اقش يرانعا قايتا سوققى بەرىپ، مۇناي سانكتسيالارىن كۇشەيتتى.

قۇراما شتاتتار بۇعان دەيىن قولدانىستا بولعان وق اتۋدى توقتاتۋ تۋرالى كەلىسىمدەرگە قاراماستان، يران اۋماعىنا بىرنەشە سوققى جاسادى. ۆاشينگتون بۇل وپەراتسيا ورمۋز بۇعازىنداعى شابۋىلدارعا جاۋاپ رەتىندە جۇرگىزىلگەنىن مالىمدەدى.

اقش ورتالىق قولباسشىلىعىنىڭ (CENTCOM) مالىمەتىنشە، امەريكاندىق اسكەريلەر يراننىڭ اۋە شابۋىلىنا قارسى قورعانىس جۇيەسىنە، باسقارۋ پۋنكتتەرىنە، جاعالاۋداعى راديولوكاتسيالىق ستانتسيالارىنا، كەمەگە قارسى زىمىران كەشەندەرىنە، ۇشقىشسىز ۇشۋ اپپاراتتارىنا جانە يسلام رەۆوليۋتسياسى كۇزەتى كورپۋسىنىڭ (يركك) شاعىن كاتەرلەرىنە قاتىستى 80-گە جۋىق نىساناعا شابۋىل جاساعان.

وپەراتسيانىڭ باستالۋىنا ورمۋز بۇعازىنداعى ساۋدا كەمەلەرىنە جاسالعان شابۋىلدار سەبەپ بولدى. سەيسەنبى كۇنى ەكى تانكەرگە شابۋىل جاسالسا، تاعى ءبىر كەمە ونىڭ الدىنداعى كۇنى شابۋىلعا ۇشىراعان. كاتار يراندى بورتىندا ءورت شىققان سۇيىتىلعان گاز تاسىمالدايتىن تانكەرگە شابۋىل جاسادى دەپ ايىپتادى.

سونىمەن قاتار، اقش قارجى مينيسترلىگى يران مۇنايىمەن، مۇناي ونىمدەرىمەن جانە مۇناي-حيميا ونىمدەرىمەن وپەراتسيالار جۇرگىزۋگە رۇقسات بەرەتىن باس ليتسەنزيانىڭ كۇشىن جويدى. ەندى جاڭا مامىلەلەر جاساۋعا تىيىم سالىنادى، ال بۇعان دەيىن جاسالعان كەلىسىمشارتتار 17 شىلدەگە دەيىن اياقتالۋى ءتيىس.

22 ماۋسىمدا قۇراما شتاتتار تەگەرانمەن يادرولىق ينسپەكتسيالار جانە ورمۋز بۇعازى ارقىلى ەركىن ترانزيت مىندەتتەمەلەرىنىڭ ورنىنا تۇپكىلىكتى بەيبىت كەلىسىمگە قول جەتكىزۋدى كوزدەپ، ونداعان جىلدار بويى قولدانىستا بولعان سانكتسيالاردى جەڭىلدەتىپ، يران مۇنايىن ساتۋعا رۇقسات بەرگەن بولاتىن. بۇل كەلىسىم 21 تامىزعا دەيىن جارامدى ەدى.

يران اقش-تىڭ شابۋىلدارىنا «باتىل جاۋاپ» بەرەتىنىن جانە ورمۋز بۇعازىن باسقارۋعا سىرتتان ارالاسۋعا جول بەرمەيتىنىن مالىمدەدى. بۇل تۋرالى جەرگىلىكتى Tasnim اگەنتتىگى حابارلادى.

Abai.kz