ناعىز ۇلت كوسەمى ءاليحان بوكەيحاندى لايىقتى دەڭگەيدە ۇلىقتايىق! كەشە ءماجىلىستىڭ جالپى وتىرىسىندا «اق جول» فراكتسياسىنىڭ دەپۋتاتتىق ساۋالىن ازات پەرۋاشەۆ جاريالادى. 

قازاقستان رەسپۋبليكاسىنىڭ
پرەمەر-ءمينيسترى
و.بەكتەنوۆكە!

كۇنى كەشە عانا 5 ناۋرىزدا بارشامىز حح عاسىردىڭ باسىنداعى قازاقتىڭ ۇلت كوسەمى، «الاش» رەسپۋبليكاسىنىڭ نەگىزىن قالاۋشىسى جانە باسشىسى، قازاقستاننىڭ قازىرگى مەملەكەتتىلىگىنىڭ حابارشىسى – ءاليحان بوكەيحاننىڭ تۋعان كۇنىن اتاپ وتتىك.

بۇل كۇن رەسمي مەرەكە بولماسا دا، مىڭداعان ۇلتجاندى ازاماتتار، ونىڭ ىشىندە «اق جول» دەمپارتياسىنىڭ مۇشەلەرى، ءبىر-بىرىنە وسى داتاعا ارنالعان قۇتتىقتاۋلار جىبەرىپ جاتتى.

2016 جىلى، ءاليحان بوكەيحاننىڭ 150 جىلدىعى يۋنەسكو باس اسسامبلەياسىنىڭ شەشىمى نەگىزىندە دۇنيەجۇزىلىك دەڭگەيدە اتاپ وتىلگەنى بەلگىلى.

سوندا دا، «ەسكى» قازاقستاننىڭ بيلىگى، ءاليحان بوكەيحان مەن «الاش» رەسپۋبليكاسىنىڭ اتاۋلارى مەن ىستەرىن ءۇنسىز قالدىرۋعا تىرىسىپ، اتالعان مەرەيلى ءىس-شارالار لايىقتى تۇردە وتكىزىلمەدى.

سونىمەن قاتار، 2019 جىلعا دەيىن، «اق جول» فراكتسياسىنىڭ «الاش» جونىندەگى ساۋالدارىمىز جاريالانعان سايىن، ءبىزدى بۇل تاقىرىپتى كوتەرمەۋگە كوندىرۋگە تىرىستى.

تەك، جاڭا ءداۋىردىڭ كەلۋىمەن عانا، «الاش» تاقىرىبى مەن الاش ارىستارىنىڭ ەرلىگى رەسمي دەڭگەيدە مويىندالىپ، قولداۋعا يە بولدى.

كەلە جاتقان، 2026 جىلى اليحاننىڭ 160 جىلدىعىنىڭ قارساڭىندا، «اق جول» دەمپارتياسى ۇكىمەتكە وسى جول بۇل مەرەيلى داتانىڭ لايىقتى باعدارلاماسىن دايارلاۋدى ۇسىنۋدا.

ءبىزدىڭ ويىمىزشا، سول باعدارلامادا رەسپۋبليكا تاۋەلسىزدىگىنىڭ، زاماناۋي قازاق مەملەكەتتىلىگىنىڭ، جەر تۇتاستىعىنىڭ تاريحي تامىرى مەن وزەكتىلىگىن ناسيحاتتاۋىمىز قاجەت.

سونىمەن قاتار، حح عاسىردىڭ باسىندا، ازاتتىق پەن جەر تۇتاستىعى ءۇشىن كۇرەسكەن الاش وردا ارىستارىنىڭ تاريحي ورنىن دا كورسەتكەنىمىز ءجون.

وسىعان قوسا، «الاش» عىلىمي-زەرتتەۋ ينستيتۋتىنىڭ ۇسىنىستارىن دا جىبەرۋدەمىز.

قۇرمەتپەن،

«اق جول» فراكتسياسىنىڭ دەپۋتاتتارى

ا.پەرۋاشەۆ،
د.ەسپاەۆا،
ق.يسا،
ە.بارلىباەۆ،
ا.سادىكوۆ،
ە.بەيسەنباەۆ.

Abai.kz