قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى اعىمداعى جىلدىڭ 11 مامىرى مەن 22 ماۋسىمى ارالىعىندا الەۋمەتتانۋلىق ساۋالناما جۇرگىزدى. ىرىكتەمە كولەمى 8000 رەسپوندەنتتى قۇرايدى. ساۋالناماعا 17 وبلىس پەن رەسپۋبليكالىق ماڭىزى بار قالالار: استانا، الماتى جانە شىمكەنتتىڭ 18 جاستان اسقان رەسپوندەنتتەرى قاتىستى.

قوعامدىق پىكىردى زەرتتەۋ ناتيجەلەرىنە سايكەس، قازاقستان رەسپۋبليكاسىنىڭ پرەزيدەنتىنە رەسپوندەنتتەردىڭ 77,1 پايىزى سەنىم بىلدىرەدى. بۇل رەتتە بىرقاتار زاڭدىلىقتاردى ەسكەرە وتىرىپ، مەملەكەت باسشىسىنا سەنىم ارتقان ازاماتتاردىڭ ورتاشا پورترەتىن كورسەتۋگە بولادى.

بىرىنشىدەن، جاستار پرەزيدەنتكە كوبىرەك سەنىم ارتادى (81,9%).

ەكىنشىدەن، رەسپوندەنتتەردىڭ ءبىلىم دەڭگەيى نەعۇرلىم جوعارى بولسا، سوعۇرلىم ولاردىڭ مەملەكەت باسشىسىنا دەگەن سەنىمى ارتادى.

ۇشىنشىدەن، مەملەكەت باسشىسىنا سەنىم دەڭگەيى اۋىل تۇرعىندارى (79,6%) جانە قالا تۇرعىندارى (75,4%), ايەلدەر (79%) جانە ەرلەر (74,9%) اراسىندا شامامەن بىردەي ەكەنىن اتاپ وتكەن ءجون.

تورتىنشىدەن، ءبىلىم، ونەركاسىپ، قىزمەت كورسەتۋ، كولىك جانە اۋىل شارۋاشىلىعى سالالارىندا قىزمەت ەتەتىندەر پرەزيدەنتكە كوبىرەك سەنىم ارتادى.

الەمدە ساياسي ينستيتۋتتارعا دەگەن سەنىمنىڭ تومەندەۋى سياقتى جالپى ءۇردىس بايقالادى. تاياۋ شىعىس پەن شىعىس ەۋروپاداعى گەوساياسي وزگەرىستەر، پاندەميا، ينفلياتسيا سالدارىنان ءومىر ءسۇرۋ قۇنىنىڭ ءوسۋى جانە كوپتەگەن ەلدەردى شارپىعان ەكونوميكالىق داعدارىس ساياسي ينستيتۋتتارعا دەگەن سەنىمنىڭ تومەندەۋىنىڭ سەبەپتەرىن تۇسىندىرەدى.

بۇل تۇرعىدا قازاقستان كوپتەگەن ەلدەرمەن سالىستىرعاندا جاقسى جاعىنان ەرەكشەلەنەدى. مەملەكەتتىڭ كەزەڭ-كەزەڭىمەن ساياسي جاڭعىرۋى، كوپپارتيالىق جۇيەنى دامىتۋعا باعىتتالعان زاڭدار، جەرگىلىكتى جانە اۋدان اكىمدەرىن سايلاۋ، «حالىق ۇنىنە قۇلاق اساتىن مەملەكەت» فورمۋلاسىن جۇزەگە اسىرۋ – وسىنىڭ بارلىعى پرەزيدەنتتىڭ ادىلەتتى قازاقستان تۇجىرىمداماسىن ءىس جۇزىندە جۇزەگە اسىرۋدىڭ كورىنىسى.

الەۋمەتتانۋلىق زەرتتەۋلەردىڭ ناتيجەلەرى كورسەتكەندەي، قاسىم-جومارت توقاەۆتىڭ اشىق جانە ءادىل قوعام قۇرۋعا، ازاماتتاردىڭ ءال-اۋقاتىن ارتتىرۋعا باعىتتالعان رەفورمالارى، سايىپ كەلگەندە، پرەزيدەنتتىڭ قوعامداعى جوعارى رەيتينگىنە نەگىز بولدى.

Abai.kz