ءماجىلىس دەپۋتاتتارى سۋ تاسقىنىنان زارداپ شەككەن وڭىرلەردە جۇمىسىن جالعاستىرۋدا. قازىرگى ۋاقىتتا ەلدىمەكەندەرگە قاجەتتى كومەك كورسەتىلىپ جاتىر. سۋدى بۇرۋ، تۇرعىنداردى ەۆاكۋاتسيالاۋ جۇمىستارى جۇرگىزىلۋدە.

سۋرەت ءماجىلىس باسپاسوزىنەن الىندى

ماجىلىسمەن نۇرجان اشىمبەتوۆ پاۆلودار وبلىسىنىڭ تۇرعىندارىمەن جانە جەرگىلىكتى قۇرىلىمداردىڭ وكىلدەرىمەن كەزدەستى. دەپۋتات مىڭقۇل جانە پەتروپاۆلوۆكا اۋىلدارىنداعى جاعدايمەن تانىستى. مۇندا قۇتقارۋشىلار، جەرگىلىكتى بيلىك پەن تۇرعىندار بىرلەسىپ جۇمىس ىستەۋدە. اۋدان، اۋىل اكىمدىكتەرى سۋ تاسقىنىنىڭ سالدارىن جويۋ جانە بۇزىلعان ينفراقۇرىلىمدى قالپىنا كەلتىرۋ بويىنشا قاجەتتى شارالاردى قابىلداۋدا.

سۋرەت ءماجىلىس باسپاسوزىنەن الىندى

قوستاناي وبلىسىندا دا سۋ تاسقىنى قاۋپى ءالى دە بار. وسى اپتادا وڭىرگە ءماجىلىس دەپۋتاتى ولجاس قۇسپەكوۆ بارىپ، سۋ باسۋ قاۋپى بار ايماقتار مەن شەكارالاس وڭىرلەردى ارالادى.

– قوستانايدا سۋ تاسقىنىنىڭ سالدارىن جويۋ جۇمىستارى ءجۇرىپ جاتىر. ەرىكتىلەر، مەملەكەتتىك ورگاندار مەن پارتيا مۇشەلەرى قالا جاعالاۋلارىندا سۋ تاسقىنىنا قارسى ءىس-شارالاردى ازىرلەۋدە. جاعالاۋدى نىعايتۋ جۇمىستارى قارقىندى جۇرگىزىلىپ، مىڭنان استام قاپ ينەرتتى ماتەريال دايىندالىپ، 700-گە جۋىعى توسەلدى، - دەدى دەپۋتات.

سۋرەت ءماجىلىس باسپاسوزىنەن الىندى

ماجىلىسمەن قوستاناي اۆتوموبيل كولىگى كوللەدجىنىڭ جاتاقحاناسىندا دا بولىپ، سۋ تاسقىنىنان زارداپ شەككەندەردى ورنالاستىرۋعا دايىندىعىن تەكسەردى. دەپۋتات سۋ تاسقىنىنىڭ قاۋىپسىز ءوتۋىن قامتاماسىز ەتۋگە كەشەندى شارالاردى جۇزەگە اسىرۋ ءۇشىن وزەن ارنالارىن تازارتۋ، قورعانىس بوگەتتەرىن نىعايتۋ، اپاتتى گيدروتەحنيكالىق قۇرىلىستاردى جوندەۋ شارالارىن ۋاقىتىلى قارجىلاندىرۋ قاجەتتىگىن اتاپ ءوتتى.

بۇگىن سونداي-اق ءبىر مانداتتى وكرۋگ بويىنشا سايلانعان دەپۋتات ابزال قۇسپان باتىس قازاقستان وبلىسىنداعى اپاتتان زارداپ شەككەندەرگە ارنالعان گۋمانيتارلىق كومەك قويماسىندا بولدى. دەپۋتات پەن ەرىكتىلەردىڭ ايتۋىنشا، ورالعا 10 تونناعا جۋىق ازىق-تۇلىك پەن قاجەتتى زاتتار جەتكىزىلگەن. وبلىس تۇرعىندارى مەن كاسىپكەرلەردەن جانە ەلىمىزدىڭ وزگە وڭىرلەرىنەن كومەك جىبەرىلىپ جاتىر. وسىنىڭ بارلىعى سۋ باسقان ايماقتارداعى حالىققا تاراتىلادى. جولدى سۋ شايىپ كەتكەن ەلدىمەكەندەرگە تىكۇشاقپەن جەتكىزىلەدى. اكىمدىكتىڭ رەسمي چاتتارى، ەرىكتىلەر مەن قۇتقارۋشىلار ارقىلى تۇرعىندارمەن بايلانىس جاسالىپ وتىرادى. دەپۋتات ابزال قۇسپان جاعداي تۇراقتالعانشا وبلىستا بولادى.

سۋرەت ءماجىلىس باسپاسوزىنەن الىندى

جەم وزەنىندەگى سۋ دەڭگەيىنىڭ كوتەرىلۋىنە بايلانىستى جىلىوي اۋدانىندا دا 2680 تۇرعىن ءۇي مەن اكىمشىلىك عيماراتتى سۋ باستى. قۇلسارى قالاسى بويىنشا حالىقتى حاباردار ەتۋ ءۇشىن 5 رەت دابىل سيرەناسى ىسكە قوسىلدى.

وسى جاعدايعا وراي ءماجىلىس دەپۋتاتى دۇيسەنباي تۇرعانوۆ اتىراۋ وبلىسى قۇلسارى قالاسىنا باردى. الدىمەن ول قاراتون اۋىلىندا بوگەت تۇرعىزىپ جاتقان اۋىل حالقىمەن كەزدەسىپ، بوگەتتەردى نىعايتۋ جۇمىستارىنا دا قاتىستى.

– اپات اياسىندا ۇكىمەت جۇمىستى كۇشەيتىپ، سۋ تاسقىنى زارداپتارىن جويۋ ءۇشىن ءتيىستى شارالاردى قابىلداپ جاتىر. پرەمەر-مينيستر باسقاراتىن رەسپۋبليكالىق شتاب قۇرىلدى. ۇكىمەت باسشىسى دا، ونىڭ ورىنباسارلارى دا، توتەنشە جاعدايلار ءمينيسترى دە زارداپ شەككەن وڭىرلەردى ارالاپ ءجۇر. بارلىق جەرگىلىكتى قۇتقارۋ جۇمىسى مەملەكەت باسشىسىنىڭ جەكە باقىلاۋىندا، – دەدى دۇيسەنباي تۇرعانوۆ.

سۋرەت ءماجىلىس باسپاسوزىنەن الىندى

قۇلسارى قالاسىنىڭ تۇرعىندارىن ەۆاكۋاتسيالاۋ جالعاسۋدا. 5 ساۋىردەن باستاپ بارلىعى 15 632 ادام ەۆاكۋاتسيالاندى، ونىڭ ىشىندە 5 055-ءى بالا. قۇلسارى قالاسىنىڭ ەۆاكۋاتسيالانعان تۇرعىندارىنىڭ ءبىر بولىگى ءوز ەرىكتەرىمەن تۋىستارىنا بارۋ ءۇشىن ماڭعىستاۋ وبلىسىنىڭ ەلدىمەكەندەرىنە كەتتى.

بوگەتتەردى نىعايتۋ جۇمىستارى كۇشەيتىلىپ جاتىر. جالپى 1 ءساۋىر مەن 6 ءساۋىر ارالىعىندا 45 902 قاپشىق، 174 342 توننا ينەرتتى ماتەريال توسەلدى.

سۋرەت ءماجىلىس باسپاسوزىنەن الىندى

ءماجىلىس دەپۋتاتى بۇدان سوڭ حالىقتىڭ قاۋىپسىزدىگىن قامتاماسىز ەتۋ ءۇشىن قۇلسارى قالاسىندا اشىلعان شتاب جۇمىسىمەن تانىستى،  اۋدان اكىمىنىڭ ورىنباسارىمەن كەزدەستى.

قازىرگى ۋاقىتتا جالپى سانى 559 قىزمەتكەر، 148 بىرلىك تەحنيكا، 2 ءجۇزۋ قۇرالى جانە 500 ەرىكتى جۇمىلدىرىلدى.

Abai.kz