قازاقستان ۇلتتىق بانكى جاڭا ديزايندا شىققان نومينالى 5 000 تەڭگەلىك بانكنوتالاردى 2023 جىلى 25 جەلتوقساندا اينالىمعا شىعاردى. بۇل تۋرالى ۇلتتىق بانكتىڭ ءباسپاسوز قىزمەتى ءمالىم ەتتى. 

بۇل – «ساق ءستيلى» جاڭا سەرياسىنىڭ العاشقى بانكنوتاسى. ول قازاقى ويۋ-ورنەكتىڭ باستاۋ نەگىزى سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن «ساق ءستيلى» ەلەمەنتتەرىنە نەگىزدەلگەن.

قۇب شىنايى بانكنوتالاردى جالعان اقشادان ءوز بەتىنشە اجىراتۋعا كومەكتەسەتىن قاراپايىم ەرەجەلەر بار ەكەنىن ەسكە سالادى جانە 2023 جىلعى ۇلگىدە شىققان جاڭا ديزاينداعى 5 000 تەڭگەلىك بانكنوتالاردىڭ قورعانىش ەلەمەنتتەرىن ۇسىنادى.

اقشا بەلگىسىنىڭ قورعانىش ەلەمەنتتەرى تۋرالى

بانكنوتادا رەلەفتى قالىپتاستىراتىن – التىن ينتاگليو ارنايى باسپا ءتاسىلى قولدانىلعان. قازاقستان رەسپۋبليكاسىنىڭ ەلتاڭباسى التىن مەتالل بوياۋدىڭ جوعارى بەدەرلى قاباتىمەن باسىلعان.

بانكنوتانىڭ بەت جاعىنداعى شەتتەرىندە شىعىڭقى، جوعارى رەلەفتى ەلەمەنتتەر بار، ولار قولمەن ۇستاعاندا جاقسى سەزىلەتىن – كورۋ قابىلەتى ناشار ادامدارعا ارنالعان بەلگى.

بانكنوتا بەتىندە ۇزىك-ۇزىك تۇرىندە شىعىپ تۇرعان ەكى ءتۇستى قورعانىش ءجىپ تە بار. ول جارىق تۇسكەندە ءبىر تۇتاس ءجىپ رەتىندە انىق كورىنەدى. بانكنوتانىڭ كولبەۋ بۇرىشى وزگەرگەن كەزدە قىزىل جانە كوك تۇستەردىڭ ءوزارا ارەكەتتەسۋىنەن ديناميكالىق ءلۇپىلدىڭ اسەرى پايدا بولادى.

سونىمەن قاتار، بانكنوتانىڭ بەت جاعىندا كولەمدى ستيلدەندىرىلگەن «بۇركىت» بەينەسى تۇرىندەگى پاتچ قورعانىش ەلەمەنتى ورنالاسقان. بانكنوتانى اۋدارعان كەزدە نومينالدىڭ تسيفرلىق كەسكىنىنەن ويۋ-ورنەككە اۋىسۋ اسەرى جانە كۇن بەلگىسى ساۋلەلەرىنىڭ جان-جاققا شاشىراعان ديناميكالىق اسەرى بايقالادى.

جەكە كوركەمدىك ەلەمەنتتەر بانكنوتاعا التىن تۇستەس جىلتىراعى بار ارنايى – يريديستسەنتتى بوياۋ قولدانىپ باسىلعان.

لوكالدى سۋ بەلگىسى قورعانىش ەلەمەنتى – ەلەكتروتيپ. جارىق تۇسكەندە نومينالدىڭ بەينەسىنەن تۇراتىن ەلەكتروتيپ بەلگىسى انىق كورىنەدى.

بانكنوتانىڭ ەكىنشى بەتىندە «بۇركىت» ارتەفاكتىنىڭ كولەمدى بەينەسى تۇرىندەگى سپارك ەلەمەنتى ورنالاسقان. بانكنوتانىڭ كولبەۋ بۇرىشى وزگەرگەن كەزدە سپارك تۇسى التىننان نەفريت تۇسىنە وزگەرەدى.

مۇنداي تەكسەرۋ تاسىلدەرى بىرنەشە سەكۋند ۋاقىتتى الادى جانە كەز كەلگەن ادامعا بانكنوتانىڭ تۇپنۇسقالىعىن انىقتاۋعا كومەكتەسەدى.

فوتو: nationalbank.kz

Abai.kz