وتكەن اپتادا ورال قالاسى اكىمىنىڭ حابارلاسامىن جاريالاپ، قالانى سۋ باسۋ قاۋپى جوعارى ەكەندىگىن حابارلاعان بولاتىنبىز.

پرەمەر-ءمينيستردىڭ رەسمي اقپاراتتىق رەسۋرسىنىڭ حابارلاماسى بويىنشا وزەن سۋى جايىلعان جەرگە ورنالاسقان ساياجاي الاپتارى سۋ استىندا قالىپ، جايىق جانە شاعان وزەندەرىنىڭ ماڭىنداعى شاعىن اۋداندارعا سۋ جەتتى. ورال قالاسىندا سۋ تاسقىنىنا قارسى ءىس-شارالار كۇشەيتىلگەن رەجيمدە جۇرگىزىلۋدە.

قورعانىس قۇرىلىستارىن نىعايتۋ شارالارىنا وبلىس بويىنشا 10,6 مىڭنان استام ادام جانە قالا بويىنشا 6,4 مىڭ ادام، سونداي-اق قازاقستاننىڭ باسقا وڭىرلەرىنەن تارتىلعان 2 مىڭنان استام تەحنيكا جۇمىلدىرىلدى.

"ۆيتسە-پرەمەر قانات بوزىمباەۆ شارىقتاۋ شەگىنە جەتكەن سۋ تاسقىنىمەن كۇرەسۋ ءۇشىن ماڭعىستاۋ، اقتوبە وبلىستارىنان، استانا مەن الماتىدان تاعى 500 اسكەري قىزمەتشى مەن قۇتقارۋشىنى بقو-عا جىبەرۋدى تاپسىردى. ورالعا تجم جانە قورعانىس مينيسترلىگى بويىنشا 200 ادام كەلىپ، جۇمىسقا كىرىسىپ كەتتى", – دەپ جازىلعان حابارلامادا.

Abai.kz