قايرات بوداۋحانۇلى «قوي جىلعى قوڭىر كوشتىڭ» (1991 جىلدان باستالعان كوش) قوڭىراۋىمەن  باباقونىسىنا ورالعان باۋىرىمىز. جوعارى ءبىلىمدى رەسەيدەن العان ازامات.

قايرات بوداۋحانۇلى «قوي جىلعى قوڭىر كوشتىڭ» (1991 جىلدان باستالعان كوش) قوڭىراۋىمەن  باباقونىسىنا ورالعان باۋىرىمىز. جوعارى ءبىلىمدى رەسەيدەن العان ازامات.

قايرات مىرزا تاۋەلسىز قازاق مەملەكەتىنە قادام باسقان ءساتتىڭ  العاشقى كۇندەرىنەن باستاپ جالپى كوپكە ورتاق يگىلىكتى ىستەرگە  بىلەك تۇرە كىرىسىپ كەتتى. ورالمان مارتەبەسى بار اعايىننىڭ ورتاعا يكەمدەلۋىنە قاداري-حالىنشە مۇمكىندىك جاساۋعا ۇمتىلعان وكىمەت ادامدارىنىڭ بىردەن-ءبىر كەڭەسشىسى دە، اقىلداسار ادامى دا كوشى-قون ماسەلەسىندە قايرات بوداۋحانۇلى بولدى. قايرەكەڭ ۇكىمەت تاراپىنان بەرىلەتىن جەڭىلدىكتەردى پايدالانىپ قىتايدان، موڭعوليادان، وزبەكستاننان كەلگەن تالاي وتباسىنا جەر الىپ بەرىپ، باسپانالى بولۋىنا جاردەمدەستى. «اسار» اتتى ۇيىم قۇردى. قازىردە  ول وسى «اساردىڭ» نوقتااعاسى، انىقتاي ايتساق، «اسار» رەسپۋبليكالىق ورالماندار قوعامدىق بىرلەستىگىنىڭ» توراعاسى. بىرلەستىك الداعى ءۇش جىلدىڭ شەگىندە ەلوردامىزدىڭ قاسىنان «نۇربەسىك» دەپ اتالاتىن شاعىن قالاشىق سالىپ ءبىتىرۋدى جوسپارالاپ، ىسكە كىرىسىپ كەتتى. قالاشىقتاعى ۇيلەر «تاۋن حاۋس» ۇلگىسىندە سالىنادى. ءبىز مۇنى نەگە ەكپىن تۇسىرە جازىپ وتىرمىز؟ ويتكەنى الىستان ورالعان اعايىندارىمىزدىڭ اراسىندا قايرات سياقتى ىسكەر ازاماتتار وتە كوپ. ولار وسى كۇندەرى قوعامنىڭ بارلىق سالاسىندا ەڭبەك ەتىپ، ەل-جۇرتپەن بىتە قايناسىپ ۇلگەردى. سونىمەن، كەزەكتى ينتەرنەت-كونفەرەنتسيامىزدىڭ مارتەبەلى مەيمانى – قايرات بوداۋحانۇلى. قايرات مىرزاعا قويار ساۋالدارىڭىز بەن ايتار ويلارىڭىز بولسا، ماراحاببات.

Abai.kz