18 ماۋسىم كۇنى كۇندىز كيەۆتە قازاق ءجۋرناليسى ايدوس سادىقوۆقا شابۋىل جاسالعانىن وسىعان دەيىن جازدىق.

ۋكراينالىق باق قاستاندىق وقيعاسى كيەۆتىڭ شەۆچەنكو اۋدانىندا بولعانىن، كيەۆ پروكۋراتۋراسى سادىقوۆقا جاسالعان قاستاندىققا قاتىستى «قاساقانا ادام ولتىرۋگە وقتالۋ» فاكتىسى بويىنشا سوتقا دەيىنگى تەرگەۋدى باستاعانىن حابارلاعان.

وق ءتيىپ، اۋىر جارالانعان (وتا جاسالعان) ايدوس سادىقوۆتىڭ قازىرگى احۋالى جايلى ونىڭ ايەلى ناتاليا سادىقوۆا الەۋمەتتىك جەلى جانە باق ارقىلى حابارلاپ وتىر.

وقيعانىڭ قىسقاشا بايانى:

وپپوزيتسيالىق «باسە» كانالىنىڭ نەگىزىن قالاۋشى جانە اۆتورى ايدوس سادىقوۆقا قارسى قاستاندىق ارەكەتى كيەۆتە 18 ماۋسىمدا بولدى. ايەلىمەن بىرگە كولىكتە كەلە جاتقاندا وعان ءۇيىنىڭ الدىندا وق اتىلعان. قاستاندىقتى كيەۆ كۇدىكتى دەپ تانىپ وتىرعان مەيرام قاراتاەۆ پەن التاي جاقانباەۆتىڭ بىرەۋى اتقان، ناتاليا سادىقوۆانىڭ پىكىرىنشە، ولار كاسىبي كىسى ولتىرگىشتەر.

وق ايدوس سادىقوۆتىڭ باسىنا تيگەن، ونى وپەراتسيا كەزىندە سۋىرىپ العان. قازىر ايدوس سادىقوۆتىڭ جاعدايى وزگەرىسسىز، بىرقالىپتى. جانساقتاۋ بولىمىندە جاتىر. اتقىش قاشىپ كەتكەن، ايدوس سادىقوۆتىڭ وتباسىنا قارۋلى كۇزەت بەكىتىلىپ بەرىلگەن.

ايدوس سادىقوۆ - «باسە» ارناسىنىڭ نەگىزىن قالاۋشى، اقوردانى (ەسكى دە، جاڭا دە) كوپ جىلدان بەرى سىنعا الۋىشى رەتىندە بەلگىلى. ال ونىڭ ايەلى ناتاليا سادىقوۆا «باسە» ارناسىن جۇرگىزەدى. ۋكرايناعا كەتكەنگە دەيىن «رەسپۋبليكادا» جۇمىس ىستەگەن. ەكەۋى دە ۋكراينادا بوسقىن مارتەبەسىنە يە.

اتالعان وقيعاعا قاتىستى كۇنى كەشە قازاقستان پرەزيدەنتى قاسىم-جومارت توقاەۆ رەسمي مالىمدەمە جاساپ: «مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا ۋكراينا تاراپىنا رەسمي سۇراتۋلار جىبەرۋ تۋرالى ناقتى تاپسىرما بەردىم»، - دەگەن ەدى.

ال قازاقستاننىڭ ۋكرايناداعى توتەنشە جانە وكىلەتتى ەلشىسى دارحان قالەتاەۆ ۋكراينا سىرتقى ىستەر مينيسترلىگىنە رەسمي تۇسىنىكتەمە الۋ ءۇشىن سۇراۋ سالعانىن ايتقان.

سونىمەن قازىرگە بەلگىلىسى:

ايدوس سادىقوۆقا قاستاندىق جاسادى دەگەن 2 كۇدىكتى ۇستالدى. ولار قازاقستان ازاماتتارى. كەشە ۋكراينا باس پروكۋراتۋراسىنىڭ رەسمي سايتىندا التاي جاقانباەۆ (1988 جىلى تۋعان) پەن مەيرام قاراتاەۆ (1991 جىلى تۋعان) تۋرالى حابارلاما جاريا بولدى.

«تەرگەۋ دەرەگىنشە، ولار قازاقستان ازاماتى ايدوس جاندوسۇلى سادىقوۆتى قاساقانا ولتىرۋگە تاپسىرىس العان. تاپسىرىس بەرگەن كىم ەكەنى ءالى بەلگىسىز، تەرگەۋ ونى انىقتاپ جاتىر. ولار 2 ماۋسىمدا كيەۆكە بارىپ، سادىقوۆتى اڭدۋعا كىرىسكەن، سول ءۇشىن Opel Vectra كولىگىن ساتىپ العان. سادىقوۆتىڭ كۇندەلىكتى قايدا باراتىنىن، قاي جولمەن جۇرەتىنىن، نە ىستەيتىنىن انىقتاعان»، - دەپ جازادى «ازاتتىق راديوسى».

ناتاليا سادىقوۆا نە دەيدى؟

ايدوس سادىقوۆتىڭ ايەلى ناتاليا سادىقوۆا ءوزىنىڭ الەۋمەتتىك جەلىدەگى پاراقشاسىندا قاستاندىقتى ورىنداۋشىلاردىڭ ءبىرى مەيرام قاراتاەۆتىڭ قوستاناي وبلىستىق ىشكى ىستەر دەپارتامەنتىندە قىزمەت اتقارعانىن جازدى. كەيىن قر ءىىم ءوز قىزمەتكەرلەرى ساپىندا مۇنداي ادامنىڭ جوق ەكەنىن ايتتى.

سادىقوۆقا جاسالعان قاستاندىق: قازاقستان ۋكراينا تەرگەۋىمەن، ينتەرپونمەن بىرلەسە جۇمىس جاساۋعا دايىن!

ال قاستاندىقتى ورىنداۋشى ەكىنشى كۇدىكتى التاي جاقانباەۆ تۋرالى ازىرشە ماردىمدى دەرەك ايتىلمادى.

قازاقستان پرەزيدەنتىنىڭ ءباسپاسوز حاتشىسى بەرىك ءۋالي مالىمدەمە جاسادى. ول پرەزيدەنت توقاەۆتىڭ «سادىقوۆقا جاسالعان قاستاندىق بويىنشا تەرگەۋدى ءجىتى باقىلاپ وتىرعانىن جانە قۇقىق قورعاۋ ورگاندارىنا كۇدىكتىلەردىڭ قازىرگى مەكەنجايىن انىقتاپ، ءتيىستى شارا قابىلداۋدى تاپسىرعانىن حابارلادى.

«قازاقستان تاراپى ۋكراينانىڭ قۇقىق قورعاۋ قۇرىلىمدارىمەن، ونىڭ ىشىندە ينتەرپول جۇيەسى بويىنشا بىرلەسە جۇمىس ىستەۋگە دايىن»، - دەپ جازدى بەرىك ءۋالي.

ال ۋكراينا باس پروكۋراتۋراسى سادىقوۆقا قاستاندىق جاسادى دەگەن ەكى حالىقارالىق ىزدەۋ جاريالانعانىن مالىمدەدى.

قازاقستان باس پروكۋراتۋراسى ءوز تەرگەۋىن باستادى

بۇگىن كيەۆتە بولعان ايدوس سادىقوۆتى ولتىرۋگە ارەكەت ەتۋ جاساۋ فاكتىسى بويىنشا قازاقستان باس پروكۋراتۋراسى سوتقا دەيىنگى تەرگەۋدى باستادى.

«قىلمىستىق ءىس بويىنشا تەرگەۋ-جەدەل توبى قۇرىلدى، وندا قىلمىستى اشۋعا جانە كۇدىكتىلەردى ۇستاۋعا باعىتتالعان قاجەتتى جەدەل-ىزدەستىرۋ ءىس-شارالارى جۇرگىزىلەدى.

ەستەرىڭىزگە سالا كەتەيىك، كەشە قازاقستاننىڭ باس پروكۋرورى ۋكراينانىڭ باس پروكۋرورىنىڭ اتىنا وسى قىلمىستى اشۋعا بارىنشا تاجىريبەلى قازاقستاندىق تەرگەۋشىلەردى تارتا وتىرىپ، بارلىق كومەك كورسەتۋ تۋرالى ۇسىنىس جاساعان بولاتىن.

باس پروكۋراتۋرا قىلمىستىق ءىستى تەرگەۋ بارىسىن ەرەكشە باقىلاۋعا الدى»، - دەپ جازىلعان رەسمي مالىمدەمەدە.

بولجام:

وسى جاعدايمەن تانىس ساياسي ساراپشىلار: «بالەنىڭ ءبارى «ەسكى قازاقستان» سەركەلەرىنەن شىعىپ تۇر»، - دەيدى. ويتكەنى، ولار كۇشەيگەن توقاەۆ بيلىگىن السىرەتۋدى كوزدەيدى. بىراق باستىسى بۇل ەمەس، ماسەلەنىڭ ءمانىسى – ايدوس سادىقوۆتىڭ «باسە» ارناسىندا دايىنداعان نەمەسە دايىنداپ جاتقان ماتەريالى. رەۆانشيستەر وزدەرىنىڭ ەلباسيزم كەزىندەگى بىلىق ىستەرىن جاسىرۋ ءۇشىن وسى قادامعا بارۋى مۇمكىن دەگەن نۇسقا ايتىلادى. سادىقوۆقا جاسالعان قاستاندىققا قازاقستاننىڭ قازىرگى بيلىگىن ايىپتاۋ – ءسوزسىز جاھاندىق ساياسي ارەنادا قازاقستان يميدجىنە كەرى اسەرىن تيگىزەتىنى ءسوزسىز. بۇدان ۇتاتىن كىم؟ ءبىر نارسەنىڭ باسى اشىق – «ەسكى قازاقستاننىڭ» بيزنەس كوكجالدارى وزدەرىنە جۋرناليست ارناعان كومپروماتتىڭ شىقپاۋى ءۇشىن وسى قادامعا باردى دەگەن نۇسقا دا اشىق تالقىلانۋى ءتيىس-اق...

Abai.kz