«Westoil Software» جشس كەشە ەرەۋىل ۇيىمداستىرىپ جاتقان جۇمىسشىلارعا ۇندەۋ جاساعان ەدى. ماڭعىستاۋ وبلىستىق اپەللياتسيالىق سوت القاسىنىڭ جانە قاراقيا اۋداندىق سوتىنىڭ شەشىمىن باسشىلىققا الىپ، جۇمىسشىلاردى ءوز قىزمەتتەرىنە قايتا شاعىرعان.

ءبىز بۇگىن الەۋمەتتىك جەلىدەگى ءبىرلى-جارىم پىكىردى وقىرمان تالقىسىنا ۇسىنىپ وتىرمىز.

كەنجەعالي سۇيەۋوۆ:

- مەن ماڭعىستاۋ تۇرعىنىمىن. وسى اۋىلدى تۋس-ءوستىم. ماڭعىستاۋدا بولىپ جاتقان 72 كۇندىك ەڭبەك داۋىنا نەمقورلى قاراي المايمىن.

زاڭ بويىنشا اكىمشىلىك مەكەمەنىڭ جۇمىسىنا ارالاسا المايدى. سونىڭ وزىندە وبلىستىق اكىمشىلىكتىڭ الدىندا، جەتىبايدان كەلگەن قاريالاردىڭ الدىنا وبلىس اپارات باسشىسى ا. قالمۋراتوۆ شىعىپ، ەڭبەك داۋى زاڭ شەڭبەرىندە شەشىلۋى قاجەت ەكەنىن ايتقان. ول ءۇشىن جۇمىسشىلار ەڭبەك قورعاۋ دەپارتامەنتىنە، پروكۋراتۋراعا، سوتقا ارىز جازۋعا قۇقىلى.

بىراق تا «ۆەست ويل» كومپانياسىنىڭ جۇمىسشىلارى: «ءبىزدى كمگ-عا الىڭىز»، - دەپ قاتىپ قالعان. 30 جىل كاسىپوداقتا ءجۇرىپ، ءارتۇرلى جاعدايلاردى كورگەنبىز. وكىنىشكە وراي، ءار ءتۇرلى ادامدار ءوز پايداسىن ويلاپ، حالىقتى پايدالانىپ، وزدەرى جازادان قۇتىلىپ كەتەدى. ونى ءبىز 2010 جىلى قاراجانباستا، قۇرىقتا، ەرساي كومپانياسىندا. 2011 جىلى جاڭاوزەن وقيعاسىندا كورگەنبىز. «ەكى ارادا شىبىن ولەدى» دەپ، قانسىرايتىن حالىق.

سول سەبەپتەن، ماسەلەنى زاڭ تۇرىندە شەشۋ قاجەت. ءاربىر ادامنىڭ ارتىنان ەرمەي، جۇمىسشى ءوز قارا باسىن ويلاۋ كەرەك! ۇكىمەت ءوز جاعىنان ارەكەت ىستەپ جاتىر، 72 كۇن جۇمىسقا شىقپاعانى ءۇشىن قر ەك 52 باپ، 8 تارماعىن قولدانباي كەلە جاتىر. بىراق تا زاڭ جۇمىس ىستەمەگەن جەردە حاوس بولادى. كوپ ۇزاماي ۇكىمەت تارتىپكە شاقىرادى. جۇمىسسىزدىق تىزىمىندە تۇرعان 20 000 ادام قازىر ءسىزدىڭ ورنىڭىزدى ارمانداپ تۇر. سول سەبەپتەن، ەڭبەك داۋى ۇشىعىپ كەتپەي تۇرعاندا، اقىلعا سالىپ جۇمىستى جالعاستىرعان ءجون. بولماعان جاعدايدا جۇمىسىڭىزدان ايىرىلىپ قالاسىز.

مانەت شىراقباي:

- مەن انامىن! مەن ەلىمنىڭ تىنىشتىعى، ازاماتتاردىڭ اماندىعى مەن قاتار قوعامداعى جۇمىسسىزدىق ماسەلەسىنىڭ تۇبەگەيلى جويىلۋىن تىلەيمىن.

وسى كۇنگە دەيىن جۇمىسقا شىقپاي تۇرعان ءىنى-باۋىرلارىمدى، بالالارىمدى اقىلعا كەلۋگە شاقىرامىن! قانداي ماسەلە بولسا دا زاڭ شەڭبەرىندە شەشىلۋى كەرەك. سەندەردىڭ وتباسىلارىڭدى كىم اسىرايدى؟.. قانشاما ادام جۇمىسسىز ءجۇر؟.. سەندەر قول جەتكەن جۇمىستى، شىنىندا قانشاما وتباسى اڭساپ وتىر. جۇمىسسىزدىقتىڭ قيىندىعى قىسىپ تۇرعاندا، بۇل ازاماتتاردىڭ وتباسىن اسىراۋ ءۇشىن ورىندارىڭا بارۋعا بىردەن كەلىسەدى. سىزدەردە بار بالا-شاعا ولاردا دا بار. دەگەنمەن، سىزدەردى ازىرگە ەشكىم قۋىپ جاتقان جوق، مەكەمە شىداپ وتىر. نەگىزگى تالاپتارىڭدى جۇمىس جاساي ءجۇرىپ شەشۋگە بولادى. ىمىراعا كەلىڭىزدەر. اينالايىندار، ساق بولىڭىزدار! ەڭ ءبىرىنشى وتباسىڭىزعا كەرەك ەكەندەرىڭدى ۇمىتپاڭىزدار!

Abai.kz