وليمپيادا-2024: قازاقستان قۇراماسى پاريجگە اتتاندى
![](https://abai.kz/content/uploads/2024/07/669791ab0b58f000498563.jpeg)
الماتى وبلىسىنداعى رەسپۋبليكالىق وليمپيادالىق دايارلىق بازاسىندا قازاقستان ۇلتتىق قۇراماسىن XXXIII جازعى وليمپيا ويىندارىنا رەسمي شىعارىپ سالۋ ءراسىمى ءوتتى، دەپ حابارلايدى Abai.kz.
پاريج قالاسىندا 26 شىلدە مەن 11 تامىز ارالىعىندا وتەتىن دوداعا قازاقستان قۇراماسى ساپىنان 80 سپورتشى سپورتتىڭ 25 تۇرىنەن باق سىناپ، 81 مەدال جيىنتىعىنا تالاسادى.
مينيستر ەرمەك مارجىقپاەۆ سپورتشىلارعا ساتتىلىك تىلەدى.
«سىزدەردىڭ الدىڭىزدا ەلىمىزدى پاريج وليمپياداسىندا تانىستىرۋ، ەل نامىسىن ابىرويمەن قورعاۋ سياقتى ماڭىزدى ءارى وتە جاۋاپتى مىندەت تۇر. سىزدەردىڭ چەمپيوندىق مىنەزىڭىز، تاباندىلىعىڭىز، جەڭىسكە دەگەن ەرىك-جىگەرىڭىز، وسى كۇنگە دەيىن جيعان تاجىريبەلەرىڭىز، جاتتىقتىرۋشىلاردىڭ، دارىگەرلەردىڭ، ماسساج جاساۋشىلاردىڭ قاجىرلى ەڭبەگىنىڭ ارقاسىندا ۇلكەن ناتيجەگە جەتەتىنىمىزگە سەنىمدىمىن. تاۋەلسىزدىك جىلدارىندا قازاقستان جازعى جانە قىسقى وليمپيا ويىندارىنىڭ 79 جۇلدەگەرىن، ونىڭ ىشىندە 15 وليمپيادا چەمپيونىن تاربيەلەپ شىعاردى. وليمپياداداعى جەتىستىكتەر – بۇكىل ەلدىڭ الەمدەگى ءيميدجى، مەملەكەتتىڭ ءال-اۋقاتىنىڭ كورسەتكىشى، ەڭ باستىسى، بۇل – سىزدەردىڭ كوپجىلدىق جانە قاجىرلى ەڭبەكتەرىڭىزدىڭ ناتيجەسى!»، - دەدى ەرمەك مارجىقپاەۆ.
وليمپيادانىڭ اشىلۋ سالتاناتى 26 شىلدەدە پاريجدەگى سەنا وزەنىندە وتەدى. جارىسقا 205 ەلدەن 10 مىڭنان استام سپورتشى قاتىسىپ، 32 سپورت تۇرىنەن 329 مەدال جيىنتىعىن ساراپقا سالادى.
ەسكە سالا كەتسەك، تورتكۇل دۇنيە كوز تىككەن وليمپيادا ويىندارىندا وسىعان دەيىن قازاقستان جازعى وليمپيادا ويىندارىنان ۇزىن-سانى 77 مەدال ۇتقان ەكەن. سوڭعى وتكەن جازعى وليمپيادا ويىندارىندا قازاقستان قورجىنىنا 8 قولا جۇلدەمەن ەلگە ورالعان بولاتىن. وليمپياداعا 27 سپورت تۇرىنەن 96 ليتسەنزيا ۇتىپ الىپ بارعان سپورتشىلارىمىز جالپى ەسەپ بويىنشا 83-ءشى ورىنعا جايعاسقان.
بۇقارالىق سپورت - بۇل قاۋىپسىز قوعامنىڭ كەپىلى، قارسىلاستار قاتتىلىق پەن سپورتتىق اشۋدىڭ رۇقسات ەتىلگەن شەگىن بىلەدى. سوندىقتان، سپورتتىڭ ماڭىزى وليمپيادالىق مەدالمەن عانا شەكتەلمەيدى. وسى تۇرعىدان العاندا، سەگىز قولا مەدال - بۇل قالىپتى ناتيجە.
Abai.kz