ءماجىلىس دەپۋتاتى بولاتبەك ناجمەتدينۇلى قازاقستان مەن رەسەي اراسىنداعى ىنتىماقتاستىق جونىندەگى ۇكىمەتارالىق كوميسسيانىڭ تەڭ توراعالارىنىڭ كەزدەسۋىنە قاتىستى.

ەكى ەل پرەمەرلەرىنىڭ ورىنباسارلارى – سەرىك جۇمانعارين مەن الەكسەي وۆەرچۋك باستاعان تاراپتار قوس مەملەكەت ءۇشىن دە ماڭىزى زور ماسەلەلەردى تالقىلاپ، ءوزارا تۇسىنىستىككە قول جەتكىزدى.

جيىندا بولاتبەك ناجمەتدينۇلى رەسەي فەدەراتسياسى ارقىلى وتەتىن قازاقستاندىق تاسىمالداۋشىلاردىڭ پروبلەمالارىن كوتەردى. اتاپ ايتقاندا، قيىندىقتار رەسەي-بەلارۋس شەكاراسىندا ناۆيگاتسيالىق پلومبالاردى سالۋدى قاجەت ەتەتىن جۇكتەردە تۋىندايدى.

قازاقستان تاراپى ۇكىمەتارالىق كوميسسياعا «لوبوك» وتكىزۋ پۋنكتىندە جۇكتەردىڭ جەكەلەگەن تۇرلەرىنە سايكەستەندىرۋ قۇرالدارىنىڭ جوق ەكەنىن ايتتى.

بۇعان جاۋاپ رەتىندە رەسەيلىك تاراپ 2024 جىلدىڭ 1 اقپانىنا دەيىن وتكىزۋ پۋنكتىن ناۆيگاتسيالىق پلومبالاردى ورناتۋ جۇيەسىمەن جانە اۆتوكولىكتەردى ولشەۋگە ارنالعان جابدىقتارمەن قامتاماسىز ەتۋدى جوسپارلاپ وتىرعاندارىن جەتكىزدى.

ۇكىمەتارالىق كوميسسيا اياسىندا قاتىسۋشىلار كەدەندىك رەتتەۋ، ەلەكتروندىق ساۋدا سالالارىنداعى ىنتىماقتاستىقتى دامىتۋ، ونەركاسىپتەگى، دەنساۋلىق ساقتاۋ سالاسىنداعى جوبالاردىڭ ىسكە اسىرىلۋ بارىسىن جانە ەۋرازيالىق ەكونوميكالىق وداقتاعى ينتەگراتسيالىق پروتسەستەردى تەرەڭدەتۋدىڭ كەلەشەگىن تالقىلادى.

Abai.kz