بقو-دا 15 مىڭعا جۋىق ساياجاي ۋچاسكەسى سۋعا كەتتى
باتىس قازاقستان وبلىسىندا 14 839 ساياجاي ۋچاسكەسىن تاسقىن سۋ باستى. وبلىس اكىمىنىڭ ورىنباسارى تىلەپبەرگەن كايۋپوۆتىڭ ايتۋىنشا، سونىڭ ىشىندە 14 466-سى – ورال قالاسىندا، 112-ءسى – بايتەرەك، 245-ءى – ءبورلى، 16-سى تەرەكتى اۋدانىندا ورنالاسقان. بۇل تۋرالى قازاقپارات جازدى.
ونىڭ سوزىنە قاراعاندا، قازىرگى تاڭدا ساياجاي تۇرعىندارىنا كەلتىرىلگەن زالالدى وتەۋ وزەكتى ماسەلەلەردىڭ ءبىرى بولىپ وتىر.
ءۇيى سۋعا كەتكەن ساياجاي تۇرعىندارىنا بىرجولعى (100 اەك كولەمىندە) الەۋمەتتىك كومەك كورسەتىلۋدە. ولار ەۆاكۋاتسيالىق پۋنكتتەرگە ورنالاستىرىلدى.
وبلىس اكىمىنىڭ ورىنباسارى ءمالىم ەتكەنىندەي، زارداپ شەككەن تۇرعىندار ورال قالاسى اكىمدىگىنىڭ رەسمي سايتىندا كورسەتىلگەن مەكەنجايلارعا جانە ە-گوۆ-موبايل ءموبيلدى قوسىمشاسى ارقىلى ءوتىنىش قالدىرا الادى. كۇنى بۇگىن مۇمكىندىگىنە قاراي سۋعا كەتكەن ۇيلەرگە تەحنيكالىق تەكسەرىس جۇمىستارى جۇرگىزىلۋدە.
«قازىرگى تاڭدا اكىمشىلىك-اۋماقتىق بىرلىك اۋماعىندا توتەنشە جاعداي جاريالانعان كەزدە قر اۋماعىندا مەنشىك قۇقىعىندا باسقا تۇرعىن ءۇيى جوق مەنشىك يەلەرى ءۇشىن قيراعان نەمەسە ۋاقىتشا (ماۋسىمدىق) تۇرۋعا جارامسىز قۇرىلىستاردى تۇرعىن ۇيگە جاتقىزۋ بويىنشا زاڭعا وزگەرىس ەنگىزۋ جونىندە ەرەجە جوباسى ازىرلەنۋدە. وسى رەتتە اتالعان شىعىنداردى وتەۋ بويىنشا شارالار تۇرعىنداردىڭ تۇرعىن ءۇي جاعدايىن جاقسارتۋ ماقساتىندا ەمەس، توتەنشە جاعداي سالدارىن جويۋ بولىپ تابىلاتىندىعىن ەسكەرۋ قاجەت»، - دەدى ت.كايۋپوۆ.
ونىڭ اتاپ وتكەنىندەي، ساياجاي ءۇيى ءبىر عانا باسپاناسى بولعاندا عانا تۇرعىندارعا ءۇي بەرىلەدى. جاڭا ۇيلەردىڭ الاڭى قانشا ادام بولسا دا، 80 شارشى مەتردەن، قۇنى 22 ملن تەڭگەدەن اسپايدى. جاڭا ءۇي العان تۇرعىندار ساياجاي ۋچاسكەلەرىن مەملەكەت مەنشىگىنە تاپسىرادى. جەرلەر ورمان قورىنا بەرىلىپ، ول اۋماقتاردا قاۋىپسىزدىك ماقساتىندا تۇرعىن ءۇي سالىنبايدى.
Abai.kz
