ناۋرىزدىڭ سوڭعى ونكۇندىگىندە قىسقى قاردىڭ كۇرت ەرۋىنەن ەلدىڭ بىرقاتار ءوڭىرىن سۋ باسىپ جاتىر.  قر تجم رەسپۋبليكالىق جەدەل شتابىنىڭ ۇيلەستىرۋىمەن قولعا الىنعان قۇتقارۋ جۇمىستارى تۇندە دە توقتاعان جوق.

كەشە ەلىمىزدىڭ بىرقاتار وڭىرىندە توتەنشە جاعداي رەجيمى جاريالاندى. اتاپ ايتقاندا: اباي، ورال، باتىس قازاقستان، اقتوبە، اقمولا، قوستاناي وبلىستارىندا جاعداي كۇردەلى. وسى اتالعان ايماقتاردىڭ ىشىندە اقتوبە مەن قوستاناي وبلىستارىندا جاعداي وتە كۇردەلى.

سۋرەت ۆيكيپەديادان الىندى

قوستاناي وبلىسى

ارقالىق قالاسىنىڭ ماڭىنداعى 9 قىستاقتىڭ تۇرعىندارى ەۆاكۋاتسيالانعاندى. قالاداعى اۆاريالىق-قۇتقارۋ جۇمىستارىن جۇرگىزۋگە جاردەمدەسۋ ءۇشىن شقو تجد كۇشتەرى مەن قۇرالدارى جىبەرىلدى.

وسى وبلىستاعى جانكەلدين اۋدانىنداعى شەگەن – اقشىعاناق، شۇبالاڭ مەن ا. بايتۇرسىنۇلى اۋىلدارىنا قاتىناس ۋاقىتشا توقتاتىلىپ، كولىكتەردىڭ جۇرۋىنە شەكتەۋ قويىلدى.

سونىمەن قاتار، ساعا، ءتاۋىش، كولقامىس اۋىلدارىنداعى جەرگىلىكتى حالىق باس بىرلىكتەرىن تانىتىپ، ءوز الدەرىنشە قارەكەت جاساپ جاتىر.

تابيعاتتىڭ توسىن مىنەزىنە تاپ بولعان تورعايلىقتار ەسەڭگىرەپ قالعانىمەن سابىرلىق تانىتىپ، جۇدىرىقتاي جۇمىلا ءبىلدى.

سۋرەت ۆيكيپەديادان الىندى

اقتوبە وبلىسى

اقتوبە وبلىسىندا تجم كۇشىمەن اقتوبە اۋەجايىنىڭ جۇمىسى قالپىنا كەلتىرىلدى. كۇنى بويى اۋە ايلاعىنىڭ اۋماعىندا اقتوبە ءوڭىرىنىڭ قۇتقارۋشىلارى سۋ ايداۋ جۇمىستارىن جۇرگىزدى.

بۇگىندەرى تەمىر، بايعانين، قوبدا، مۇعالجار اۋداندارى اۋماعىنداعى بىرنەشە اۋىلدارعا سۋ تاسقىنى قاۋپى ءتونىپ، كەيبىر شەتكى اۋىلداردا بىرنەشە ۇيلەرگە سۋ كىردى. بۇل اۋىلداردا پوليتسەيلەر مەن قۇتقارۋشىلار اۋىل تۇرعىندارىمەن بىرلەسىپ، اعىن سۋ باعىتىن بۇرۋ جانە بوگەۋ، جينالعان سۋلاردى شىعارۋ، ينەرتتىك ماتەريال توسەۋ شارالارىن تاۋلىك بويى اتقارۋدا.

كەشەلى بەرى باتىس قازاقستان وبلىسىنىڭ تەرەكتى اۋدانىنىڭ اڭقاتى اۋىلى ءۇشىن اۋىر كۇن بولدى. ەرىگەن قار ۇستىنە كەشە كۇنى بويى جاۋعان جاڭبىر قوسىلىپ، كوشەلەرگە سۋ تولدى. بۇرۋ ارناسىنا سىيماعان قىزىل سۋ اۋىل شەتىندەگى 16 ۇيگە لاپ بەردى.

قازىرگى ۋاقىتتا سۋ تاسقىنىنا قارسى جۇمىستارعا تجد مەن جاو-نىڭ 659 ادام، 208 بىرلىك تەحنيكا، 123 بىرلىك موتوپومپاسى جۇمىلدىرىلدى. بۇل تۋرالى بقو تجد ءباسپاسوز قىزمەتى حابارلادى.

سۋرەت ۆيكيپەديادان الىندى

ورال

قازىرگى ۋاقىتتا ورالدا توتەنشە جاعداي جاريالاندى.

بۇدان باسقا وبلىستا 70 ءۇي سۋعا كەتكەن: ورال قالاسىندا - 19, بايتەرەك اۋدانىندا - 10, تاسقالا اۋدانىندا - 4, تەرەكتى اۋدانىندا 37 ءۇي. سونىمەن قاتار 255 اۋلانى سۋ باسقان. بۇل تۋرالى بۇگىن بۇقارالىق اقپارات قۇرالدارى وكىلدەرىنە وتكىزگەن بريفينگتە وبلىس اكىمىنىڭ ورىنباسارى قاليار ايتمۇحامبەتوۆ مالىمدەدى.

سۋرەت ۆيكيپەديادان الىندى

ۇلىتاۋ وبلىسى

قولدا بار مالىمەتتەر بويىنشا كەشە تۇنگى ساعات 22:30-دا ۇلىتاۋ سەلوسىنان 70 شاقىرىم جەردەگى تالدىساي ەلدىمەكەنىندە قاردىڭ قارقىندى ەرۋىنە جانە جەر استى سۋلارىنىڭ كوتەرىلۋىنە بايلانىستى 8 جەكە ءۇي سۋ استىندا قالىپ، سۋ دەڭگەيى 50 سم-گە جەتىپ، جەزدى كەنتىنە 20 ادام (ونىڭ ىشىندە 5 بالا جانە 7 ايەل) ەۆاكۋاتسيالاندى.

ءدال وسى ۋاقىتتا 28 ناۋرىزعا قاراعان ءتۇنى ۇلىتاۋ اۋدانىنا قاراستى جەزدى كەنتىندە 10-عا جۋىق ءۇيدى سۋ باسىپ، ىزىنشە سول ءۇيدىڭ تۇرعىندارى جانە جاقىن اۋماقتاعى باسپانالار، باس اياعى 26 وتباسى ەۆاكۋاتسيالاندى. قازىرگى ۋاقىتتا كەنتتىڭ جاتاقحاناسىنا ورنالاستىرۋ جۇمىستارى قولعا الىندى.

سۋرەت ۆيكيپەديادان الىندى

اباي وبلىسى

اقسۋات اۋدانىنداعى بوعاس وزەنى دەڭگەيىنىڭ كوتەرىلۋىنە بايلانىستى اۋدان ورتالىعىنان 120 كم قاشىقتىقتا ورنالاسقان 662 تۇرعىن، 147 ءۇي بار كىندىكتى اۋىلىنا اپاراتىن كوپىردىڭ جول توسەمىن قىزىلسۋ شايىپ كەتتى. 27 ناۋرىز كۇنى قاردىڭ قارقىندى ەرۋىنە جانە كۇننىڭ كۇرت جىلىنۋى سالدارىنان بارشاتاس اۋىلدىق وكرۋگىندەگى بالعا وزەنىنىڭ سۋ دەڭگەيى كوتەرىلدى. ۋاقىتىلى سۋ جيەكتەرى كوتەرىلىپ، ينەرتتى ماتەريال توگىلدى. قازىرگى ۋاقىتتا سۋ تارتىلىپ، اۋىلعا قاۋىپ جوق.

اياگوز اۋدانىندا قازىرگى ۋاقىتتا بىردەن ەكى باعىتتا سۋدا جوعالىپ كەتكەن ءۇش ەر ادامدى ىزدەستىرۋ ارەكەتى جالعاسۋدا

اتاپ ايتساق، 23 ناۋرىزدان باستاپ 1977 جىلى تۋعان ەر ادامدى ىزدەۋ جۇمىستارى جۇرگىزىلۋدە، ول اياگوز وزەنىنەن وتپەكشى بولعان كەزدە، اتتان قۇلاپ، سۋعا كەتكەن دەپ بولجانۋدا. ەر ادام ات ۇستىندە ءوزى جۇمىس اتقاراتىن «شىعىس» شارۋا قوجالىعىنا بارماقشى بولعانى انىقتالىپ وتىر.

ال، 26 ناۋرىزدان باستاپ 1957 جانە 1985 جىلى تۋعان تاعى ەكى ازاماتتى ىزدەستىرۋ جۇرگىزىلۋدە، ولار «متز 82» ماركالى تراكتوردا بورلى وزەنىنەن ءوتۋ كەزىندە سۋدا جوعالىپ كەتكەنى ءمالىم بولدى.

كەشە 18 ساعات 26 مينۋتتا سەمەي قالاسىنىڭ قم مي-17 تىكۇشاعى بورلى وزەنى بويىن اەروۆيزۋالدى قاراۋعا اۋەگە ۇشتى. الايدا، اۋماقتى زەرتتەۋ ناتيجە بەرمەدى.

قازىرگى ۋاقىتتا ىزدەۋ-قۇتقارۋ جۇمىستارى تاۋلىكتىڭ قاراڭعى ۋاقىتىنىڭ باستالۋىنا بايلانىستى ۋاقىتشا توقتاتىلدى.

بۇگىن تاڭعى ساعات 06-دان باستاپ ىزدەۋ جۇمىستارىن قايتا قولعا الىندى.

Abai.kz