى ىنتىماقتاستىقتىڭ التىن كوپىرى بولعان مادەني بايلانىسىمىز زور. بۇل رەتتە تۇركيا تاريحىندا وشپەس ءىز قالدىرعان قازىرگى تۇرىك مەملەكەتىنىڭ نەگىزىن قالاۋشىعا ەرەكشە ءمان بەرىلەدى. ول جۇزەگە اسىرعان مادەني، ساياسي، ەكونوميكالىق، الەۋمەتتىك رەفورمالارىمەن زاماناۋي قوعامنىڭ قۇرىلۋىنا باعا جەتپەس ۇلەس قوستى. مەملەكەتتىڭ دامۋىنا نەگىز بولاتىن رەفورمالار كۇنى بۇگىنگە دەيىن جالعاسىپ كەلەدى»، - دەگەن ايدا بالاەۆا ەسكەرتكىش تۇركيانىڭ تاريحي مۇراسىن قۇرمەتتەۋدى عانا ەمەس، ەكى ەلدىڭ دوستىعى مەن ىنتىماقتاستىعىن دا بەينەلەيتىنىن اتاپ ءوتتى.

بيىكتىگى 3 مەتردەن تۇراتىن قولا ەسكەرتكىشتىڭ تۇعىرى گرانيتتەن جاسالعان. ەسكەرتكىشتىڭ اۆتورلارى قازاقستاندىق مۇسىنشىلەر - ايدوس بۇركىتباەۆ پەن تيمۋر ەرمۇحامەتوۆ.

ەسكەرتۋ! اقپارات پەن سۋرەتتەر قر مادەنيەت جانە اقپارات مينيسترلىگىنىڭ ءباسپاسوز قىزمەتىنەن الىندى. 

Abai.kz