ەكس-پرەزيدەنت نۇرسۇلتان نازارباەۆتىڭ تۋىسى قايرات ساتىبالدى بوستاندىققا شىعاتىن بولدى. ونىڭ تۇرمە جازاسى شارتتى جازاعا اۋىستىرىلدى.

شقو سوتىنىڭ ءباسپاسوز قىزمەتى: «وسكەمەن قالاسىنىڭ №2 سوتى سوتتالۋشىنىڭ شاعىمىن قاناعاتتاندىرىپ، جازاسىنىڭ وتەلمەگەن مەرزىمىن شارتتى باس بوستاندىعىنان ايىرۋ جازاسىنا اۋىستىرۋعا شەشىم قابالدادى. شارتتى جازا مەرزىمى 3 جىل، 3 اي جانە 7 كۇن»، - دەپ مالىمدەدى.

نازارباەۆتىڭ نەمەرە ءىنىسى بۇرىن قىلمىستىق كودەكستىڭ 28-بابىنىڭ 3-بولىگى، 189-بابىنىڭ 4-بولىگى 2) (سەنىپ تاپسىرىلعان بوتەن مۇلىكتى يەلەنىپ الۋ), 28-بابىنىڭ 3-بولىگى، 195-بابىنىڭ 4-بولىگىنىڭ 2-تارماعى (ۇرلىق ماقساتىنسىز زيان كەلتىرۋ) بويىنشا سوتتالعان. مۇلكى تاركىلەنىپ، 10 جىل مەرزىمگە مەملەكەتتىك قىزمەتتە لاۋازىمداردى اتقارۋ قۇقىعىنان ايىرا وتىرىپ، 6 جىلعا باس بوستاندىعىنان ايىرىلعان.

سوت قايرات ساتىبالدى ءوزىن وڭ سيپاتتاپ، سوت ۇكىمىمەن كەلتىرىلگەن زالالدىڭ ورنىن تولتىردى، سونداي-اق مەملەكەتكە جالپى سوماسى 700 ميلليارد تەڭگەدەن استام قاراجات پەن مۇلىكتى ءوز ەركىمەن اۋداردى دەپ ەسەپتەيدى.

سوت ساتىبالدىنىڭ تاربيە جۇمىستارىنا بەلسەنە قاتىسقانىن جانە سوتتالعانداردىڭ ەرىكتى ۇيىمىنىڭ مۇشەسى ەكەنىن قوستى.

«ساتىبالدىعا پروباتسيالىق باقىلاۋ ورناتىلدى. تۇراقتى جۇمىسى بولماعان جاعدايدا سوتتالعان ادام جازانى وتەۋدىڭ بارلىق مەرزىمى ىشىندە جىل سايىن 100 ساعات ءماجبۇرلى جۇمىسقا تارتىلادى»، - دەدى شقو سوتىنىڭ ءباسپاسوزى.

ەسكە سالايىق، 2022 جىلى 26 قىركۇيەكتە سوت نازارباەۆتىڭ نەمەرە ءىنىسى قايرات ساتىبالدىنى ۇرلىق جانە ەكى كومپانياعا مۇلىكتىك زالال كەلتىرگەنى ءۇشىن 6 جىلعا باس بوستاندىعىنان ايىرۋ تۋرالى ۇكىم شىعارعان بولاتىن. 2023 جىلى ەكس-پرەزيدەنتتىڭ تۋىسقانىنا قاتىستى باسقا دا قىلمىستاردى تەرگەۋ جالعاستى. قايرات ساتىبالدىعا قاتىستى قىلمىستىق جولمەن الىنعان كىرىستەردى جاسىرۋ ءىسى سوتقا 10 قاڭتاردا ءتۇستى. 1 ساۋىردە ساتىبالدى بۇل ءىس بويىنشا كىناسىن مويىندادى.

2024 جىلدىڭ 12 تامىزىندا ساتىبالدى ءىسى بويىنشا 733 ميلليارد تەڭگەگە جۋىق اكتيۆتەر مەملەكەتكە قايتارىلعانى حابارلاندى.

Abai.kz