ۇلىمىز نە ءۇشىن سوتتالدى؟ راقىمباەۆ BI-داعى بىلىقتان حابارسىز با؟
![](https://abai.kz/content/uploads/2024/01/enoeo-3.jpg)
جازىقسىز سوتتالعان الماتى قالاسىنىڭ تۇرعىنى ەرنار سەيدازوۆتىڭ اتا-اناسى BI-GROUP حولدينگىنىڭ توراعاسى ايدىن راقىمباەۆقا ۇندەۋ حات جولدادى.
ەسكە سالىپ وتەيىك، ءبىر اي بۇرىن «Abai.kz» پورتالىنا «ۇلىمىز جازىقسىز سوتتالدى» دەگەن اتا-انانىڭ ءۇشبۋ حاتى جاريالانعان ەدى.
«BI-GROUP» حولدينگىنىڭ ەنشىلەس كومپانيالارى – «كاسپاكو» جانە «Bi Global» جشس-دە 2 اي عانا جۇمىس ىستەگەن ەرنار سەيدازوۆ «96 000 000 (توقسان التى ميلليون) تەڭگەنىڭ ماتەريالىن ۇرلاپ كەتىپتى» دەگەن جالعان ايىپپەن 8 جىلعا سوتتالعان.
ۇكىمدى الماتى قالاسى الاتاۋ اۋداندىق سوتى شىعارعان. قاماۋداعى جىگىتتىڭ اتا-اناسى اشيرحان سەيدازوۆ پەن كاميلانىڭ نۋرماحانوۆا سوتتىڭ شەشىمىمەن كەلىسپەيدى.
«BI-GROUP» حولدينگىنىڭ ەنشىلەس كومپانيالارى – «كاسپاكو» جانە «Bi Global» جشس-ءنىڭ جەكە اقشاسى بولسا ءبىر ءسارى، بىراق مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىنىپ جاتقانىن الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى مۇلدە ەلمەگەن. لدەتاەۆ، ارىستانبەكوۆ دەگەن قىزمەتكەرلەر جالعان كۋا بولىپ، ەرنار سەيدازوۆتىڭ موينىنا «كاسپاكو» جانە «Bi Global» جشس-ءنىڭ باسشىلىعى جىمقىرعان اقشانى كوزبوياۋشىلىقپەن ارتا سالعان.
بۇعان دەيىن ەرنار سەيدازوۆتىڭ اتا-اناسى پرەزيدەنت توقاەۆقا دا، ءماجىلىسى دەپۋتاتتارىنىڭ اتىنا دا اراشا سۇراپ، حات جازعان ەدى.
بۇگىن ءبىز باۋىر ەتى بالاسىنا قورعان سۇراپ، شىرىلداعان اتا-اتانىڭ تاعى ءبىر حاتىن وقىرمان نازارىنا ۇسىنباقپىز.
Abai.kz – ەركىن اقپارات الاڭى. مۇندا وي جارىستىرىپ، پىكىر تالاستىرۋعا، وزدەرىنىڭ ۇندەرىن ەل بيلىگىن تىزگىندەگەن تۇلعالارعا جەتكىزۋگە قازاقستاننىڭ ءاربىر ازاماتى قۇقىلى.
BI-GROUP حولدينگىنىڭ
اكتسيونەرى جانە ديرەكتورلار كەڭەسىنىڭ توراعاسى
ايدىن راقىمباەۆ مىرزاعا!
قۇرمەتتى ايدىن ءجۇمادىلۇلى!
سىزگە ەلىمىزدىڭ دامۋىنا ۇلەس قوسىپ جۇرگەن وزىق ويلى ازامات، ادىلدىك، شىندىق، زاڭدىلىق قاعيدالارىن قۇرمەتتەيتىن ادام رەتىندە وسى حاتتى جولداپ وتىرمىن. مەنىڭ حاتىمدى كوڭىل ءبولىپ وقىپ، وڭ جاۋاپ بەرەسىز دەپ ۇمىتتەنەمىن.
بۇل حاتتا كورسەتىلگەن جاعدايلار مەن فاكتىلەر تەك مەنىڭ ءوتىنىشىمدى عانا ەمەس، ءسىز باسقارىپ وتىرعان حولدينگتىڭ فيليالدارىنداعى زاڭسىزدىقتاردى، ءتارتىپتىڭ جوقتىعىن، قىزمەتكەرلەردىڭ جاۋاپسىزدىعىن، اسىرەسە قارجى سالاسىنداعى ەرەجەلەردىڭ دورەكى بۇزىلۋىن قامتيدى.
(سۋرەت: Google ىزدەۋ جۇيەسىنەن الىندى)
مەن نۋرماحانوۆا كاميلا BI-GROUP حولدينگىنىڭ «كاسپاكو» جانە «Bi Global» جشس-ندە جابدىقتاۋشى بولىپ 2021-2022 جىلدارى 2,5 اي جۇمىس ىستەپ، سول 2,5 ايدا «كاسپاكو» جشس-نە 62 426 380 (الپىس ەكى ميلليون ءتورت ءجۇز جيىرما التى مىڭ ءۇش ءجۇز سەكسەن) تەڭگە، «Bi Global» جشس-نە 33 679 175 (وتىز ءۇش ميلليون التى ءجۇز جەتپىس توعىز مىڭ ءجۇز جەتپىس بەس)تەڭگە شىعىن كەلتىردى دەگەن ايىپپەن سوتتالىپ كەتكەن سەيدازوۆ ەرناردىڭ اناسىمىن.
ءيا، مەنىڭ بالام سوت ۇكىمىمەن ايىپتى دەپ تانىلدى، بىراق سوت ءىستى ءادىل زاڭدى قارامادى، زاڭسىز ۇكىم شىعاردى.
زاڭسىزدىقتىڭ دالەلى سول – جوعالماعان زاتتى دا ۇرلادى دەپ سوتتاپ وتىر.
زاڭسىز ۇكىمنىڭ شىعۋىنا «كاسپاكو» جانە «Bi Global» جشس-ءنىڭ ماتەريالدىق جاۋاپتى تۇلعالارى مەن قارجىلىق قاۋىپسىزدىك ءبولىمى قىزمەتكەرلەرىنىڭ زاڭ تالاپتارىن دورەكى تۇردە بۇزا وتىرىپ جاساعان قۇجاتتارى نەگىز بولدى.
سول قىزمەتكەرلەر كەلتىرىلگەن شىعىننىڭ جاۋاپتىلىعىنان ءوز باستارىن الىپ قاشۋ ءۇشىن بارلىعىن مەنىڭ بالام ە.سەيدازوۆتىڭ موينىنا ىلۋگە بارلارىن سالدى، سول ءۇشىن سوتتىڭ وزىنە ىقپال جاسادى دەپ ويلايمىن.
سەبەبى سوت:
- «كاسپاكو» جانە «Bi Global» جشس-ءنىڭ جاساعان تۇگەندەۋ تىزىمدەرى (ينۆەنتاريزاتسيوننىە وپيسي) قر قارجى ءمينيسترىنىڭ «بۋحگالتەرلىك ەسەپتى جۇرگىزۋ قاعيدالارىن بەكىتۋ تۋرالى» 2015 جىلعى 31 ناۋرىزداعى № 241 بۇيرىعىنىڭ ( قر ءام-ندە 2015 جىلى 6 مامىردا № 10954 تىركەلگەن) تۇگەندەۋ جۇرگىزۋ ءتارتىبى تۋرالى 4 تاراۋىنىڭ 61, 65, 67 تارماقتارىن ورەسكەل بۇزا وتىرىپ جاسالعانىنا;
- تۇگەندەۋ ءتىزىمىن جاساۋعا كوميسسيا مۇشەسى رەتىندە قول قويعان قىزمەتكەرلەردىڭ سوتتا وزدەرىنىڭ تۇگەندەۋگە قاتىسپاعانىن ايتقانىنا،
- تۇگەندەۋ ءتىزىمىن تۇگەندەۋگە قاتىسۋعا بولمايتىن ادامدار جاساعانىنا;
- «كاسپاكو» جانە «Bi Global» جشس-ندە بۋحگالتەرلىك ءىس-قۇجاتتاردىڭ قالاي بولسا سولاي جاسالاتىنىنا، ول قۇجاتتار كىم كورىنگەننىڭ، ءتىپتى سول مەكەمەلەردە جۇمىس ىستەمەيتىن ادامداردىڭ قولىندا جۇرەتىنىنە
- جوعالدى دەگەن ماتەريالداردى ۋچاسكە باسشىلارى قابىلداپ الىپ، بۋحگالتەريا ارقىلى وتكىزىپ، جەتكىزۋشىلەرگە اقشاسىن تولەپ قويىپ، ودان سوڭ ول ماتەريال جوعالدى دەپ مەنىڭ بالاما جالا جاۋىپ وتىرعانىنا;
- مەنىڭ بالام ە.سەيدازوۆ جۇمىس ىستەمەگەن كەزدە جوعالىپتى دەگەن ماتەريالدى دا مەنىڭ بالامنىڭ موينىنا ىلگەنىنە;
- تۇگەندەۋ ءتىزىمى مەن اۋديت، ساراپتاما جانە سوت ۇكىمى بويىنشا ماتەريالدار مەن شىعىن كولەمى بويىنشا ايىرماشىلىقتارعا
- ءىس بويىنشا ماتەريالداردىڭ جەتكىزۋشى كومپانيالاردان ناقتى الىنعان-الىنباعانىن دالەلدەيتىن قۇجاتتاردىڭ جوقتىعىنا
- سوتتا «كاسپاكو» جانە «Bi Global» جشس-ءنىڭ قىزمەتكەرلەرى ءوز قىزمەتتىك مىندەتتەرى مەن بولعان جاعداي بويىنشا دۇرىس جاۋاپ بەرە الماي، ماتەريالداردىڭ جوعالۋىنا قالاي جول بەرىلگەنىن تۇسىندىرە الماعانىنا
- قىزمەتكەرلەردىڭ جۇمىسقا دەگەن جاۋاپكەرشىلىگى جوقتىعىنا، ءوز مىندەتتەرىنە نەمقۇرايلىلىعىنا قاراماستان زاڭسىز ۇكىم شىعاردى.
بۇل زاڭسىز ۇكىمنىڭ شىعۋىنا سول جاۋاپسىز قىزمەتكەرلەر ىقپال جاساپ وتىر دەپ ويلايمىن.
قۇرمەتتى ايدىن ءجۇمادىلۇلى!
مەن قازىر قورعاۋشىمەن بىرگە كاسساتسيالىق سوتقا شاعىم دايىنداۋدامىن. ءالى دە بولسا ادىلدىك زاڭدىلىق بولادى دەپ ۇمىتتەنەمىن.
«كاسپاكو» جانە «Bi Global» جشس-ندە جاسالعان جالعان قۇجاتتاردىڭ نەگىزىندە سوتتىڭ زاڭ تالاپتارىن بۇزا وتىرىپ شىعارعان ۇكىمىن قوعام تالقىسىنا سالىپ، تالقىلاۋ ءۇشىن جۋرناليستەرگە اقپارات بەرۋگە ءماجبۇر بولىپ وتىرمىن. جانە سوتتاعى ادىلەتسىزدىككە باعا بەرۋ ءۇشىن سەنات جانە ءماجىلىس دەپۋتاتارىنا جولداۋعا دا حات دايىنداپ جاتىرمىن.
ارينە ءسىز سوت ۇكىمى بار ەكەن دەپ مەنىڭ بالامنىڭ تاعدىرىنا ارالاسپاۋىڭىز مۇمكىن.
بىراق ءسىزدىڭ حولدينگتىڭ فيليالدارى قىزمەتكەرلەرىنىڭ قالاي جۇمىس ىستەيتىنى تۋرالى اقپارات سىزگە قىزىق بولار دەپ ويلايمىن.
مەملەكەتتەن تاپسىرىستار الىپ، الەۋمەتتىك قۇرىلىستار – مەكتەپ، ەمحانا سياقتى ءىرى قۇرىلىستاردى سالىپ جاتقان حولدينگتەگى قارجى، ماتەريالدىق قۇندىلىقتارعا جاۋاپتى ادامداردىڭ جاۋاپسىزدىعى تۋرالى، قاتاڭ ەسەپتە بولۋى ءتيىس قۇجاتتاردىڭ قالاي بولسا سولاي جاسالاتىنىن، ءتارتىپتىڭ جوقتىعى تۋرالى ءبىلۋىڭىز كەرەك.
سوتتا «كاسپاكو» جانە «Bi Global» جشس-ءنىڭ مەنىڭ بالامنان ماتەريالدى قابىلداپ الىپ، ناكلادنويلارعا قول قويىپ بەرگەن لدەتاەۆ، ارىستانبەكوۆ دەگەن قىزمەتكەرلەر «ول ماتەريالداردى كورگەن جوقپىز، سەيدازوۆقا سەنىپ قول قويدىق» دەپ جاۋاپ بەردى.
مەنىڭ بالامدى بۇرىن تانىمايتىن، بىلمەيتىن، تانىستىق-تۋىستىعى جوق ادامدار جۇمىسقا جاڭا كەلگەن ادامعا سەنىپ قالاي ميلليونداعان اقشانىڭ قۇجاتتارىنا قول قويىپ بەرە بەرەدى؟ بۇل جاۋاپسىزدىق پا؟ جاۋاپسىزدىق!
جانە وسى جاۋاپسىزدىقتى ءسىزدىڭ قىزمەتكەرلەرىڭىز ءۇشىن قالىپتى جاعداي دەپ سانايدى ەكەن. ولاردىڭ سوتتا ايتقانى «ءبىز ءبىر-بىرىمىزگە سەنىپ، تەكسەرمەي جۇمىس جاساي بەرەمىز». بۇل سىبايلاسىپ قىلمىس جاساۋعا جول اشۋ!
ەگەر ول ولاردىڭ جەكە اقشاسى بولسا ءبارى ءبىر، بىراق سىزدەر مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىپ جاتىرسىزدار عوي. مەملەكەتتىڭ اقشاسى وڭدى-سولدى شاشىلىپ جاتقان جوق پا؟
ءىس بويىنشا «مەنىڭ بالام 2 اي عانا جۇمىس ىستەپ، جۇمىسقا كىرمەي-اق ميلليونداعان تەڭگەنىڭ ماتەريالىن ۇرلاپ كەتىپتى. ۋچاسكە باسشىسى مەن جوبا جەتەكشىسى ماتەريال كىرگەن-كىرمەگەنى تەكسەرمەي، ناكلادنويعا قابىلداپ الدىم دەپ قول قويا بەرىپتى. ول ۇرلانعان ماتەريال بۋحگالتەرلىك ەسەپپەن ءوتىپ، اقشاسى تولەنىپ كەتىپتى. ودان سوڭ دا ۇرلىق جاسالا بەرىپتى، ونى ەشكىم تەكسەرمەپتى، سەنىپ جۇرە بەرىپتى. ماتەريال وبەكتىگە كىردى مە، كىرمەدى مە ەشكىم قاراماپتى. ول ۇرلىقتى 5 ايدان كەيىن عانا انىقتاپتى».
سوندا بۇل نە دەگەن قاداعالاۋ جوق، اشىق-شاشىق قۇرىلىس؟
جاۋاپتى قىزمەتكەرلەر، قاۋىپسىزدىك قىزمەتى قايدا قارايدى؟
جالپى ماتەريالدىق قۇندىلىقتار دۇرىس ەسەپكە الىنىپ، دۇرىس سانالىپ، دۇرىس الىنىپ-بەرىلەدى مە؟
الدە انىقتالعانى انىقتالىپ، انىقتالماعانى وڭدى-سولدى شاشىلىپ كەتىپ جاتىر ما؟ ماتەريالدار قۇرىلىس وبەكتىلەرىنە جەتىپ جاتىر ما؟
الدە قاعازبەن ون توننا، ال ناقتى ءبىر توننا كىرىپ، ساپاسىز قۇرىلىستار سالىنىپ جاتىر ما؟
سۇراق كوپ.
قىزمەتكەرلەرىڭىز بۇل سۇراقتارعا جاۋاپ بەرە المادى.
سوت تا بۇل سۇراقتارعا جاۋاپ الۋعا تىرىسپادى.
سىزدەن جاۋاپ بولاتىن شىعار دەپ جازىپ وتىرمىن.
اپەللياتسيالىق شاعىمدا «كاسپاكو» جانە «Bi Global» جشس-ءنىڭ قىزمەتكەرلەرىنىڭ بۋحگالتەرلىك ەسەپ بويىنشا قانداي زاڭداردى بۇزىپ قۇجاتتار جاساعانى، سوتتا قانداي جاۋاپ بەرگەنى، جالپى وسى ەكى مەكەمەدە جۇمىستىڭ قالاي جۇرەتىنى تۋرالى تولىق سيپاتتالعان.
قاجەت دەسەڭىز سول قىزمەتكەرلەردىڭ سوتتا بەرگەن جاۋاپتارىن سوتتان الىپ اۋديو جازبا جىبەرۋگە دە كومەكتەسە الامىز.
كەزدەسىپ، ءىس بويىنشا ءمان-جايلاردى انىقتاپ سۇراعىڭىز كەلسە، ادۆوكاتپەن بىرگە جەكە كەزدەسۋگە كەلۋگە دايىنبىز.
وسى حاتىمدى وقىپ، ءمان-جايلاردى تەكسەرىپ، ءوز قورىتىندىڭىزدى جاساپ، پىكىر ءبىلدىرۋىڭىزدى سۇرايمىن.
بالامنىڭ ءىسى بويىنشا زاڭدى شەشىمگە قول جەتكىزۋگە ىقپال جاساۋىڭىزدى سۇرايمىن.
كاميلا نۋرماحانوۆا
Abai.kz