قازاقستاندا رەني ءوندىرىسىن دامىتۋعا باعىتتالعان جاڭا ينۆەستيتسيالىق جوبا ىسكە اسپاق.

قازاقستان رەسپۋبليكاسى ونەركاسىپ جانە قۇرىلىس مينيسترلىگىندە جەزقازعانسيرەكمەت اق مەن ۇلىبريتانيانىڭ Maritime House Ltd. كومپانياسى اراسىندا قۇرامىندا رەني بار شيكىزاتتى قايتا وڭدەۋ جونىندەگى ۇزاق مەرزىمدى وفتەيك-كەلىسىمشارتقا قول قويىلدى.

مينيسترلىكتىڭ مالىمەتىنشە، بەس جىلعا جاسالعان كەلىسىمنىڭ جالپى قۇنى 107 ميلليون اقش دوللارىن قۇرايدى.

كەلىسىم اياسىندا ساران قالاسىندا قايتالاما شيكىزاتتان مەتالل رەني وندىرەتىن ءوندىرىس ىسكە قوسىلادى. جوبانىڭ ينۆەستيتسيالىق قۇنى – 30 ميلليون اقش دوللارى.

جوبا وندىرىستىك قۋاتتاردىڭ تۇراقتى جۇمىسىن قامتاماسىز ەتۋگە جانە تاراپتار اراسىنداعى ۇزاق مەرزىمدى ىنتىماقتاستىقتى دامىتۋعا باعىتتالعان.

ونەركاسىپ جانە قۇرىلىس مينيسترلىگىنىڭ مالىمەتىنشە، مۇنداي جوبالار شيكىزاتتى تەرەڭ وڭدەۋدى دامىتۋعا، جاڭا تەحنولوگيالاردى ەنگىزۋگە جانە جوعارى تەحنولوگيالىق وندىرىستەردى قالىپتاستىرۋعا مۇمكىندىك بەرەدى. سونىمەن قاتار، بۇل كەلىسىم قازاقستاننىڭ ەكسپورتتىق الەۋەتىن ارتتىرىپ، اسا ماڭىزدى مينەرالدار نارىعىنداعى پوزيتسياسىن نىعايتۋعا ىقپال ەتەدى.

Abai.kz