بەيسەنباي داۋلەتۇلى. ميلاندى مويىنداتقان مۋدرياك
1-سۋرەت. ەلباسى كىشكەنتاي ماشامەن بىرگە. پاۆلودار، 2001 جىل.
2-سۋرەت. د.ۆەردي اتىنداعى ميلان كونسەرۆاتورياسىنىڭ تۇلەگى، لا سكالا تەاترى جانىنداعى جوعارى مۋزىكا اكادەمياسىنىڭ ستۋدەنتى ماريا مۋدرياك. تۋرين، يتاليا. 2014 جىل.
بيبىگۇل اپانىڭ باتاسى
1-سۋرەت. ەلباسى كىشكەنتاي ماشامەن بىرگە. پاۆلودار، 2001 جىل.
2-سۋرەت. د.ۆەردي اتىنداعى ميلان كونسەرۆاتورياسىنىڭ تۇلەگى، لا سكالا تەاترى جانىنداعى جوعارى مۋزىكا اكادەمياسىنىڭ ستۋدەنتى ماريا مۋدرياك. تۋرين، يتاليا. 2014 جىل.
بيبىگۇل اپانىڭ باتاسى
ەكىنىڭ ءبىرى ءان سالعان بۇگىنگى كۇنى «مىناۋ كەرەمەت ءانشى» دەپ جالاڭ سوزبەن جۇرتتى تاڭعالدىرۋ قيىن. الايدا بەس جاسىندا «الەمنىڭ ەڭ جاس وپەرا ءانشىسى» رەتىندە گيننەستىڭ رەكوردتار كىتابىنا ەنگەن پاۆلودارلىق ماريا مۋدرياكتىڭ ءجونى بولەك. ەرەكشە داۋىسىمەن تىڭداۋشىسىن ءتانتى ەتكەن بالعىن قىزدىڭ مەكتەپ قابىرعاسىندا ءجۇرىپ-اق ميلاندىق مايتالمانداردىڭ كوزىنە ءتۇسىپ، اتاقتى لا سكالا تەاترى جانىنداعى اكادەمياعا قابىلدانۋىنىڭ ءوزى نەگە تۇرادى؟!
ول ومىرىندەگى ءبىرىنشى بايقاۋعا 4 جاسىندا قاتىسىپتى. وتباسىلىق دەمالىسپەن 1998 جىلى يالتاعا بارعان ماشا كىشكەنتاي بالالارعا ارنالعان «قارا تەڭىز» فەستيۆالىنىڭ ۇستىنەن تۇسەدى. بىراق العاشقى ىرىكتەۋ اينالىمى ءوتىپ كەتىپتى. ايتسە دە قازاقستاندىق قارشاداي قىزدىڭ قۇلشىنىسىنا ريزا بولعان جەرگىلىكتى ۇيىمداستىرۋشىلار بالانىڭ مەسەلىن قايتارماۋ ءۇشىن كونكۋرستان تىس ساحناعا شىعۋعا كەلىسىم بەرەدى. قۇيتاقانداي ءبۇلدىرشىن ءاندى اۋەلەتە شىرقاي جونەلگەندە ونىڭ كەڭ دياپازونىن ەستىگەن كورەرمەندەر مەن پروديۋسەرلەر تاڭدانىسىن جاسىرا المايدى. وسىدان كەيىن اتا-اناسى الەكساندر مەن ولگا ماشانى ونەر بايقاۋلارىنان قالدىرماۋعا تىرىسادى. ءسويتىپ، نەبارى ەكى-ءۇش جىلدىڭ اينالاسىندا الىس-جاقىن شەتەلدى قوسقاندا جيىرما شاقتى كونكۋرسقا قاتىسىپ ۇلگەردى. سونىڭ ەشقايسىسىنان قۇرالاقان قايتپاعانى ءوز الدىنا، تالانتتى جازباي تانيتىن سۇڭعىلا مۋزىكانتتار مەن پروديۋسەرلەردىڭ جوعارى باعاسىن الىپ ءجۇردى. ال استانادا تاۋەلسىزدىكتىڭ ون جىلدىعىنا وراي وتكەن كونتسەرتتە «قازاق ءۆالسىن» قۇيقىلجىتا شىرقاعان ول ايگىلى ءانشى بيبىگۇل تولەگەنوۆا اپاسىنىڭ رازىلىعىنا بولەنەدى. «ماشا وپەرادا وتە قيىندىق تۋدىراتىن «سي» نوتاسىن 7 جاسىندا ەركىن الىپ تۇر. مەنىڭ ءوزىم ول دەڭگەيدى تەك 17 جاسىمدا مەڭگەردىم» دەپ اعىنان جارىلعان قازاقتىڭ بۇلبۇلى اق باتاسىن بەرىپتى.
ء«ان ايتاسىڭ با، قۋىرشاق وينايسىڭ با؟»
وسىلاي الىس-جاقىنعا تانىلىپ قالعان ماشاعا بىردە پاۆلودار وڭىرىنە كەزەكتى ساپارىندا پرەزيدەنت نۇرسۇلتان نازارباەۆ قاتىساتىن شارادا ءان ايتۋعا ۇسىنىس جاسالادى. ءوزىڭ قۇرالپى بالالارمەن سايىسۋ ءبىر باسقا، ەل باسشىسىنىڭ الدىندا ونەر كورسەتۋدىڭ ءجونى بولەك قوي. 2001 جىلعى 24 تامىزدا ەلباسى قالانى ارالاپ، «باياناۋىل» مادەني ورتالىعىنىڭ اشىلۋىنا كەلگەندە ماريا مۋدرياك نۇرسۇلتان ابىشۇلىمەن تۇڭعىش رەت كەزدەسىپ، «جاڭبىر» جانە «كوڭىلدى جەل» اتتى ەكى ءانىن تامىلجىتا شىرقادى. ريزا بولعان ەلباسى وعان العىس ايتۋ ءۇشىن جانىنا شاقىرعاندا ول پرەزيدەنتكە سىرتىندا «پلانەتاداعى ەڭ كىشكەنتاي ءانشى – ماشا» دەپ جازىلعان ديسكىسىن سىيلاۋدى دا ۇمىتپادى.
– «قولىمدى قىسىپ تۇرىپ جىلى لەبىزىن بىلدىرگەن نۇرسۇلتان ءابىشۇلى مەنەن: ء«ان ايتقاندى جاقسى كورەسىڭ بە، الدە قۋىرشاقپەن ويناعاندى ما؟» دەپ سۇرادى. «ارينە، ءان سالعان ۇنايدى» دەگەنىم ەسىمدە. ول كىسى كۇلىپ، «ەگەر جاقسى وقىساڭ، مەن سەنى ۇلكەن وقۋعا تۇسىرەمىن. تانىمال ءانشى بولاسىڭ» دەگەندە قۋانىشىمدا شەك بولمادى. ەستەلىك رەتىندە ماعان قول ساعاتىن سىيعا تارتتى. قازىر ول سىيلىق گ.پوتانين اتىنداعى قالالىق ولكەتانۋ مۋزەيىندە تۇر. ال ارادا ءۇش جىل وتكەن سوڭ نۇرسۇلتان ءابىشۇلى ۋادەسىن ورىنداپ، مەنى ءوزىم دە ويلاماعان شىڭدارعا باعىتتاپ جىبەردى»، – دەيدى بالالىق شاعىنىڭ ەرەكشە ساتتەرىن ساعىنىشپەن ەسكە العان ماشا مۋدرياك.
ءبارى ويدا جوقتا باستالدى. پاۆلودارداعى №11 مەكتەپتە وقىپ، قوسىمشا پ.چايكوۆسكي اتىنداعى مۋزىكالىق كوللەدجدە ءدارىس الىپ جۇرگەن قىزعا ءبىر كۇنى يتاليادان ەكى كىسى كەلدى. بۇكىل الەم بويىنشا وپەراداعى ەرەكشە داۋىس يەلەرىن ىزدەپ شىققان ولاردىڭ قولىندا كۇنى بۇرىن دايىندالعان ءتىزىم بار ەكەن. ماشانى ميلاندا وتەتىن ىرىكتەۋ سايىسىنا شاقىرا كەلىپتى. سۇرىنبەي وتسە، اتاقتى وپەرا تەاترى جانىنداعى اكادەميادا وقيتىن بولادى. توسىن ۇسىنىس مۋدرياكتار وتباسىن قاتتى قۋانتقانىمەن، كۇمىلجىتىپ تە قويعانى راس. قالاداعى ءبىر كاسىپورىندا باس تەحنولوگ بولىپ قىزمەت ىستەيتىن اكەسىنىڭ تابىسى تىرشىلىكتەن ارتىلمايدى. جوعارى وقۋ ورنىندا ىستەيدى دەمەسەڭىز، اناسىنىڭ دا جالاقىسى بەلگىلى. دەگەنمەن بالانىڭ باعىن بايلاماي، قارىزدانساق تا، ماشانى جىبەرگەن ءجون دەپ شەشتى.
مەجەلى كۇنى ميلانداعى كونكۋرسقا الەمنىڭ تۇپكىر-تۇپكىرىنەن نەبىر تالانتتى بالالار جينالدى. ولاردىڭ ءبارىن قارت قۇرلىقتىڭ اتى ءمالىم مۋزىكا مايتالماندارى مۇقيات تىڭداپ، اسىقپاي سىن تەزىنە سالدى. اقىرىندا تۇپكىلىكتى تاڭداۋ ەكى قىزعا تۇسەدى. ونىڭ ءبىرى ماشا مۋدرياك ەدى.
قيىندىقتان قۇتقارعان قامقورلىق
سول جىلى تامىزدا پاۆلودارعا يتاليانىڭ ءبىلىم مينيسترىنەن حات كەلدى. ماريانىڭ لا سكالا تەاترىنىڭ جانىنداعى جوعارى مۋزىكا اكادەمياسىنا قابىلدانعانىن حابارلاپ، ميلانعا شاقىرىپتى. الايدا، قارجى ماسەلەسىن بىلاي قويعاندا ماشا مۋدرياكتىڭ ميلانعا اتتانۋىنىڭ ءوزى وڭاي شارۋا بولماي شىقتى. ماسەلە وبلىس تۇگىلى مينيسترلىك دەڭگەيىندە دە شەشىلە قويمادى. قازاقستاننىڭ يتالياداعى ەلشىسى بىرعانىم ءايتىموۆا دا بۇل شارۋاعا ارالاستى. بىراق ناتيجە بولمادى. اقىر سوڭىندا ماشانىڭ تاعى دا ەلباسىمەن كونتسەرتتە كەزدەسۋىنىڭ ءساتى ءتۇستى. استانانىڭ «كونگرەس-حولىندا» وتكەن كونتسەرتتى تاماشالاۋعا كەلگەن پرەزيدەنت بۇل كەزدە ماريا مۋدرياكتىڭ جاڭالىعىنان حاباردار ەدى.
– ءوز ۋادەسىن ۇمىتپاعان پرەزيدەنت ماشانى بىردەن تانىپ، دەرەۋ سىرتقى ىستەر مينيسترلىگىنە تاپسىرما بەردى، – دەيدى ءانشى قىزدىڭ اكەسى الەكساندر. – ەگەر ول كىسى ارالاسپاعاندا ماسەلە شەشىلمەس ەدى. نۇرسۇلتان ءابىشۇلىنىڭ جەكە تاپسىرماسىمەن زايىبىمدى ەلشىلىك قىزمەتكەرى ەتىپ قابىلداعان سوڭ، ماشانى يتالياعا اپارۋعا جول اشىلدى. الاشاپقىن جۇگىرىسپەن ءجۇرىپ، بارلىق قۇجاتتار تەز ارادا رەسىمدەلگەن سوڭ 2004 جىلعى 2 قاڭتاردا ولگا مەن ماشا ميلانعا ۇشتى. سول كۇندەردىڭ قيىنشىلىعى مەن قاۋىرت قاربالاسى ەسىمە تۇسسە، ءالى كۇنگە كوڭىلىم بوسايدى.
وسىلايشا، ەۋروپانىڭ ايگىلى قالاسىنا نەبارى ەكى مىڭ ەۋرومەن جەتكەن ولگا مەن ماشا پاتەر جالداپ، تيىن ساناپ كۇنەلتۋگە كىرىسەدى. قاراجات تاپشىلىعىنا قوسا، يتاليان ءتىلىن بىلمەۋى ماشانىڭ ءوزىن دە، اناسىن دا تۇيىققا تىرەدى. ابدەن قىسىلعاندا ولگا سىرعاسىن ساتىپ امالدادى. ءتىپتى بولماعاسىن كەرى قايتۋدى دا ويلاي باستادى. بىراق ەلباسىنىڭ ءوزى سەنىم ارتىپ اتتاندىرعاندا، «قيىندىققا شىداماي قايتىپ كەلدىك دەسەك، ەستىگەن جۇرتتان ۇيات قوي» دەپ نامىسقا تىرىسادى. ماشا ۇستازدارىنىڭ كەڭەسىمەن يتاليان ءتىلىن مەڭگەرۋگە كۇش سالادى. تالپىنىپ ءجۇرىپ، العاشقى ەمتيحاندارىن وتە ءساتتى تاپسىرعان ماشا تۋرالى ميلاننىڭ جەرگىلىكتى گازەتتەرىندە ماقالالار جازىلدى. ءتىلى دە كادىمگىدەي توسەلدى. ال جازعى دەمالىستا پاۆلودارعا ورالعان ايەلى مەن قىزىن الەكساندر ادەپكىدە تانىماي قالدى. ءبارىن ۇنەمدەپ ءومىر سۇرگەن ماشا ۇزىلەردەي ۇلبىرەپ تۇر ەدى. تىنىعىپ، دەمالسىن دەگەن ويمەن ماشانى دەرەۋ كوكشەتاۋداعى «بالداۋرەنگە» جىبەرىپ، وزدەرى ەندىگى وقۋ جىلىنىڭ اقىسىن ويلاپ قامىققان اتا-انا تاعى دا ەلباسىنىڭ شاراپاتى تيەدى دەپ ويلاماپ ەدى.
ەكى رەت بۇيىرعان «بولاشاق»
ءدال سول ساتتە بۋرابايدا جۇرگەن مەملەكەت باسشىسى ن.نازارباەۆتىڭ دەمالىس كەستەسىنە بالالار لاگەرىندەگى كىشكەنتايلاردىڭ ونەرىن تاماشالاۋ ەنگىزىلىپتى. مىنە، وسى جولعى كەزدەسۋ ماشانىڭ تاعدىرىنا كۇرت وزگەرىس اكەلدى. الدىنان جۇگىرىپ شىققان ونى نۇرسۇلتان ءابىشۇلى دا بىردەن تانىسا كەرەك، قولىن الىپ، بەتىنەن ءسۇيدى. ءبىر جىل ىشىندە شەتەلدەن ۇيرەنىپ كەلگەن يتاليانشا ءانىن شىرقاعاندا ەلباسى اۋەنگە ەلىتىپ، بەرىلە تىڭدادى. وسى ءساتتى پايدالانعان جانىنداعى لاگەر جەتەكشىلەرى مەن وبلىس باسشىلارى تالانتتى قىزدىڭ يتالياعا قايتا بارىپ، وقۋىن جالعاستىرۋىنا ماتەريالدىق مۇمكىندىگى دەس بەرمەي تۇرعانىن جەتكىزىپ ۇلگەردى.
– قازىر ويلاپ قاراسام، ءبىزدىڭ وتباسىمىز بەن ماشا تۇيىققا تىرەلگەن تۇستا ۇنەمى نۇرسۇلتان ءابىشۇلى قۇتقارۋشى كەيپىندە شىعا كەلەدى ەكەن. قاراڭىز، لاگەردەگى كونتسەرتتەن كەيىن پرەزيدەنت قىزىمدى ەندى «بولاشاق» باعدارلاماسى بويىنشا وقىتۋعا تاپسىرما بەردى. ءتيىستى تالاپتاردىڭ بارىنەن وتكەن سوڭ قۇجاتتاردى جيناپ، «بولاشاقتىڭ» ستۋدەنتى رەتىندە كۇزدە يتالياعا قۋانا-قۋانا اتتاندى. ەندى قالاي شاتتانباسسىڭ، وقۋ اقىسى مەملەكەتتەن تولەنەدى؟! وعان قوسا ايىنا 1 مىڭ ەۋرو كولەمىندە ستيپەندياسى بار! ونسىز دا ەڭبەكقور ماشا وقۋعا قۇلشىنا كىرىستى. ورتا ءبىلىمدى ميلانداعى تاڭداۋلى ليتسەيلەردىڭ بىرىندە الىپ، ونەرىن شىڭدايتىن ءدارىستى لا سكالا تەاترىنىڭ جانىنداعى جوعارى مۋزىكا اكادەمياسىندا تىڭدادى. وندا ۇزدىك شاكىرتتەردىڭ ءوز ەلدەرىنىڭ تۋلارى بەينەلەنگەن شاعىن بەلگىنى قابىرعاعا ىلەتىن ءداستۇرى بار ەكەن. ماشا بارىنەن وزات وقىعان سوڭ قازاقستاننىڭ كوك تۋىنىڭ بەلگىسى دە سول قاتاردان تابىلدى، – دەپ ماقتانا ەسكە الادى الەكساندر نيكولاەۆيچ.
ماشا كەيىننەن «بولاشاق» ستيپەندياسىنا ەكىنشى مارتە يە بولدى. قالاي دەيسىز بە؟ تاعى دا تىكەلەي ەلباسىنىڭ شاراپاتىمەن. تاراتىپ ايتساق، يتالياداعى وپەرا مەكتەبىنىڭ قالىپتاسقان داستۇرىنە سايكەس، ماشاعا مۋزىكالىق اكادەميامەن قاتار د.ۆەردي اتىنداعى ميلان كونسەرۆاتورياسىنان ءبىلىم الۋ قاجەتتىگى تۋىندايدى. بۇل ونىڭ داۋسىنا شۆەيتساريالىقتاردىڭ قىزىعىپ جۇرگەن كەزى ەكەنىن ايتا كەتۋ كەرەك. سەبەبى، ماشانىڭ داۋسى – الەمدە سيرەك كەزدەسەتىن، ەڭ جوعارعى ايەل داۋسى سانالاتىن درامالىق سوپرانو. سوندىقتان ولار ماشاعا ستيپەنديا ۇسىندى، بىراق ول ءۇشىن سول ەلدىڭ ازاماتتىعىن قابىلداۋى كەرەك. الايدا مۇنداي سىيلىقتان باس تارتقان ماشا پرەزيدەنتكە حات جازىپ، جاعدايىن تەگىس بايان ەتەدى. «حات يەسىنە جەتكەنىن كەيىننەن بىلدىك. بەكزات ونەردى ەرەكشە قۇرمەتتەيتىن ءارى سۇيسىنە تىڭدايتىن ەلباسى ماشاعا تاعى دا «بولاشاقپەن» ەكىنشى قايتارا وقۋعا رۇقسات بەردى» – دەيدى سول كۇننىڭ قۋانىشىن ءالى ۇمىتپاعان اكەسى.
دالانىڭ دارا داۋسى
ماشا يتالياعا بارعاننان كەيىن ءبىرىنشى رەت 13 جاسىندا چەللا-مونتە قالاسىندا قازاقتىڭ ۇلتتىق كيىمىن كيىپ، «قازاق ءۆالسىن» ورىنداپتى. دالالىق داستۇرگە تاڭعالعان كورەرمەندەردىڭ ءبىرى: ء«سىز ازياداعى حانداردىڭ قىزى ەمەسسىز بە؟»، – دەپ تە سۇراعانىن قايتەرسىز؟! ارينە، ول ەشقانداي حان قىزى ەمەس ەدى. بىراق ويۋ-ورنەكپەن ادىپتەلگەن كيىمى مەن جالتىلداعان ساۋكەلەسىنە قاراپ، ونى ەرتەگىدەگى شىعىستىڭ حاس سۇلۋلارىنان استە ايىرا المايتىنىڭىز انىق. ونىڭ ۇستىنە ماشانىڭ قانىنداعى قاسيەت قازاق توپىراعىمەن تىكەلەي استاسىپ جاتىر دەسەك، ارتىق ايتقاندىق بولماس.
ءبىزدىڭ ماشا 15 جاسىندا يتاليادان بۇكىل ەۋروپاعا تارايتىن "Rai Uno" مۋزىكالىق تەلەارناسىندا تابيعي داۋىسپەن ءان ايتۋ سايىسىنا تۇسەدى. وندا جەڭىمپازدى كورەرمەندەر سمس حابارلاما جولداۋ ارقىلى انىقتايدى ەكەن. «Raccomandati» دەگەن اتاقتى جوباعا بەلگىلى ءانشى-كومپوزيتور توتو كۋتۋنو شاقىرسا دا، ءانشى قىز العاشىندا باس تارتىپتى.
– باسىندا قاتتى ويلاندىم، – دەيدى ماشا. – ويتكەنى، باسەكەلەستەردىڭ ءبارىنىڭ جاسى ۇلكەن ءارى تانىمال انشىلەر ەدى. ەڭ جاسىنىڭ ءوزى 25-تە. قالا بەردى، «Rai Uno» ارناسى بۇكىل ەۋروپاعا تارايدى. سەنى قانشاما ادام سىناي قارايتىنى انىق. جەڭىلىپ قالسام نە بولادى دەپ ۋايىمدادىم. دەگەنمەن كومپوزيتور ماعان قايتا-قايتا ءوتىنىش ءبىلدىردى. ميلان كونسەرۆاتورياسىنداعى ۇستازدارىم دا تەلەبايقاۋعا قاتىسقانىمدى قوش كوردى. العاشىندا ءانشى-كومپوزيتور توتو كۋتۋنونىڭ «مەن سياقتى ەشكىم دە سەنى سۇيە المايدى» دەگەن وتە كەڭ تاراعان ءانىن دۋەت بولىپ ورىندادىق. سوسىن ءوزىم جەكە شىعىپ، تاعى ەكى ءان ايتتىم. ەۋروپالىقتار سونشا تانىمال انشىلەردىڭ اراسىنان مەنى تاڭداپ، داۋىس بەرەدى-اۋ دەپ ويلاعان ەمەسپىن. اقتىق قورىتىندىدا جوعارى ۇپاي جيناپ، 1-ورىنعا كوتەرىلگەنىمدە، يتاليانىڭ بۇكىل گازەتى دۋىلداتا جازدى. مەنىڭ شەتەلدىك، ياعني قازاقستاننان ەكەنىمدى دە سوندا ءبىر-اق ءبىلىپتى. ماراپاتتاۋ ساتىندە زالدا يتاليانىڭ ءان ونەرىنىڭ جارىق جۇلدىزدارى وتىردى. ماعان قورىتىندى ءسوز بەرگەن كەزدە تىكەلەي ەفيردە دارىنىمدى باعالاپ، دامىتۋعا مول مۇمكىندىك بەرگەن قازاقستان پرەزيدەنتى نۇرسۇلتان ءابىشۇلىنا شىن جۇرەكتەن العىسىمدى ءبىلدىردىم.
ماريا مۋدرياك سوڭعى ون جىلدىڭ ىشىندە عاجايىپ داۋسىمەن تەك اپەننين تۇبەگىن عانا ەمەس، بۇكىل ەۋروپانى ەلىكتىرىپ كەلەدى. ونىڭ بۇلبۇل ءۇنىن قۇمارتا تىڭدايتىندار ازيادان، سونىڭ ىشىندە قازاقستاننان الەمدىك كلاسسيكالىق ونەرگە ءوز ۇلەسىن قوسۋعا لايىقتى تالانتتىڭ شىققانىنا تاڭعالادى. ەندى قايتسىن، وزگەلەردىڭ ونەردەگى ءومىرى 18 جاستان كەيىن باستالىپ جاتقاندا ءبىزدىڭ قىز بۇل كەزگە دەيىن وپەرانىڭ وتانىندا ەكى وقۋدى قاتار وقىدى. ءتىپتى اتى اڭىزعا اينالعان ماگدا وليۆەرو اتىنداعى سىيلىقپەن ماراپاتتالدى. ليتسەيدە وقىعان جىلدارى بۇكىل بالالار تاپسىرماعا وراي وزدەرىنىڭ تۋعان قالالارىنىڭ سۋرەتىن سالعان كەزدە، ماشا تۇتاس قازاق مەملەكەتىنىڭ كارتاسىن ءتۇسىرىپ، مۇعالىمدەردى تاڭ-تاماشا ەتكەن ەكەن. وسىنداي وتانشىل قىز قارت قۇرلىققا تابانى تيگەننەن بەرى مەملەكەتىمىزدىڭ اتىن، ۇلى دالانىڭ داۋسىن ەۋروپانىڭ تورىندەگى مارتەبەلى ساحنالاردان جۇرتقا ءجيى جاتتاتىپ ءجۇر.
الەمنىڭ ونىنشى سوپرانوسى
ماشا 2013 جىلى نيدەرلاند استاناسى امستەردامدا وتكەن «Belvedere» بايقاۋىنا قاتىستى. كلاسسيكالىق ءان دوداسىنىڭ ەرەكشەلىگى سول، وعان دۇنيە ءجۇزىنىڭ ەلۋ شاقتى مەملەكەتىنەن ءۇش مىڭنان استام ۇمىتكەر قاتىسىپ، اقتىق مارەگە تەك 160-ى عانا جىبەرىلگەن ەدى. ريم مەن ميلانداعى ىرىكتەۋگە كەلگەن 500 ۇمىتكەردىڭ اراسىنان وزىپ شىققان ماريا مۋدرياك اقتىق سىندا ايرىقشا دارالىعىمەن تانىلدى. ءسويتىپ، الەمنىڭ ۇزدىك سوپرانولارىنىڭ وندىعىنا ىلىكتى. بيىل ول ون جاسىندا قابىلدانعان ايگىلى وقۋ ورنىمەن قوشتاسادى. جاستايىنان جۇلدىزى جارقىراپ، ايى وڭىنان تۋعان ماشانىڭ ەندىگى جوسپارى قانداي؟
– ماشا ەرەكشە قامقورلىق كورسەتىپ، ءوز قىزىنداي ايالاعان نۇرسۇلتان ءابىشۇلىنا ونەردەگى جەتىستىكتەرى تۋرالى ەسەپ بەرىپ تۇرادى، – دەيدى اكەسى. – پرەزيدەنت ونى ۇنەمى ەلدە وتەتىن ماڭىزدى كونتسەرتتەردەن قالدىرماي، شاقىرتىپ جۇرەدى. امستەردامداعى بايقاۋعا قاتىسقاندا دا جەڭىسكە جەتۋىنە تىلەكتەستىگىن ءبىلدىردى. ال كەيىن ەۋروپانىڭ اتاقتى ساحنالارى مەن كونكۋرستارىندا قازاقستاننىڭ جاقسى اتىن شىعارۋدان جالىقپاۋ كەرەكتىگىن تاپسىردى. ۋاقىتى جەتكەندە ەلگە ورالىپ، «استانا وپەرا» تەاترىنان كورگىسى كەلەتىنىن دە ايتىپتى. قىزىم مەملەكەتتەن كوپ كومەك الدى عوي، ەندى سونىڭ وتەمىن قايتارۋ جولىندا تەر توگۋدەن ايانىپ قالمايدى.
قازاقتار قاسيەت تۇتاتىن جىلقى جىلى ماريا ءۇشىن قايىرلى قاداممەن باستالدى. يتاليانىڭ تۋرين قالاسىندا بولعان AsLiCo حالىقارالىق كونكۋرسىندا جەڭىمپاز اتانعان عالامات داۋىس يەسى تۋرالى جەرگىلىكتى باسىلىمدار دۇرىلدەتىپ جازىپ جاتىر. ويتكەنى، بۇل جەڭىسىنەن سوڭ ماريا مۋدرياك شىعارماشىلىق جوبالارعا، فەستيۆالدار مەن كونتسەرتتەرگە شاقىرىلاتىن ەۋروپالىق وپەرا انشىلەرىنىڭ تىزىمىنە ەنىپ، نەگىزگى كوزدەگەن باعىتىنا جولى اشىلدى. ەندى پەرزەنتتىك پارىزىن سەزىنىپ، ەۋروپادا تۋعان ەلدىڭ اتىن اسپانداتۋعا بار ىنتا-جىگەرىمەن كىرىسكەن تالانتتى قىزدىڭ تەك تىلەۋىن تىلەيىك. قاشان دا ءباسىڭ بيىك بولسىن، باياناۋىلدىڭ بۇلبۇلى!
Abai.kz
