قۇرمەتتى رەداكتسيا!

وتكەن جىلى «ەرتەڭ اماندىق باتالوۆتىڭ اياعىن قۇشپايىق دەسەڭىزدەر...» دەگەن وسى حاتتى قر پرەزيدەنتى اكىمشىلىگىنىڭ باسشىسى ولجاس بەكتەنوۆ مىرزانىڭ اتىنا جازىپ، مەملەكەتتىك قىزمەتكەرلەرگە زەينەتاقى تاعايىنداۋ ماسەلەسىن قايتا قاراپ، ەكس-پرەزيدەنتتىڭ زەينەتاقىسى سەكىلدى، ولارعا دا لاۋازىمدىق جالاقىسىنىڭ سەكسەن پروتسەنتi مولشەرiندە زەينەتاقى تاعايىنداۋ ءتارتىبىن ەنگىزۋدى ۇسىنعان بولاتىنمىن.

سونداي-اق، بۇل حاتتى مەملەكەتتىك كەڭەسشى ەرلان قارين مىرزاعا دا جولدادىم.

«ە-ءوتىنىش» جۇيەسى ارقىلى كورىپ وتىردىم، ەكى حاتىم دا يەسىنە جەتتى.

ەكى مىرزا بۇل ۇسىنىسىمدى پرەزيدەنتىمىز قاسىم-جومارت توقاەۆقا جەتكىزدى مە، جوق پا، ول جاعىنان حابارسىزبىن.

ەگەر، بۇل حات پرەزيدەنتتىڭ قولىنا تيسە، ول كىسى بۇل ماسەلەگە بەي-جاي قارامايتىن ەدى دەپ ويلايمىن.

سەبەبى، قاسىم-جومارت كەمەلۇلى ءوزىنىڭ «بەلاسۋ» اتتى كىتابىندا لي كۋان يۋ تۋرالى تولعاي كەلىپ، «سينگاپۋرلىقتار لي كۋان يۋعا ءتىپتى دە سول كەزدىڭ وزىندە سىبايلاس جەمقورلىققا قارسى ىمىراسىز كۇرەس جۇرگىزگەنى ءۇشىن ءۇشىن دە ءدان ريزا. قازىر بۇل ەل اسا جوعارى رەيتينگكە يە، نى ازيا قۇرلىعىنداعى ەڭ «تازا» ەل رەتىندە تانيدى. سينگاپۋر شەنەۋنىگىن سىبايلاس جەمقورلىقپەن اشكەرەلەۋ ونىڭ وزىنە دە، تۋىسقاندارى ءۇشىن دە ولىممەن تەڭ. ول قوعامنىڭ جەككورىنىشتى ادامىنا اينالادى. سونىمەن قاتار، مۇندا شەنۋنىكتەردىڭ ماتەريالدىق قامتاماسىز ەتىلۋىنە كوڭىل بولىنگەن. مۇندا ء70–شى جىلداردىڭ ورتا شەنىنىڭ وزىندە-اق لي كۋان يۋ-دىڭ ىقپال ەتۋىمەن ولار الەمدەگى ەڭ جوعارى جالاقى الاتىن دارەجەگە جەتتى» - دەپ، جازادى.

ال، ءبىزدىڭ شەنۋنىكتەردىڭ جالاقىسى جامان ەمەس بولعانىمەن، ەرتەڭگى الاتىن زەينەتاقىسى تىم از، وتە ماردىمسىز. ءتىپتى، وبال، جانىڭ اشيدى...

سوندىقتان دا ءبىزدىڭ شەندىلەر ەرتەڭىن بۇگىن قامداپ قالۋعا بارىن سالادى. ءتىپتى، كوپ شەنەۋنىك بيلىككە مول تابىس تابۋ ءۇشىن كەلەدى...

مەنى وسى مەملەكەتتىك قىزمەتكەرلەردىڭ زەينەتاقىسى تۋرالى بىلە تۇرا، ءبىر شەنەۋنىكتىڭ تىرس ەتىپ، ءبىر اۋىز ءسوز ايتپايتىنى تاڭ قالدىرادى.

مىنە، وسى تۇرعىدان العاندا، كەشەگى لي كۋان يۋ-دىڭ الدىن كورگەن ءبىزدىڭ پرەزيدەنت بۇل ۇسىنىستى كەرى قاقپاس ەدى دەگەن ويدامىن.

قىسقاسى، ەكەۋگە جازعان حاتىم ەسكەرۋسىز قالدى.

ولار دا وزدەرىنىڭ ەرتەڭى تۋرالى ونشا الاڭداپ كەتپەيتىن كورىنەدى.

سوڭى ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك ساقتاندىرۋ جانە الەۋمەتتىك قامسىزداندىرۋ دەپارتامەنتى جاتتاندى جاۋابىن بەرۋمەن تىندى.

سول حاتىمدى ءبىراز ۇزىلىستەن كەيىن «Abai.kz» ۇلتتىق پورتالىنا جولداپ وتىرمىن.

اۋىت مۇقيبەك

ەرتەڭ اماندىق باتالوۆتىڭ اياعىن قۇشپايىق دەسەڭىزدەر...

قازاقستان رەسپۋبليكاسى
پرەزيدەنت اكىمشىلىگىنىڭ تورعاسى
و.ا. بەكتەنوۆ مىرزاعا!

قۇرمەتتى ولجاس ابايۇلى!

پرەزيدەنتىمىز قاسىم-جومارت توقاەۆتىڭ بيىلعى جولداۋىندا «ازاماتتاردىڭ تابىسىن ارتتىرۋ ءۇشىن 2024 جىلدىڭ 1 قاڭتارىنان باستاپ ەڭ تومەنگى جالاقى مولشەرىن 85 مىڭ تەڭگەگە كوتەرۋدى تاپسىرامىن»، - دەدى.

ەندى پرەزيدەنتتىڭ وسى تاپسىرماسىنا بايلانىستى، قاتىستى زاڭدارعا وزگەرىستەر مەن تولىقتىرۋلار ەنگىزىلەدى.

وسى ورايدا، مەن مەملەكەتتىك قىزمەتكەرلەرگە زەينەتاقى تاعايىنداۋ ماسەلەسىن قايتا قاراپ، ەكس-پرەزيدەنتتىڭ زەينەتاقىسى سەكىلدى، ولارعا دا لاۋازىمدىق جالاقىسىنىڭ سەكسەن پروتسەنتi مولشەرiندە زەينەتاقى تاعايىنداۋ ءتارتىبىن ەنگىزۋدى ۇسىنامىن.

قۇرمەتتى ولجاس ابايۇلى!

وتكەن جىلى بۇرىنعى الماتى وبلىسىنىڭ اكىمى اماندىق باتالوۆ اعامىزدىڭ «Aman Tasygan LIVE» يۋتۋب كانالىنا بەرگەن سۇحباتىن تىڭداعان بولاتىنمىن.

1981 جىلدان بەرى مەملەكەتتىك قىزمەتتە بولعان، وبلىس اكىمى بولىپ تۇرعاندا 2 ميلليون 400 مىڭ تەڭگە ايلىق الىپ كەلگەن ەكس-اكىم 130 مىڭ تەڭگە عانا زەينەتاقىمەن زەينەتكە شىعىپتى.

جۋرناليست جىگىتتىڭ: «زەينەتاقىڭىز وزىڭىزگە جەتە مە؟»، - دەگەن سۇراعىنا اماندىق عابباسۇلى: «130 مىڭ تەڭگە الام، ايتۋدىڭ ءوزى ۇيات!»،  - دەپ جاۋاپ بەردى. سوڭىنا: «بالام بار...»، - دەگەن ءسوزدى قوسىپ قويدى ابەكەڭ.

بۇكىل سانالى عۇمىرىن مەملەكەتتىك قىزمەتكە ارناعان ەكس-اكىمنىڭ 130 مىڭ-اق تەڭگەمەن زەينەتكە شىققانىن كورىپ، ونى اياپ كەتتىم. قانداي ادىلەتسىزدىك بۇل؟!

ال، «بالام بار...» دەگەن ءسوزىن ەستىپ، كۇدىكتەنە باستادىم.

سەبەبى، مەملەكەتتىك تاپسىرىستار مەن ءىرى باعدارلامالاردى وسىنداي ءىرى شەنۋنىكتەردىڭ جاقىن ادامدارى الىپ، ورىنداپ كەلگەنى جاسىرىن ەمەس. ونىڭ كوبى جەمقورلىققا اپارىپ سوقتىراتىنى تاعى بەلگىلى جاعداي...

ەلىمىزدە 82-مىڭ مەملەكەتتىك قىزمەتكەر بار ەكەن. ەرتەڭ ولاردىڭ ءبارى وسى اماندىق باتالوۆ قۇساپ، تۇككە تۇرعىسىز زەينەتاقىمەن زەينەتكە شىعادى. مەن سولاردىڭ ءبارى بولماسا دا، تۇگەلگە جۋىعى جاقىندارىنىڭ بايۋىنا جول اشىپ بەرەدى دەپ ەسەپتەيمىن.

قۇرمەتتى ولجاس ابايۇلى!

وسى ۇسىنىس-حاتتى جازۋ بارىسىندا، ءسىزدىڭ دە ءومىربايانىڭىزدى مۇقيات وقىپ شىقتىم.

جاسىڭىز 43-تە ەكەن. ەڭبەك جولىنىڭىزدى 2002 جىلى الماتى قالاسى ادىلەت باسقارماسى ءبولىمىنىڭ باس مامانى بولىپ باستاعان ەكەنسىز. سودان بەرىگى 21 جىلدا كىلەڭ جوعارى مەملەكەتتىك قىزمەتتە بولىپسىز. مىنە، قازىر مەملەكەت باسشىسىنىڭ جارلىعىمەن قازاقستان رەسپۋبليكاسى پرەزيدەنتى اكىمشىلىگىنىڭ باسشىسى بولىپ، تاعى دا وتە جوعارى جانە اسا جاۋاپتى قىزمەتتەردە وتىرسىز.

ءبىر سوزبەن ايتقاندا، ءسىز دە بۇكىل عۇمىرىڭىزدى مەملەكەتتىك قىزمەتكە ارناعان تۇلعاسىز.

قۇداي ونىڭ بەتىن ارى قىلسىن، وقىس ءبىر جاعدايلار بولىپ كەتپەسە، ءسىزدىڭ ەندى بارىپ بازاردا ساۋدا جاساماسىڭىز انىق. زەينەتكە شىققانعا دەيىن، اللا اماندىعىن بەرسە، ءالى تالاي بيىكتەردى باعىندىرىپ، ەلىمىز ءۇشىن جاۋاپتى، ناتيجەلى قىزمەتتەر اتقاراتىنىڭىزعا سەنىمدىمىن.

بىراق، ەرتەڭ زەينەتكە شىققاندا، اماندىق باتالوۆ قۇساپ، كۇنىڭىزدىڭ 130 مىڭ تەڭگەگە قاراپ قالعانىن مەن قالامايمىن!

«قۇداي ونداي كۇيدى ءسىزدىڭ جانە ءسىزدىڭ ارىپتەستەرىڭىزدىڭ باسىڭىزعا بەرمەسىن!» - دەپ، تىلەيمىن!

قۇرمەتتى ولجاس ابايۇلى!

مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ مىرزا ءوزىنىڭ «ەگەمەن قازاقستان» گازەتىنە بەرگەن سۇحباتىندا: «...جوعارى وقۋ ورىندارى مەن كوللەدجدەردە مەملەكەت ەسەبىنەن ءبىلىم الىپ، وقۋ ۇلگەرىمىنىڭ ور­تاشا بالى (GPA) جوعارى كورسەتكىشتەگى مامان يەسى اتانعان جاستارىمىزدى اۋداندىق جانە اۋىلدىق دەڭگەيلەردەگى ەڭ تومەنگى لاۋازىمدىق مەملەكەتتىك قىزمەتكە كونكۋرستىق ىرىكتەۋسىز قابىلداۋ ۇسىنىلىپ وتىر»، - دەپتى.

اگەنتتىك توراعاسى بۇل باستامانى: «بىرىنشىدەن، بۇل جاس مامان­دار­دىڭ ەل وڭىرلەرىنە ورالىپ، ونىڭ دامۋىنا ۇلەس قوسۋعا جول اشسا، ەكىنشىدەن، ايماقتاردا كادر تاپشىلىعىن ازايتۋعا ىق­پال ەتەدى دەپ كۇتىلۋدە»، - دەپ ءتۇسىندىرىپتى.

دەمەك، ەلىمىزدە كادر تاپشىلىعى قاتتى بىلىنۋدە. بۇل تۋرالى پرەزيدەنتتىڭ ءوزى دە ايتىپ كەلەدى.

بۇل – مەملەكەت ءۇشىن اسا قاۋىپتى جاعداي!

ەكىنشىدەن، قازىر جاستاردىڭ مەملەكەتتىك قىزمەتكە زاۋقى جوق، بارعىسى كەلمەيدى. ونىڭ سەبەبى، ەرتەڭ زەينەتكە شىققاندا اماندىق باتالوۆتىڭ اياعىن قۇشۋدان قاشادى دەپ ويلايمىن...

قۇرمەتتى ولجاس ابايۇلى!

مەملەكەتتىك قىزمەتكەرلەردىڭ بۇكىل عۇمىرىن وتانى مەن تۋعان حالقىنىڭ جارقىن بولاشاعىنا ارناپ كەلىپ، زەينەتكە شىققاندا مۇساپىرلىك ۇيگە ءتۇسىپ قالۋى – قازاقستان سەكىلدى وتە باي مەملەكەت ءۇشىن وتە ۇيات جانە ماسقارا جاعداي!

ونى بىلاي قويعاندا، ەكس-پرەزيدەنتكە رەسپۋبليكا پرەزيدەنتi لاۋازىمدىق جالاقىسىنىڭ سەكسەن پروتسەنتi مولشەرiندە زەينەتاقى تاعايىنداۋ، ال ونىڭ قول استىندا قىزمەت ەتكەن مەملەكەتتىك قىزمەتكەرلەردى اماندىق باتالوۆ قۇساتىپ 130 مىڭ تەڭگەمەن زەينەتكە شىعارۋ –  قازاقستان رەسپۋبليكاسىنىڭ كونستيتۋتسياسىنىڭ 14-بابىنىڭ 2 بولىگىنە قايشى دەپ ەسەپتەيمىن.

قۇرمەتتى ولجاس ابايۇلى!

قاسىم-جومارت كەمەلۇلى سوڭعى جولداۋىندا ەلىمىزدىڭ ەكونوميكالىق الەۋەتىنە توقتالىپ، «قازىر الەمدە گەوساياسي احۋال ۋشىعىپ تۇر. سوعان قاراماستان، ەل ەكونوميكاسىنىڭ نەگىزگى باعىتتارى بويىنشا كورسەتكىشتەر ءوستى. بىلتىر قازاقستاننىڭ ىشكى جالپى ءونىمى 104 تريلليون تەڭگە بولدى. ەلىمىزگە 28 ميلليارد دوللار تىكەلەي شەتەل ينۆەستيتسياسى تارتىلدى. بۇل – رەكوردتىق كورسەتكىش. سىرتقى ساۋدا-ساتتىق بۇرىن بولماعان دەڭگەيگە، ياعني 136 ميلليارد دوللارعا جەتتى. ونىڭ 84 ميللياردى – ەكسپورت. سىرتقى قورىمىز 100 ميلليارد دوللارعا جۋىقتادى. بۇل، ەڭ الدىمەن، ەكونوميكالىق تۇراقتىلىعىمىزدىڭ اسا ماڭىزدى كەپىلى ەكەنى ءسوزسىز»، - دەدى.

قۇدايعا شۇكىر، جاعدايىمىز جامان ەمەس ەكەن...

قۇرمەتتى ولجاس ابايۇلى!

ەندەشە، وسى جاعدايلاردى ەسكەرە وتىرىپ، سىزدەن مەملەكەتتىك قىزمەتكەرلەرگە زەينەتاقى تاعايىنداۋ ماسەلەسىن قايتا قاراپ، ەكس-پرەزيدەنتتىڭ زەينەتاقىسى سەكىلدى، ولارعا دا لاۋازىمدىق جالاقىسىنىڭ سەكسەن پروتسەنتi مولشەرiندە زەينەتاقى تاعايىنداۋ ءتارتىبىن ەنگىزۋگە ىقپال ەتۋىڭىزدى سۇرايمىن.

قۇرمەتپەن،

اۋىت مۇقيبەك،

«قۇرمەت» وردەنىنىڭ يەگەرى

Abai.kz