بۇگىن استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ارىستان مۇحامەديۇلىنا، ونىڭ جۇبايى عاليا ىسقاقوۆا مەن مۇستاحيم تولەەۆكە قاتىستى شەشىم شىعاردى.

سوت مالىمەتى بويىنشا، 2022 جىلدىڭ جەلتوقسانىندا مۇحامەديۇلى استانا قالاسىنىڭ تەرگەۋ يزولياتورىندا قاماۋدان بوساپ، «د» قوناق ءۇيىن مەنشىگىندە ساقتاپ قالعىسى كەلىپ، تولەەۆتىڭ ادۆوكاتى ارقىلى لاۋازىمدى ادامدارعا اسا ءىرى مولشەردە پارا بەرۋگە نيەتىن بىلدىرگەن. بۇل رەتتە ول پاراقورلىققا دەلدال رەتىندە ءوزىنىڭ جۇبايى عاليا ىسقاقوۆانى تارتقان.

سوت شەشىمىمەن ارىستان مۇحامەديۇلى اسا ءىرى مولشەردە پارا بەرۋگە وقتالعانى، قىلمىستىق قۇقىق بۇزۋشىلىقتارعا قاتىسى بار بولعانى ءۇشىن كىنالى دەپ تانىلىپ، 11 جىلعا باس بوستاندىعىنان ايىرىلدى. سونداي-اق، مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا شەكتەتىلدى.

ىسقاقوۆا پاراقورلىققا دەلدالدىق جاساعانى ءۇشىن كىنالى دەپ تانىلىپ، (قك 368-بابىنىڭ 1-بولىگى) 6 ايعا باس بوستاندىعىنان ايىرىلدى. وعان دا ءومىر بويىنا مەملەكەتتىك قىزمەتتە قىزمەت اتقارۋعا تىيىم سالىندى.

تولەەۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ، 10 جىل مەرزىمگە ادۆوكاتتىق قىزمەتپەن اينالىسۋ قۇقىعىنان، 6 جىل 8 اي باس بوستاندىعىنان ايىرىلدى.

ۇكىم زاڭدى كۇشىنە ەنگەن جوق.

Abai.kz