كولىك ءمينيسترى مارات قاراباەۆ ينتەرنەت ارقىلى تاكسي قىزمەتىن كورسەتەتىن ازاماتتاردىڭ جۇمىسىنا ءبىرشاما وزگەرىستەر ەنگىزىلەتىنىن ايتتى، دەپ حابارلايدى Abai.kz. Ulysmedia.kz-كە سىلتەمە جاساپ.

– ناقتى “مىناداي وزگەرىستەردى ەنگىزەمىز، وسىمەن ءبىتتى” دەگەن شارۋا جوق قوي. يندرايۆەردى دە، ياندەكس تاكسيدىڭ قۇرىلتايشىلارىمەن كەزدەسىپ سويلەستىك. ولار ءوز پوزيتسياسىن ايتىپ وتىر. جۇرگىزۋشىلەر باسقاشا پىكىر ايتادى. ماسەلە ول جەردە وتە كوپ. ءرولى وڭ جاعىنداعى كولىكتەردى مۇلدە يندرايۆەرگە تىركەلۋگە قاقىسى جوق دەگەن… ويتكەنى بىزدە ەڭ كوپ جول وقيعالارى وسىنداي كولىكتەرمەن بايلانىستى بولادى. ماسەلەن، ءرولى وڭ جاقتاعى “الۆارد” كولىكتەرى سول جاققا اۋىستىرىپ، قولدان جاساپ العان. ولاردى دا تىركەۋگە بولمايدى دەپ وتىرمىز. تاعى دا ايتىپ وتىرعانىمىز – تۇراقتى ەكى قالانىڭ اراسىندا قاتىنايتىن اۆتوبۋستار 2020 جىلدان باستاپ جوعالىپ كەتتى. ويتكەنى پاندەميا كەزىندە كوپ ادامدار يندرايۆەردى كوبىرەك پايدالانا باستادى. قازىر ەكى قالانىڭ اراسىندا تۇراقتى اۆتوبۋستارعا وتىرماي، يندرايۆەردى تاڭدايدى. ول ىڭعايلى. ويتكەنى ۇيىنەن الىپ كەتەدى، – دەيدى ول.

مينيستر ەكى شارا ۇسىنىلعالى وتىرعانىن ايتتى.

– ونىڭ ءبىرى – ورتاشا جىلدامدىق. ول بىزگە نە بەرەدى؟ ءبىر نۇكتەدەن ەكىنشى نۇكتەگە بارعان جاعدايدا ورتاشا جىلدامدىق ءبىر بولسا، ونى اسىرمايدى. اسىپ كەتسە، جەڭىل كولىكتىڭ دە، اۆتوبۋستىڭ دا جىلدامدىقتى اسىرعانى جونىندە اقپارات بىزگە كەلەدى. سوندىقتان، حالىق قايتادان اۆتوبۋسقا وتىرا ما دەگەن وي، – دەيدى ول.

سونداي-اق مارات قاراباەۆ باسقا ەلدەردە يندايۆەر سەكىلدى اگرەگاتتاردىڭ حالىقتىڭ ىشىندە تاكسي قىزمەتىن كورسەتۋگە قۇقىعى جوعىن ەسكەرتتى.

– ولاردا شەكتەۋ 50 شاقىرىم بولادى. ودان اسىرۋعا قاقىسى جوق. مۇمكىن سونداي ىستەيمىز بە دەگەن ۇسىنىس بار. يندرايۆەرمەن تابىس تاۋىپ وتىرعان جىگىتتەر بارىن بىلەمىز. بىراق ونداي بولسا، باسقا تالاپتاردى قويۋىمىز كەرەك. ويتكەنى جول اپاتى ەڭ كوپ بولىپ جاتقان ماسەلەلەر – اسىققاننان، كولىك جۇرگىزۋشىسىنىڭ دۇرىس ۇيىقتاماي، جۇرە بەرۋىنەن. سونداي ماسەلەلەر بار، – دەيدى ول.

مارات قاراباەۆ دەسە دە بۇل ناقتى قابىلدانعان شەشىم ەمەس ەكەنىن، ازىرگە ۇسىنىستار ەكەنىن ايتادى.

inDrive ءباسپاسوز قىزمەتى Abai.kz اقپاراتتىق پورتالىنا پىكىر ءبىلدىردى:

“inDrive سەرۆيسى قازاقستان نارىعىندا 10 جىلدان اسا جۇمىس ىستەپ كەلەدى. وسىنشا ۋاقىتتا ءبىز رەتتەۋشى ورگانداردىڭ تالاپتارىن قاتاڭ ساقتاپ كەلەمىز. قازىرگى كۇنى inDrive ساپارلاس جولاۋشىلاردى ىزدەۋدىڭ ەڭ كەڭ تاراعان ونلاين-قوسىمشاسى بولىپ وتىر. مۇنداي ساپاردىڭ باستى ارتىقشىلىعى — جۇرگىزۋشى جولاۋشىنى وعان ىڭعايلى كەز كەلگەن ۋاقىتتا، ءوزارا كەلىسكەن جولاقىعا كەز كەلگەن قالاعا جەتكىزەدى. قالاارالىق ساپارلاردىڭ اراقاشىقتىعىنا شەكتەۋ قويۋ كوپتەگەن جۇرگىزۋشىلەر مەن جولاۋشىلارعا اسەر ەتەدى، بۇل ماسەلەنى نارىقتىڭ بارلىق قاتىسۋشىلارى قر كولىك مينيسترلىگىمەن بىرلەسە وتىرىپ شەشۋ كەرەك دەپ ەسەپتەيمىز”، - دەدى inDrive ءباسپاسوز قىزمەتى.

Abai.kz