كەشە ەۋروپارلامەنت ارمەنياعا ەو-عا كانديدات بولۋ ستاتۋسىنا قاتىستى قاراردى قاراستىردى. بۇل ارمەنياعا الداعى ۋاقىتتا ەو-عا كىرۋگە كانديدات ستاتۋسىن بەرۋگە مۇمكىندىك اشاتىن العاشقى قارار.

قاراردى 504 دەپۋتات قولدادى، 4 دەپۋتات قارسىلىق ءبىلدىرىپ، 32 دەپۋتات قالىس قالعان.  ەو ارمەنياعا ەكونوميكالىق رەفورما جاساۋعا كومەكتەسەتىنىن مالىمدەدى.

ارمەنياعا قاتىستى قابىلدانعان قارارعا رەسەيدىڭ بۇۇ-داعى وكىلدەرى بۇلقان-تالقان بولۋدا.

«تەك ۋكراينا عانا ەمەس، ارمەنيا، مولدوۆا، ءتىپتى، افريكانى قوسا العاندا باسقا ەلدەر دە ەۋروپالىق وداق بارلىق جەردە قولداناتىن «انتيرەسەيلىك گەوساياسي وپتيكا» ءۇشىن جۇزدەگەن مىڭ ادامنىڭ ءومىرىن قۇربان ەتەدى». بۇل  بۇۇ قاۋىپسىزدىك كەڭەسىنىڭ وتىرىسىندا رەسەيدىڭ ۇيىم جانىنداعى تۇراقتى وكىلىنىڭ ءبىرىنشى ورىنباسارى دميتري پوليانسكيدىڭ ايتقان ءسوزى.

بۇل رەسەيدىڭ ءتۇرلى لاۋازىمدى شەندىلەرىنىڭ «انتيرەسەيلىك ساياسات» ءۇشىن اشىق گەنوتسيدپەن قورقىتىپ وتىرعان العاشقى ءسوزى ەمەس.

«ەو ءوزىن بىتىمگەرشى جانە دەلدال رەتىندە تانىستىرۋعا بارىنشا تىرىسادى. ءتىپتى ۋكرايناعا قاتىستى دا وسى ريتوريكانى ۇستانۋعا تىرىسۋدا. ال شىنداپ كەلگەندە ەو ۋكرايناداعى قاقتىعىستى توقتاتقىسى كەلە مە؟» - دەيدى پوليانسكي.

وسىعان بايلانىستى پوليانسكي بۇل ماسەلەمەن «باستاپقى دەرەككوزگە»، ياعني، كەڭەس وتىرىسىنا قاتىسىپ وتىرعان ەو ديپلوماتياسىنىڭ باسشىسى جوزەپ بوررەلگە جۇگىنۋدى ۇسىنادى.

پوليانسكيدىڭ پىكىرىنشە، «ەۋرووداق ۋكرايناداعى جانجالدى رەتتەۋ ءۇشىن ەمەس، ول ارقىلى رەسەيگە مەيلىنشە كوپ زيان كەلتىرۋ ءۇشىن، ونىڭ ستراتەگيالىق جەڭىلىسىنە قول جەتكىزۋ ءۇشىن جۇمىس ىستەپ وتىر».

ايتا كەتەيىك، جاقىندا ارمەنيانىڭ سىرتقى ىستەر ءمينيسترى ارارات ميرزويان «TRT World» تەلەارناسىنا بەرگەن سۇحباتىندا ءوز ەلىنىڭ ەۋرووداققا كىرۋ ماقساتىن مالىمدەگەن بولاتىن.

ارميان دەرەككوزدەرىنىڭ دەرەكتەرى بويىنشا، پرەمەر-مينيستر نيكول پاشينيان ءوز كومانداسىنا بيىلعى كۇزدە ەو-عا مۇشەلىككە رەسمي ءوتىنىم بەرۋگە دايىندالۋدى تاپسىرعان.

رەسەي وكىلدەرى «باتىستى وڭىرگە تارتقانى» ءۇشىن ارمەنيانى بىرنەشە رەت قورقىتىپ: «ماسكەۋ وربيتاسىنان شىعۋ ارەكەتتەرى ارمەنيانى كارتادان مەملەكەت رەتىندە الىپ تاستاۋمەن اياقتالادى»، - دەپ ەسكەرتكەن.

اتاپ ايتقاندا، رەسەي ارمەنيانىڭ ازەربايجانمەن شەكاراسىن باقىلاۋ ءۇشىن ەۋرووداقتىڭ ازاماتتىق باقىلاۋ ميسسياسىنىڭ ەلگە كەلۋىن «ءوز مۇددەلەرىنە قاتەر» دەپ اتادى.

ماسكەۋ: «باتىس رەسەيدى وڭتۇستىك كاۆكاز ايماعىنان ارمەنيا ارقىلى ىعىستىرعىسى كەلەدى»، - دەپ مالىمدەيدى.

Abai.kz