يزرايل بيلىگى گازا تۇرعىندارىن رافاح قالاسىنان ەۆاكۋاتسيالاۋعا شاقىردى. قالادا ميلليوننان استام ادام تۇراقتاعان. يزرايل بيلىگى قالانى «حاماس-تىڭ سوڭعى بەكىنىسى» دەپ اتاپ، اسكەري وپەراتسيانى باستايتىنىن ايتۋدا. بۇل تۋرالى Mezgil.kz اقپاراتتىق پورتالى جازدى. 

Reuters اقپاراتتىق اگەنتتىگىنىڭ جازۋىنشا رافاحتاعى بوسقىندار تەلەفوندارىنا قالادان كەتۋ كەرەكتىگى جايلى حابارلاما كەلە باستاعانىن ايتۋدا. حابارلامانى اراب تىلىندە يزرايل بيلىگى جىبەرۋدە. سونىمەن بىرگە دروندار اۋەدەن قالاعا ۇنپاراقتار تاستاۋدا. يزرايل باستاپقىدا بوسقىندار قالادان 20 شاقىرىم قاشىقتىقتا ورنالاسقان بوسقىندار لاگەرىنە كەتۋى ءتيىس دەيدى.

ەۆاكۋاتسيا رافاحتىڭ سولتۇستىك اۋداندارىندا باستالعان. اقپارات كوزدەرى حالىقتىڭ باسىم كوپشىلىگى حان-ءجۇنىس پەن ءال-مۋۆاسسي ايماعىنداعى ارنايى تىگىلگەن لاگەرگە اتتانعانىن جازدى.

يزرايل پرەمەر-ءمينيسترى بينيامين نەتانياحۋ ايلار بويى رافاح وپەراتسياسىن باستايتىنىن ايتۋمەن كەلەدى. ءيزرايلدىڭ اقپارات كوزدەرى حاماس-تىڭ گازاداعى 24 باتالونىنىڭ 20-سىن جويعانىن ايتۋدا، ال قالعان 4 باتالون رافاحقا بەكىندى دەگەن اقپاراتتى تاراتۋدا. حاماس بۇل اقپاراتتى جوققا شىعارىپ، قارىمتا سوققى بەرۋ مۇمكىندىگىنىڭ جوعارى ەكەنىن مالىمدەدى.

قازىرگى ساتتە يزرايل مەن حاماس وكىلدەرى مىسىردا كەلىسسوز جۇرگىزۋدە. تاراپتار نەگىزگى ماسەلەلەر بويىنشا كەلىسە المادى. حاماس وكىلدەرى ناقتى شەشىم قابۋىلداۋ ءۇشىن، كاتارداعى كوشباسشىلارىمەن كونسۋلتاتسيا وتكىزۋ كەرەكتىگىن ايتتى. كەلىسسوزدە ۇرىس قيمىلدارىن 40 كۇنگە توقتاتۋ، تۇتقىن الماسۋ تالقىلانۋدا. يزرايل كەلىسىم جاسالسا دا، «رافاح وپەراتسياسىن» ىسكە اسىرۋ ماڭىزدى دەۋمەن كەلەدى.

كۇنى كەشە يزرايل بيلىگى ءال-جازيرا تەلەارناسىن جابۋ تۋرالى شەشىم قابىلدادى. ارنايى شەشىمنەن كەيىن يزرايلدەگى ارنانىڭ وفيسىندە ءتىنتۋ جۇمىستارى وتكەن. بۇۇ-نىڭ ادام قۇقىعى تۋرالى كوميسسياسى يزرايل بيلىگىنىڭ شەشىمىن ايىپتاپ، ارنانىڭ يزرايلدە بۇعاتتالۋىن «ءسوز بوستاندىعىن شەكتەۋ» دەپ اتادى.

ساراپشىلار يزرايل بيلىگى رافاح وپەراتسياسىن ىسكە اسىراتىنىنا سەنىمدى. اقش پەن يزرايل اراسىندا بۇل وپەراتسياعا قاتىستى كەلىسپەۋشىلىكتەر ارتقانىنا قاراماستان، نەتانياحۋ وپەراتسيانى جۇزەگە اسىرۋعا نيەتتى.

Abai.kz