ستوكگولم قالاسىندا دۋلات يسابەكوۆتىڭ شىعارماشىلىعىنا ارنالعان ادەبي كەش ءوتتى.

بۇل – شۆەد ەلىندەگى قازاق ادەبيەتىن دارىپتەگەن تۇڭعىش شارا. بۇل ەلدە وسى ۋاقىتقا دەيىن، تىپتەن، ورتا ازيا ەلدەرىنىڭ دە ادەبيەتىنە ارنالعان كەش وتپەگەن ەكەن.

كەشكە شۆەد جازۋشىلار وداعى مۇشەلەرى، باسپا ۇيلەرىنىڭ رەداكتورلارى، ادەبي سىنشىلار، تەاتر ماماندارى، فيلولوگيا فاكۋلتەتىنىڭ وقىتۋشىلارى، ەلشىلىك پەن ءتۇرلى دياسپورا وكىلدەرى، قازاق قوعامى مەن باق وكىلدەرى قاتىستى.

شارا اياسىندا ونلاين رەجيمىندە اۆتورمەن سۇحبات جۇرگىزىلدى، ونىڭ ءومىرى مەن شىعارماشىلىعى بويىنشا دەرەكتى فيلم كورسەتىلدى.

كەشتە د.يسابەكوۆتىڭ شۆەد تىلىندە شىققان "Brännande Sol, Isande Vind, Levande Stäpp" كىتابى جونىندە سىنشىلار پىكىر ايتىپ، وقىرمان ءوز اسەرىن ورتاعا سالدى. اتالعان جيناققا جازۋشىنىڭ "گاۋھار تاس", "وكپەك جولاۋشى", ء"بىز سوعىستى كورگەن جوقپىز" سەكىلدى بەس حيكاياتى مەن ەكى اڭگىمەسى ەنگەن.

ستوكگولمدەگى قازاق دياسپوراسىنىڭ وكىلدەرى ونەر كورسەتتى.

كەشتەن كەيىن ۇيىمداستىرىلعان فۋرشەت كەزىندە قوناقتاردىڭ دۋلات يسابەكوۆتىڭ تۋىندىلارى جونىندەگى وڭ پىكىرلەرى جالعاسىن تاۋىپ جاتتى. اسىرەسە، "وكپەك جولاۋشىداعى" جالعىزدىق تاقىرىبى كوپ قوزعالدى.

شۆەد زيالى قاۋىمى يسابەكوۆتىڭ پەسالارىن ءوز ەلىندە ساحنالاۋ، ونىڭ شىعارمالارىنىڭ جەلىسىمەن تۇسىرىلگەن فيلمدەردى قازاق تىلىندە اعىلشىنشا سۋبتيترمەن كورسەتۋ، پوۆەستەرىن جەكە-جەكە كىتاپشا ەتىپ شىعارىپ، مەكتەپتەرگە تاراتۋ بويىنشا ۇسىنىستار ايتۋدا. قازاق ادەبيەتىنىڭ اپتالىعىن ۇيىمداستىرۋ، قازاق-شۆەد ادەبي بايلانىسىن نىعايتۋ جونىندە دە يدەيا قوزعالدى.

بۇعان دەيىن رەسەي، گرۋزيا، كورەيا، تۇركيا، بولگاريا، انگليا، اۆستراليا ەلدەرىن باۋراعان تۋىندىلار، ەندىگى جەردە سكانديناۆيا ەلدەرىندە دە ءوز باعاسىن الدى.

الداعى ۋاقىتتا شۆەد وقىرماندارىنان تالاي پىكىرلەر جازىلىپ، يسابەكوۆ الەمىنەن رۋحاني ءلاززات الارىنا سەنىم مول.

ول پىكىرلەر اۋدارىلىپ، قازاق حالقىنا دا جول تارتاتىن بولادى. سولاردىڭ ءبىرى – تانىمال سىنشى يۋكيكو دۋكەنىڭ پىكىرىنەن ءۇزىندى:

Dulat Isabekov är en modern representant för
det historiska Kazakstan, som till stor del bevarat
sina urgamla traditioner till vår egen tid. Härifrån
har han hämtat sin inspiration och sina gestalter.
”Med en stor portion ömhet tecknar Isabekov sina
porträtt av stoiska och kraftfulla människor som
uthärdar prövningar med jämnmod. Med sin lyris-
ka prosa och sitt intresse för vanliga människors liv
ansluter Isabekov till den stora ryska, litterära tra-
ditionen med namn som Gogol och Gorkij.”
Yukiko Duke

"دۋلات يسابەكوۆ – ءداستۇر-سالتىن وسى زامانعا دەيىن ساقتاعان تاريحي قازاقستاننىڭ زاماناۋي وكىلى. ول شابىتى مەن كەيىپكەرلەرىن ءوز داۋىرىنەن الادى.

يسابەكوۆ ءوز شىعارمالارىندا تاعدىر سىناقتارىنا ءتوزىمدى قاراپايىم دا ۇلى ادامداردىڭ بەينەسىن اسقان شەبەرلىكپەن سومدايدى. ونىڭ ليريكالىق پروزاسىنداعى قاراپايىم ادامداردىڭ ومىرگە قۇشتارلىعىن سۋرەتتەۋى ورىستىڭ ۇلى جازۋشىلارى گوركي مەن گوگول شىعارماشىلىعىمەن استاسادى". يۋكيكو دۋكە

جەرگىلىكتى باق وكىلدەرى كەش جونىندەگى ماتەريالداردى جاريالاۋدا.

Abai.kz