ەو رەسەيگە قارسى سانكتسيالاردىڭ 14-ءشى پاكەتىن قابىلدادى. بۇل جولى رەسەيدىڭ 116 جەكە زاڭدى جانە جەكە تۇلعاسىنا سانكتسيا قامشىسى ءتيدى. سونىڭ ىشىندە، رەسەيدەن سۇيىتىلعان تابيعي گاز تاسىمالداۋعا دا سانكتسيا سالىنباق. بۇل تۋرالى Mezgil.kz اقپاراتتىق پورتالى جازدى. 

ەو-نىڭ رەسەيگە سالىپ جاتقان 14-ءشى پاكەت سانكتسيالارىنىڭ نەگىزگى تارماقتارىنىڭ ءبىرى – رەسەيلىك سۇيىتىلعان تابيعي گازعا قاتىستى: ونىڭ ەۋروپالىق پورتتار ارقىلى ترانزيتىنە شەكتەۋلەر ەنگىزىلەدى.

ءۇشىنشى ەلدەرگە ارنالعان رەسەيلىك «LNG» (سۇيىتىلعان تابيعي گاز) بۇدان بىلاي پورتتار ارقىلى ەو-عا قايتا ەكسپورتتاۋعا بولمايدى. سونداي-اق، رەسەيلىك «كولەڭكەلى فلوت» دەپ اتالاتىن 27 تانكەرگە، اتاپ ايتقاندا، قارۋ-جاراق نەمەسە «ۇرلانعان» ۋكراين استىعىن تاسىمالداۋ ءۇشىن پايدالانىلاتىن كەمەلەرگە قارسى سانكتسيالار ەنگىزىلەدى.

سانكتسيالار جيىنتىعىندا قازاقستاننىڭ كومپانياسى دا بار!

ال جەكە تۇلعالاردان سانكتسيا تىزىمىنە ءانشى – پولينا گاگارينا، بيزنەسمەندەر – يگور التۋشكين، رومان تروتسەنكو جانە تايمۋراز بوللوەۆار ەنگىزىلگەن.

61 تۇلعا نەمەسە كومپانيا رەسەيلىك اسكەري-ونەركاسىپتىك كومپلەكسكە تىكەلەي قولداۋ كورسەتۋىنە بايلانىستى سانكتسيالىق تىزىمگە ەنگىزىلگەن، ونىڭ ىشىندە قىتاي، تۇركيا، قازاقستان، قىرعىزستان جانە بىرىككەن اراب امىرلىكتەرىنىڭ كومپانيالارى تۋرالى ءسوز بولىپ وتىر.

رەسەيگە اۋىر سوققى: ءۇشىنشى ەلدەر قاتاڭ باقىلاۋدا بولادى!

بىرىنشىدەن: سونداي-اق سانكتسيالاردى اينالىپ وتۋگە قارسى كۇرەس بويىنشا قوسىمشا شارالار ەنگىزىلەدى. قوس ماقساتتاعى تاۋارلاردى ءۇشىنشى ەلدەرگە جەتكىزۋ قاتاڭ باقىلاۋدا بولادى. ەو-داعى كومپانيالار وزدەرىنىڭ ءۇشىنشى ەلدەردەگى ەنشىلەس كومپانيالارىنىڭ سانكتسيالاردى اينالىپ ءوتۋ ءۇشىن پايدالانىلۋى مۇمكىن قانداي دا ءبىر ءىس-ارەكەتتەرگە قاتىسپاۋىن قاداعالاۋى ءتيىس.

ەكىنشىدەن: سانكتسيالار ءۇشىنشى ەلدەرمەن قارجىلىق وپەراتسيالاردى جۇزەگە اسىرۋ ءۇشىن SWIFT-ءتىڭ رەسەيلىك بالاماسى - رەسەي بانكىنىڭ جىلدام قارجىلىق قاتىناستار جۇيەسىنە قارسى ەنگىزىلەتىن بولادى.

ۇشىنشىدەن: ەو-دا جۇمىس ىستەيتىن ساياسي پارتيالارعا، باق پەن ۇەۇ-عا رەسەي مەملەكەتىنەن نەمەسە ونىمەن بايلانىستى ۇيىمداردان قارجى الۋعا تىيىم سالىنادى.

تورتىنشىدەن: ەو اۆياكومپانيالارىنا بۇكىل الەم بويىنشا چارتەرلىك جانە جەكە ۇشۋلاردى جۇزەگە اسىرۋ ءۇشىن رەسەيلىك ازاماتتارمەن نەمەسە ۇيىمدارمەن كەلىسىمشارتتار جاساسۋعا تىيىم سالىنادى.

بەسىنشىدەن: رەسەيلىك سۇيىتىلعان تابيعي گازدىڭ ەۋروپالىق پورتتار ارقىلى ترانزيتىنە شەكتەۋلەر سالىنادى.

ەو كەڭەسىنىڭ مالىمەتىنشە، سانكتسيالارعا سايكەس ەۋرووداق رەسەيلىك LNG ساتىپ الۋدى جالعاستىرادى، بىراق ونى كەرى ەكسپورتتاۋعا تىيىم سالادى.

وسى سانكتسيانىڭ ناتيجەسى بۇرىنعىعا قاراعاندا اۋىر بولاتىنى انىق. رەسەيمەن جۇمىس ىستەۋگە كىرىەستىن كومپانيا ەندىگى جەردە ەڭ اۋەلى پايدا تابۋدى ەمەس، ءوزىنىڭ بيزنەس ورتاداعى بەدەلىن ساقتاپ قالۋدى ءبىرىنشى ورىنعا قويادى. ال، سانكتسيانى پايدالانىپ قۇرىلۋى كۇماندى ءبىر كۇندىك فيرامالاردىڭ جۇمىسى رەسەي بيزنەسمەندەرىن سان سوقتىرۋى دا ابدەن مۇمكىن. بۇلاردىڭ الداپ سوعۋى سانكتسيانى اينالىپ وتۋدەن قيىنعا تۇسەدى دەگەندى ەكونوميستەر العا تارتادى.

Abai.kz