ەلوردا اكىمدىگى مادەنيەت باسقارماسىنىڭ بۇرىنعى باستىعى بولات ماجاعۇلوۆ ۇستالدى. ول 2016 جىلى «كۇن» سۋبۇرقاعىن سالۋ كەزىندە قاراجات جىمقىردى دەگەن كۇدىك تۋعان. سۋبۇرقاق استانا كۇنىنە وراي اشىلعان. الايدا، 2017 جىلدان باستاپ سۋبۇرقاق اپاتتى جاعدايعا تۇسكەن. قارجىلىق مونيتورينگ اگەنتتىگى سوتقا دەيىنگى تەرگەۋ امالدارى باستالعانىن راستادى.

تەرگەۋدەن بەلگىلى بولعانى، جوبا ميلليارد تەڭگەدەن استام اقشاعا سالىنعان، بىراق مادەنيەت باسقارماسى ونى مەملەكەتتىك ساتىپ الۋسىز سالدىرعان. ءتىپتى، سۋبۇرقاقتا جوبالاۋ-سمەتالىق قۇجاتتاماسى جوق جانە مەملەكەتتىك ساراپتامادان دا وتپەگەن بولىپ شىققان.

كەيىنىرەك «كۇن» سۋبۇرقاعىنىڭ ساپاسىز ماتەريالداردان جاسالعانى، سول سەبەپتى تەز ىستەن شىققانى انىقتالعان.

تەرگەۋ جۇرگىزىپ جاتقان قما مالىمەتتەرى بويىنشا، سول كەزدەگى قالانىڭ مادەنيەت باسقارماسى باستىعىنىڭ بۇعان تىكەلەي قاتىسى بار.

تەرگەۋ اياسىندا بولات ماجاعۇلوۆتىڭ 3 كوممەرتسيالىق ءۇي-جايى، 2 پاركينگى جانە پرەميۋم ساناتتاعى پاتەرىنە شەكتەۋ قويىلعان.

سونداي-اق، ءىس بويىنشا سۋبۇرقاق سالعان مەردىگەر كومپانيالاردىڭ وكىلدەرى دە كۇدىكتىلەر قاتارىندا ەكەنى ايتىلادى. بارلىعىن ەسەپتەگەندە، 500 ميلليون تەڭگەدەن استام مۇلىككە تىيىم سالىنعان.

Abai.kz