جازعا قاراي اقىلى جولدىڭ ءتاريفى قىمباتتاۋى جوسپارلانۋدا. سەبەبى سوڭعى ون جىلدا تاريف ءبىر باعانى ۇستانىپ كەلگەن. ال اقىلى جولدىڭ ساپاسىن جاقسارتۋ ءۇشىن قاجەتتى شارالار قولدانىلۋى ءتيىس. بۇل تۋرالى كولىك ءمينيسترى مارات قاراباەۆ ايتتى.

«ءتاريفتى ءوسىرۋ جاعىن قاراستىرىپ جاتىرمىز. نەگە ەكەنىن تۇسىندىرەيىن. 2013 جىلدان بەرى ياعني 11 جىل بويى اقىلى جولدىڭ ءتاريفى وزگەرمەدى. ءبىزدىڭ تاريفپەن باسقا ەلدىڭ ءتاريفىن سالىستىرايىق. مىسالى قازاقستاندا اقىلى جول ءتاريفى – 1 تەڭگە 20 تيىن، ال رەسەيدە – 7 تەڭگە»، – دەدى كولىك ءمينيسترى سەناتتىڭ جالپى وتىرىسىنان كەيىنگى بريفينگتە.

مارات قاراباەۆتىڭ پىكىرىنشە، اقىلى جولدىڭ ساپاسىن جاقسارتۋ ءۇشىن ءتاريفتى ءوسىرۋ قاجەت.

«سىزدەر جولداردىڭ جاقسى بولعانىن قالايسىزدار عوي. ول ءۇشىن ونى كۇتىپ ۇستاۋ كەرەك. سىزدەر اقىلى جولداردى كۇتىپ ۇستاۋعا بولىنەتىن قارجى سالىق تولەۋشىلەردىڭ ەسەبىنەن ەمەس، «قازاۆتوجول» ۇلتتىق كومپانياسىنىڭ ەسەبىنەن بولعانىن قالايسىزدار. ماسەلەنى شەشۋدىڭ تەك جالعىز جولى قالادى. ول – اقىلى جولدىڭ ءتاريفىن كوتەرۋ»، – دەدى كولىك ءمينيسترى.
مارات قاراباەۆتىڭ ايتۋىنشا، اقىلى جولدىڭ ءتاريفتى ايتارلىقتاي قىمباتتامايدى. ماماندار اقىلى جولدىڭ ءتاريفتى ناقتى قانشا پايىزعا وسەتىنىن ەسەپتەيتىن بولادى.

«اقىلى جول ءتاريفى كوپ وسپەيدى. كەيبىر ادامدار 2-3 ەسە وسىرەيىك دەپ ايتىپ جاتىر. الايدا مەن اقىلى جول ءتاريفى 2-3 ەسە وسپەيتىنىن، بىراق پايىز جاعىنان ارتاتىنىن مالىمدەيمىن»، – دەدى كولىك ءمينيسترى.

ونىڭ ايتۋىنشا، ءتاريفتى وسىرۋگە قاتىستى قۇجات «اشىق نقا» پورتالىندا جاريالانىپ، 14 كۇن تۇرادى.

«بارلىعىن قوعاممەن تالقىلايمىز. تالقىلاۋدى ناۋرىزدا باستاۋدى جوسپارلاپ وتىرمىز»، – دەدى مارات قاراباەۆ.

جالپى، اقىلى جولداردا ءجۇرۋ اقىسى 7 كۇن ىشىندە تولەنۋگە ءتيىس، 8-ءشى كۇنى ايىپپۇل سالىنادى. بىلتىر كولىك مينيسترلىگى وسىنداي ەسكەرتۋ جاساعان.

كولىك ءمينيسترى مارات قاراباەۆتىڭ ايتۋىنشا، ەلدە 3 200 شاقىرىم اقىلى جۇيە ەنگىزىلگەن. ال قازىر سالىنىپ بىتكەن جول ساپاسىن ارتتىرۋ ءۇشىن جىلىنا 60 ملرد تەڭگە قاجەت ەكەنىن ايتتى. بۇل قاراجاتتى اقىلى جولدار جۇيەسىن ەنگىزۋ ارقىلى تابۋعا بولاتىنىن دا اتاپ وتكەن بولاتىن.

دەرەك بويىنشا تولەم جاساۋدىڭ 20-دان استام ءادىسى قاراستىرىلعان. اتاپ ايتقاندا، QAJ mobile ءموبيلدى قوسىمشاسى، Kaspi.kz, Kiwi-ءاميان، Forte Bank ارقىلى جانە ت.ب.

Abai.kz